ბაქოში „ფორმულა 1“-ის მორიგი ეტაპი, „აზერბაიჯანის გრანპრი“ დაიწყო
დღეს ბაქოში საავტომობილო რბოლის ყველაზე პრესტიჟული ტურნირის, „ფორმულა1“-ის მეოთხე ეტაპი დაიწყო. შეჯიბრში 20 პილოტი მონაწილეობს, რომლებიც 10 სხვადასხვა გუნდს წარმოადგენენ. ისინი ბაქოს ცენტრალურ ქუჩებსა და მოედნებზე 51 წრეს დაფარავენ. თითოეული ტრასის სიგრძე 6 კილომეტრია.
სპეციალისტების აზრით, გამარჯვების ყველაზე რეალური შანსი მსოფლიოს ოთხგზის ჩემპიონებს – გერმანელ სებასტიან ფეტელს, ბრიტანელ ლუის ჰემილტონსა და “აზერბაიჯანის გრანპრის“ შარშანდელი გათამაშების გამარჯვებულს, ავსტრალიელ დენიელ რიკარდოს აქვთ.
ბაქო უკვე მესამედ მასპინძლობს ამ ასპარეზობას და ისევე როგორც წინა წლებში, ახლაც გასაიდუმლოებულია ინფორმაცია ღონისძიების ბიუჯეტის შესახებ. თუმცა, ორგანიზატორების მტკიცებით, წელს დანახარჯების საერთო მოცულობა შემცირდება, შემოსავალი კი გაიზრდება. საქმე ისაა, რომ 2018 წელს ბაქოს ეტაპი არა ივნისში, არამედ აპრილში გაიმართება. პიტსტოპები და ზოგიერთი ტრიბუნა დღემდე არავის აუღია. ორგანიზატორებმა გადაწყვიტეს, შარშანდელი ზღუდე-გალავნები გამოიყენონ.
ფინალური რბოლა 29 აპრილს გაიმართება. ფინალის ბილეთების ფასები 40-დან 600 დოლარამდე მერყეობს და ტრიბუნების მდებარეობაზეა დამოკიდებული.
ღონისძიება ამჯერადაც კონცერტების ფონზე ჩატარდება. წელს ბაქოში კრისტინა აგილერა, ჯგუფი «Jamiroquai», მარტინ სოლვიგი და სხვა არტისტები ჩამოვიდნენ.
ბაქოს ცენტრალური ქუჩები შეჯიბრების დაწყებამდე ერთი კვირით ადრე გადაიკეტა. იმ სკოლებში, რომლებიც რბოლის ტრასების ზონაში მდებარეობს, ერთკვირიანი ვადამდელი არდადეგები გამოაცხადეს. ბაქოს ბევრი მცხოვრები შემზღუდავი ზომების წინააღმდეგ გამოდის და საკუთარ პოზიციას სოციალური ქსელების მეშვეობით გამოხატავს, თუმცა, ზოგიერთი ბაქოელი ამ მოვლენას გაგებით ეკიდება. წარმოგიდგენთ რამდენიმე ტიპურ კომენტარს.
«… ქალაქი ოკუპირებულ ვარშავას ჰგავს – ზონას, რომელშიც ებრაული გეტოები არსებობდა. ყველგან ზღუდეები და ღობეები აღმართეს. ლამისაა, მავთულხლართები გააბან. ახალ ბულვარზე ჰაუბიცები დგას.
სამსახურიდან სახლამდე მისაღწევად ორი საათი დამჭირდა».
«ნეტა ვის მოსწონს ეს შეჯიბრი და ვინ „კაიფობს“ ამ ქვეყანაში „ამ ფორმულა ერთით“!
ქალაქი საპატიმრო ბანაკს დაემსგავსა»
«მე საერთოდ არ მაწუხებს. მეტროთი ვისეირნებ. დიდი ამბავი!”
“როგორც უფალი იტანჯებოდა, ისე უნდა დავიტანჯოთ ჩვენც».
„არ შეიძლება ყველაფერში გამორჩენას ვეძებდეთ“.
“უფრო პოზიტიურად შეხედეთ ცხოვრებას.
“ფორმულა 1“ მნიშვნელოვანი მოვლენაა ჩვენი პატარა ქვეყნისთვის
მე მზად ვარ, ეს უხერხულობა ავიტანო»
