ბაქოში პირველი დამოუკიდებელი აზერბაიჯანული რუსულენოვანი გაზეთის დამფუძნებელი გარდაიცვალა

რაუფ თალიშინსკიმ პირველი დამოუკიდებელი აზერბაიჯანული რუსულენოვანი გაზეთი „ზერკალო“ დაარსა. იგი 8 მაისს, ბაქოში,  გულის დაავადებით გარდაიცვალა.

რაუფ თალიშინსკიმ დაახლოებით ორმოცი წელი იმუშავა ჟურნალისტიკის სფეროში. 1990 წელს, საბჭოთა ეპოქის მიწურულს, იმ პერიოდში, როდესაც ბაქოში კომენდანტის საათი მოქმედებდა და ქალაქში არეულობა სუფევდა, თალიშინსკიმ დაარსა გაზეთი „ზერკალო“, რომელიც დამოუკიდებლად მოქმედებდა და ჯიუტად არ იცვლიდა არჩეულ კურსს. იმ პერიოდში თალიშინსკის გაზეთის ათობით ათასი ეგზემპლარი იყიდებოდა, რაც ბაქოსთვის ძალიან დიდ ტირაჟს წარმოადგენს.

ამჟამად არც ისე ბევრს ახსოვს ის, რომ ცნობილი პუბლიცისტური ჟურნალი „მონიტორი“ თავიდან „ზერკალოს“ დამატებას წარმოადგენდა. მოგვიანებით „მონიტორი“ გაემიჯნა „ზერკალოს“ და ჟურნალის ხელმძღვანელის პოზიცია ცნობილმა აზერბაიჯანელმა ჟურნალისტმა, ელმარ ჰუსეინოვმა დაიკავა. თავის სტატიებში ჰუსეინოვი ხელისუფლების მიმართ კრიტიკულ შენიშვნებს არ იშურებდა. იგი 2005 წელს მოკლეს (დამნაშავე დღემდე არ არის ნაპოვნი).

რაუფ თალიშინსკიმ „ზერკალო“ 2001 წელს დატოვა და გაზეთი „ეხო“ დაარსა და ამ გამოცემის ხელმძღვანელი გახდა.

“ზერკალო” აზერბაიჯანელი ჟურნალისტების სკოლად ჩამოყალიბდა და დიდი ხნის მანძილზე ინარჩუნებდა ამ პოზიციას. გაზეთმა ბევრი ცნობილი აზერბაიჯანელი რუსულენოვანი ჟურნალისტი აღზარდა.