აფხაზეთის პრეზიდენტმა საზოგადოებას მოუწოდა „არ აჰყვნენ ავანტიურებს და პროვოკაციებს“

საპარლამენტო არჩევნების მეორე ტურის წინ არსებულ დაძაბულ სიტუაციასთან დაკავშირებით რაულ ხაჯიმბამ ადამიანებს სიტყვით მიმართა და მოუწოდა, „არ აჰყვნენ სხვადასხვა შესაძლო ავანტიურასა და პროვოკაციებს და წინააღმდეგობა გაუწიონ მათ მოქმედებებს, ვინც საკუთარი და ჯგუფური ინტერესების გამო, მზად არის, ქვეყანა ქაოსისა და განუკითხაობისთვის გაწიროს“.

მიმართვის მიზეზი გახდა ის დაძაბული სიტუაცია, რომელიც წინ უძღვის კვირას, 26 მარტს დაგეგმილ საპარლამენტო არჩევნების კენჭისყრის მეორე ტურს.

კვირის განმავლობაში მომხდარ ფაქტებს – სოხუმის მე-4 საარჩევნო ოლქის დეპუტატობის კანდიდატის ბალატ აიბას მაქნქანის დაწვას და გალის საარჩევნო ოლქში არჩევნების მეორე ტურში გასული დეპუტატობის სხვა კანდიდატის, კახი პერტაიას ავტომობილის დაცხრილვას – ხაჯიმბამ „ბინძური ტექნოლოგიები“ უწოდა.

„ცალკეული კანდიდატების მომხრეები… ამომრჩევლებზე ზეწოლას ახდენენ… არასასურველი კანდიდატების წინააღმდეგ მოსყიდვის, სიცრუისა და დეზინფორმაციის ხერხს მიმართავენ“, – თქვა რაულ ხაჯინბამ და აღნიშნა, რომ ყველანაირი ზომები ტარდება მათ გამოსავლენად, ვინც დაწვისა და დაცხრილვის ფაქტებთან არის დაკავშირებული.

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არემთხვეოდეს