ბაქოში, სახუმარო ვიდეოს ავტორი ამბობს, რომ პოლიციაში მის დაშინებას ცდილობდნენ

21.40

საპროტესტო აქციის შესახებ სახუმარო ვიდეოს ავტორი, გრაფიკოსი დიზაინერი რასულ ჰასანი, რომელიც 18 თებერვალს დილით გაქრა, პოლიციის განყოფილებიდან გაათავისუფლეს. ამის შესახებ მედიას  აცნობა  მისმა მამამ ელშან ჰასანოვმა. მისი თქმით, პოლიციელებმა რასული 18 თებერვლის დილით დააკავეს და განყოფილებაში გადაიყვანეს. იქ მას ოპოზიციური შეხედულებების შესახებ ეკითხებოდნენ. გაარკვიეს ოჯახის შემადგენლობა, აიძულეს ვიდეოს წაშლა და დაემუქრნენ, რომ თუკი ის მის დაკავებას გაახმაურებდა, მის მიმართ „უფრო მკაცრ ზომებს“ მიიღებდნენ. 

ელშან გასანოვმა ასევე თქვა, რომ ეს ხელისუფლების მხრიდან მის ოჯახზე ზეწოლის პირველი შემთხვევა არ არის, და  ისინი აპირებენ, რომ მომხდარის შესახებ აზერბაიჯანში არსებულ დასავლეთის ქვეყნების საელჩოებს აცნობონ.

17:00

გატაცების სავარაუდო მიზეზი – 16 თებერვალს ჩატარებული ოპოზიციის საპროტესტო აქციის თემაზე რასულის მიერ გადაღებული სახუმარო ვიდეოა. ამ ვიდეოზე ასახულები არიან სპეცრაზმელები, რომლებსაც  აზერბაიჯანის ცენტრალური საარჩევნო კომისიის შენობა ალყაშემორტყმული აქვთ და აზერბაიჯანულ ეროვნულ ცეკვა „იალის“ ცეკვავენ. 

საპარლამენტო არჩევნების გაყალბების წინააღმდეგ საპროტესტო აქცია ოპოზიციური პარტიების „რესპუბლიკური ალტერნატივასა“ და „მუსავათის“ მიერ იყო ორგანიზებული. მაგრამ, ჯერ კიდევ აქციის დაწყებამდე მისი მონაწილეების უმეტესობა დააკავეს, ქალაქიდან შორს გაიყვანეს და იქ გაათავისუფლეს. საარჩევნო კომისიის შენობის მთელი ტერიტორია ასევე პოლიციელებითა და სპეცრაზმელებით იყო გარშემორტყმული.

• ყველაფერი აზერბაიჯანის საპარლამენტო არჩევნების შესახებ ერთ წუთში