აფხაზეთში გავლენიანი ბიზნესმენი მოკლეს, რომელსაც ყოფილ პრეზიდენტზე თავდასხმა ბრალდებოდა
უცნობი ადამიანები ცნობილ ბიზნესმენს პაველ არძინბას სოხუმი-ფსოუს ტრასაზე, სახელმწიფო ავტოინსპექციისა და გუმისთას საგუშაგოებს შორის რაიონში 13 დეკემბერს, დღისით, დაახლოებით 17.00. დაეწივნენ. მისი “Mercedes-Benz” ავტომატებით დაცხრილეს. დაიღუპნენ პაველ არძინბა და მისი მძღოლი დმიტრი ხაგბა.
პაველ არძინბა აფხაზეთში განსაკუთრებული და ძალიან ცნობილი ფიგურა იყო. წლების განმავლობაში მასზე საერთაშორისო ძებნა იყო გამოცხადებული, მას ექს-პრეზიდენტ ალექსანდრ ანქვაბზე თავდასხმა და დაცვის ორი ოფიცრის მკვლელობა ბრალდებოდა. მოულოდნელად, 2017 წლის 26 სექტემბერს არძინბა გენერალური პროკურატურის საგამოძიებო სამმართველოში ნებაყოფლობით გამოცხადდა.
მაშინ არძინბა დააკავეს და დაკითხეს, მაგრამ რამდენიმე დღეში, სასამართლოს გადაწყვეტილებით, პაველ არძინბა თავდებითა და ქვეყნიდან გაუსვლელობის ხელწერილით გაათავისუფლეს. ამბობდნენ, რომ ის მძიმედ იყო ავად.
მკვლელობის მოტივისა და მკვლელების ვინაობის შესახებ ჯერჯერობით არანაირი ვერსია არ არსებობს, შემთხვევის ადგილას გამომძიებლები და კრიმინალისტები მუშაობენ.
ვარაუდობენ, რომ პაველ არძინბა კავშირშია რესპუბლიკის ყოფილ პრეზიდენტ ალექსანდრ ანქვაბზე რიგით მეექვსე თავდასხმასთან, რომელიც 2012 წლის 22 თებერვალს მოხდა. მისი კორტეჟი მასობრივად დაცხრილეს, თავად ანქვაბი არ დაშავებულა, თუმცა მისი დაცვის ორი წევრი დაიღუპა.
ორი თვის შემდეგ აფხაზეთში გამოცხადდა, რომ თავდასხმასთან კავშირშია დამნაშავეთა იგივე ჯგუფი, რომელსაც პირადპირი კავშირი ჰქონდა ალექსანდრ ანქვაბიზე განხორციელებულ წინა ხუთ თავდასხმასთან.
ამ დაჯგუფების ათ წევრს მაშინ ბრალდებები წაუყენეს. ერთ-ერთმა მათგანმა, შინაგან საქმეთა ყოფილმა მინისტრმა, ალმასბეგ კჩაჩმა დაკავების დროს თავის მოიკლა, მეორემ იზოლატორში ჩამოიხრჩო თავი. ამ საქმის ორმა სხვა ფიგურანტმა – პაველ არძინბამ და რუშბეი ბარციცმა მიმალვა მოახერხა.
ამ საქმეზე სასამართლო პროცესი 2013 წელს დაიწყო და ოთხ წელიწადს გრძელდებოდა. დანაშაულებრივი ჯგუფის წევრებს 13 და 20 წლით თავისუფლების აღკვეთა მიესაჯათ. პაველ არძინბას საქმეზე მაშინ ცალკე სამართალწარმოება იყო გამოყოფილი.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
