თბილისში ტელეკომპანია "რუსთავი -2"-ის მხარდამჭერი მასშტაბური აქცია გაიმართა

თბილისში ტელეკომპანია “რუსთავი -2”-ის მხარდამჭერი მასშტაბური აქცია გაიმართა. პარლამენტის ყოფილ შენობასთან რუსთაველის გამზირზე რამდენიმე ათეული ათასი ადამიანი შეიკრიბა.

აქციაზე მოსვლისკენ მოქალაქეებს ტელეკომპანიის ხელმძღვანელობამ და ჟურნალისტებმა მოუწოდეს, რადგან ამ დღეებში უზენაესმა სასამართლომ ტელეკომპანიის საკუთრების საქმეზე გადაწყვეტილება უნდა გამოაცხადოს.  “რუსთავი 2” ხელისუფლებას სასამართლოზე ზეწოლაში და ოპოზოციური ტელეარხის მისაკუთრების მცდელობაში ადანაშაულებს.

მიტინგზე სიტყვით გამოვიდნენ “რუსთავი 2”-ის ჟურნალისტები და წამყვანები. მათ მაყურებლებს სიტყვის თავისუფლების მხარდაჭერისთვის მადლობა გადაუხადეს და უზენაესი სასამართლოს მოსამართლეებს მოუწოდეს, ხელისუფლების დაკვეთა არ შეასრულონ.

ამავე დროს აქციამ პოლიტიკური მოწოდებების გარეშე ჩაიარა – მას  სხვადახვა პოლიტიკური პარტია შეუერთდა, თუმცა, არც ერთი პოლიტიკოსი სიტყვით არ გამოსულა.

• ტელეკომპანია “რუსთავი 2”- თან დაკავშირებული დავა, უკვე მეორე წელია, გრძელდება. ტელეკომპანიის ყოფილი მეპატრონე ქიბარ ხალვაში “რუსთავი 2”-ის მის მფლობელობაში დაბრუნებას ითხოვს და აცხადებს, რომ ტელეკომპანია მას წინა ხელისუფლებამ იძულებით ჩამოართვა.

• ივნისში გამართულ სასამართლო პროცესზე სააპელაციო სასამართლომ თბილისის საქალაქო სასამართლოს გადაწყვეტილება ძალაში დატოვა და “რუსთავი-2” ქიბარ ხალვაშის მიაკუთვნა, თუმცა ტელეკომპანიის ადვოკატებმა გადაწყვეტილება უზენაეს სასამართლოში გაასაჩივრეს.

• ტელეკომპანია “რუსთავი 2”-ის საქმეს ამჟამად უზენაესი სასამართლოს დიდი პალატა განიხილავს.