დიდთოვლობის შედეგები სამხრეთ ოსეთში - სკოლები არ მუშაობს, გზა გადაკეტილია, შუქი და წყალი არ არის

მესამე დღეა, სამხრეთ ოსეთი ელექტროენერგიის გარეშეა დარჩენილი. დიდითოვლობის შედეგად მაღალი ძაბვის ელექტროგადამცემი ხაზი დაზიანდა.

ავარიის აღმოსაფხვრელი სამუშაოები გრძელდება. მოცემულ მომენტში აღმოჩენილია და შეკეთებული სამ ადგილას გაწყვეტილი ხაზი. თუმცა, ელექტრომომარაგების აღსადგენად ეს არ კმარა – ენერგეტიკოსებმა უნდა შეამოწმონ და აღმოფხვრან რუსეთის ფედერაციის საზღვრის მახლობლად მდებარე ძომაგის უღელტეხილის ხაზზე არსებული დაზიანება. ეს ადგილი თოვლის გამო ახლა ძნელად მისადგომია. სამხრეთ ოსეთის ხელისუფლებამ ძომაგის ხეობის ადგილმდებარეობის გამოსაკვლევად რუსეთის საგანგებო სიტუაციების სამინისტროსგან ვერტმფრენი ითხოვა.

სამხრეთ ოსეთის დედაქალაქ ცხინვალში ელექტროენერგია მხოლოდ სასიცოცხლოდ მნიშვნელოვან ობიექტებს მიეწოდება, სკოლების უმეტესობა დაკეტილია.

„ძომაგის ხეობის რაიონში არსებულ ხაზზე მომხდარი ავარიის აღმოსაფხვრელად აუცილებელია ფორსირებული სამუშაოების ჩატარება, ასევე სტრატეგიულად მნიშვნელოვანი ობიექტების შეუფერხებელი ფუნქციონირების უზრუნველყოფა. პირველ რიგში, სამუშაო რეჟიმში უნდა იმყოფებოდეს სამკურნალო და საგანმანათლებლო დაწესებულებები, ინტერნატი და მოხუცთა თავშესაფარი“, – განაცხადა სამხრეთი ოსეთის მთავრობის თავმჯდომარემ ერიკ პუხაევმა.

სამხრეთ ოსეთში ის სკოლები და საბავშვო ბაღები, რომლებიც ელექტროენერგიით თბება, უშუქობის გამო, არ მუშაობს.

„გიმნაზია „ალბიონში“ გათბობის სათადარიგო სისტემა არსებობდა და იქ ჩვეულებრივი რეჟიმით მუშაობენ. გარდა ამისა, შეფერხებები წყალმომარაგების მხრივაც გვაქვს და ბავშვებს სიცივეში ვერ დავტოვებდით. სამხრეთ ოსეთის იმ რაიონებში, სადაც შეშის ღუმელებით ან დიზელის საწვავით თბებიან, გაკვეთილები ისევ ტარდება“, – თქვა სამხრეთ ოსეთის განათლებისა და მეცნიერების მინისტრმა ნატალი გასიევამ.

ზვავსაწინააღმდეგო სამსახური სამხრეთ ოსეთის მხრიდან აპირებს, რომ რუსეთისა და სამხრეთ ოსეთის შემაერთებელი ტრანსკავკასიის ავტომაგისტრალის გასწვრივ, პოტენციურად სახიფათო ადგილების მიმართულებით ზვავსაწინააღმდეგო   ზარბაზნებიდან ისროლოს, რათა გზის გახსნის შემდეგ გზაზე ზვავის ჩამოწოლის საფრთხე შეამციროს.

ამჟამად ტრასის მიმდებარედ თოვის ინტენსიურობა შემცირდა და გზის წმენდა მიმდინარეობს.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო