სასამართლომ მიხეილ სააკაშვილი დარბაზიდან გაათავისუფლა
სასამართლომ არ დააკმაყოფილა პროკურატურის შუამდგომლობა, რომელიც სააკაშვილისთვის აღკვეთის ღონისძიებად შინაპატიმრობას ითხოვდა და მიხეილ სააკაშვილი დარბაზიდან გაათავისუფლა.
რა ხდებოდა სასამართლოში დღის განმავლობაში
პროკურორის თქმით, არის საფრთხე, რომ რუსეთის სპეცსამსახურებმა სცადონ სააკაშვილისა და დანგაძის (სააკაშვილის საქმის ფიგურანტი) ლიკვიდაცია. ამიტომ პროკურატურა სააკაშვილისვე უსაფრთხოების მიზმით, მისთვის აღმკვეთ ღონისძიებად სადღეღამისო შინაპატიმრობას ითხოვს.
ბრალდების თქმით, სააკაშვილს ალბათ აქვს სახლში ინტერნეტი და მას თავისუფლად შეუძლია თავის მხარდამჭერებს სკაიპით ეკონტაქტოს.
პროკურორის განცხადებით, შინაპატიმრობა გამოიყენება იმ შემთხვევაში, როდესაც ბრალდებულს ციხე ემუქრება. ის მუხლი კი, რომელიც სააკაშვილს აქვს წაყენებული, სწორედ ხუთ წლამდე პატიმრობას ითვალისწინებს.
რა ხდებოდა მანანმდე
მიხეილ სააკაშვილი კიევის პეჩერსკის სასამართლოში კიევის დროით დილის 9 საათზე მიიყვანეს.
სააკაშვილმა სასამართლოზე განაცხადა, რომ ის ოლიგარქიული რეჟიმის მსხვერპლია.
მან სასამართლო დარბაზში უკრაინის და საქართველოს ჰიმნები იმღერა.
https://www.youtube.com/watch?v=2AFTilV4ew4
სააკაშვილს სამი ადვოკატი ჰყავს.
სხდომას საქართველოს მესამე პრეზიდენტის მეუღლე სანდრა რულოვსიც ესწრება.
თავდაპირველად სააკაშვილი სასამართლოს დარბაზში სპეციალურ შუშის ბოქსში იჯდა, თუმცა მოსამართლემ დააკმაყოფილა ადვოკატების შუამდგომლობა და იგი ბოქსიდან გამოუშვეს.
სხდომაზე მივიდა იული ტიმოშენკოც და სააკაშვილის გვერდით დაჯდა.
შესვენებაზე ისინი ერთმანეთს გაესაუბრნენ. “მე 28 დღე ვშიმშილობდი”, – უთხრა ტიმოშენკომ სააკაშვილს. “მე ოთხი დღე”, – უპასუხა სააკაშვილმა.
ტიმოშენკომ ჟურნალისტებს განუცხადა, რომ სააკაშვილის წინააღმდეგ სასამართლო ეს არის “ანგარიშსწორება”. “პოროშენკო ამ საქციელით არცხვენს უკრაინას. ყველა გასამართლდება ვინც ეს ყველაფერი მოაწყო”.
ტიმოშენკო მზადაა თავდებში დაუდგეს სააკაშვილს. ასეთი მზაობა კიდევ 12-მა დეპუტატმა გამოთქვა.
“პუტინი ახლა იცინის. ხარხარებს უბრალოდ!” – ამბობს სააკაშვილი სასამართლოზე. “მე თუ ФСБ-ს აგენტი ვარ, მაშინ მოსკოვს უნდა გადამცენ. პუტინი კი სამხრეთ ოსეთის დაზვერვას ჩამაბარებს”.
სააკაშვილი ამბობს, რომ წინასწარი დაკავების საკანში მას მხოლოდ წყალს და რვეულებს აძლევდნენ. მისი თქმით, ის #13 საკანში მოათავსეს, სადაც უკრაინელი ჟურნალისტის გიორგი ღონღაძის მკვლელი იჯდა.
სასამართლო დარბაზი, სადაც სხდომა მიმდინარეობს ძალიან პატარაა. სხდომა კი ღიაა, მაგრამ ბევრმა ჟურნალისტმა იქ შესვლა ვერ მოახერხა. ადვოკატებმა მოსამართლეს დიდ დარბაზში გადანაცვლების თხოვნით მიმართეს, მაგრამ უარი მიიღეს. “პეჩერსკის სასამართლოში არ არის უფრო დიდი დარბაზი,” – განაცხადა მოსამართლემ.
მიხეილ სააკაშვილმა სასამართლო დარბაზიდან ფეისბუკ პოსტი დაწერა:
“მე გამოვაცხადე შიმშილობა. მე ვაჩვენე როგორ შეიძლება ცხოვრობდნენ პრეზიდენტები და მე მათ ვაჩვენებ, როგორ შეიძლება მოკვდნენ პრეზიდენტები, თუ ეს საქმეს დასჭირდა. მაგრამ ნებისმიერ შემთხვევაში ეს სასაცილო და სამარცხვინოა, რომ პროცესს, რომელიც მთელ მსოფლიოს აინტერესებს, ათი კვადრატული მეტრის ოთახში ატარებენ. ეს არის ახალი უკრაინა? ეს არის გამჭვირვალობა? ეს უშიშროების თანამშრომლები, რომლებიც აქ სხედან, ესენი არიან უკრაინელი ხალხი?
მე შეიძლება დამამწყვდიოთ გალიაში, მაგრამ ხალხს ვერ დაამწყვდევთ. ჩვენ გადავლახავთ ამას და აუცილებლად გავიმარჯვებთ. ჩვენ არ გვჭირდება ექსცესები, არ გვჭირდება დაპირისპირება და დესტაბილიზაცია. ჩვენ გვინდა მშვიდად ჩავატაროთ პოლიტიკური პროცესი ცივილიზებულ, დემოკრატიულ, ევროპულ ქვეყანაში,” – დაწერა სააკაშვილმა.
სასამართლოს შენობასთან
პეჩერსკის სასამართლოსთან დილიდან სააკაშვილის მხარდამჭერები შეიკრიბნენ.
სასამართლოს შენობას ნაციონალური გვარდია იცავს:
• სააკაშვილს ბრალად ედება დანაშაულებრივ ჯგუფთან სახელმწიფო ინტერესების საზიანოდ თანამშრომლობა. უკრაინის გენერალურმა პროკურორმა იური ლუცემკომ წარმოადგინა აუდიო და ვიდეო ჩანაწერები, რომლებიც, მისი თქმით, ამტკიცებს, რომ სააკაშვილმა სულ მცირე 300 ათასი დოლარი აიღო სერგეი კურჩენკოსგან. კურჩენკო უკრაინაში სკანდალურად ცნობილი ბიზნესმენია, ის ექს-პრეზიდენტ ვიქტორ იანუკოვიჩის მხარდამჭერი იყო და ახლა უკრაინის ხელისუფლების მიერ იძებნება – კურჩენკო თავს რუსეთს აფარებს.
• სააკაშვილი პირველად უკრაინელმა სამართალდამცავებმა 5 დეკემბერს დააკავეს, თუმცა ოდესის ექს-გუბერნატორის მომხრეებმა მისი გათავისუფლება მოახერხეს.
• მეორედ მიხეილ სააკაშვილი 9 დეკემბერს დააკავეს. ორი დღეა ის წინასწარი დაკავების იზოლატორში იმყოფება. უკრაინის პროკურატურის ბრალდებებს სააკაშვილი არ აღიარებს. დაკავებისთანავე მან შიმშილობა გამოცხადა.
