გაეროს ადამიანის უფლებათა კომიტეტი: ყირიმში ადამიანებს უსაფუძვლოდ აკავებენ და აწამებენ

რუსეთის ოკუპაციის პირობებში, ყირიმში ადამიანის უფლებების მხრივ  ვითარება მნიშვნელოვნად გაუარესდა. ამის შესახებ  გაეროს ადამიანის უფლებათა სამართველოს  მოხსენებაშია ნათქვამი.

„აღინიშნა ადამიანის უფლებების სერიოზული დარღვევები, ისეთი როგორიცაა განუკითხავი დაჭერები და დაკავებები, ძალადობრივი გაუჩინარების შემთხვევები, სასტიკი მოპყრობისა და წამების ფაქტები, არასამართლებრივი დასჯის, სულ ცოტა, ერთი შემთხვევა მაინც“, – ნათქვამია მოხსენებაში.

დოკუმენტში აღნიშნულია, რომ ყირიმის ყველა მაცხოვრებელი დაზარალდა, როდესაც უკრაინული კანონები რუსეთის ფედერაციის კანონებით შეიცვალა. ათობით ათას ადამიანს კი, ვინც რუსეთის მოქალაქობაზე უარი განაცხადა და ბინადრობის უფლება მიიღო, მრავალი უფლება ჩამორთმეული აქვს. კერძოდ, არ შეუძლიათ არჩევნებში ხმის მიცემა და თავად კენჭის ყრა, საზოგადოებრივი თვშეყრის ჩატარებაზე განცხადების შეტანა, სახელმწიფო ადმინისტრაციაში თანამდებობის დაკავება. ეს და მოხსენებაში აღნიშნული სხვა ქმედებები  ადამიანის უფლებების სფეროში საერთაშორისო ჰუმანიტარულ სამართალს არღვევს.

გაეროს ადამიანისუფლებების სამართველო ასევე  აღნიშნავს, რომ  ყირიმში, ექსტრემიზმთან ბრძოლის საბაბით, ჩხრეკდნენ სახლებს  და ჟურნალისტებს, ბლოგერებს, აქტივისტებსა და ორგანიზაცია „ყირიმელი თათარი ხალხის მეჯლისის“ მომხრეებს აშინებდნენ.

მოხსენებაში მოყვანილია 2016 წელს მომხდარი ორი შემთხვევა, როდესაც პროუკრაინელი აქტივისტების მიმართ გამოყენებულია „სექსუალური ძალადობის ელემენტების შემცველი წამება“, რის გამოც, ისინი იძულებულები გახდნენ, რომ ტერორიზმთან დაკავშირებული დანაშაულები ეღიარებინათ.

მოხსენება რუსეთის მთავრობის მიმართ 20 რეკომენდაციას შეიცავს. გაერო მოუწოდებს რუსეთს, ყირიმში ადამიანის უფლებები დაიცვას  და ეფექტურად გამოიძიოს სავარაუდო წამების, გატაცებისა და მკვლელობის შემთხვევები.

სახელმწიფო დუმის ყირიმელმა დეპუტატმა რუსლან ბალბეკმა გაეროს მოხსენებას უწოდა „ფილკას სიგელი“, რომელსაც რეალობასთან საერთო არაფერი აქვს. დეპუტატის თქმით, მოხსენებაში ყირიმის სინამდვილესთან  საერთო  არაფერია. მან ასევე დასძინა, რომ „მთელი ამ მოხსენებების შემდგენი ორგანიზაციები“ ბრმად მოქმედებენ, და რუსეთის ხელისუფლება არ აპირებს, რომ მათ „ბრმად ენდოს“.