აზერბაიჯანში ძველისძველი დამოუკიდებელი საინფორმაციო სააგენტოს დირექტორი დააკავეს

მეჰმან ალიევი, უძველესი და დღესდღეობით აზერბაიჯანში ერთადერთი დამოუკიდებელი საინფორმაციო სააგენტო „ტურანის“ დირექტორი, 24 აგვისტოს, საღამოს ქალაქ ბაქოს იასმალსკის პოლიციის თანამშრომლებმა დააკავეს, როგორც „გადასახადების გადაუხდელობასა“ და „თანამდებობრივი უფლებამოსილებების ბოროტად გამოყენებაში“ ეჭვმიტანილი.

სასამართლომ 48 საათის განმავლობაში უნდა გადაწყვიტოს, წინასწარი პატიმრობა შეუფარდოს მას, თუ ძიების პერიოდში თავისუფლება შეუნარჩუნოს.

25 აგვისტოს დილით სააგენტო „ტურანმა“ გაავრცელა განცხადება, რომელშიც ნათქვამია:

“ჩვენი საგენტოს დირექტორის მეჰმან ალიევის დაკავებასა და გადსახადებისთვის თავის აცილებაში ბრალდებით მის მიმართ სისხლის სამართლის საქმის აღძვრასთან დაკავშირებით სააგენტოს საბანკო ანგარიშები დაიბლოკა.

ამგვარ სიტუაციაში სააგენტოს ნორმალური ფუნქციონირება უაღრესად რთული ხდება.

შექმნილი სიტუაციის გათვალისწინებით, Turan-ის კოლექტივი იძულებულია, 1 სექტემბერიდან თავისი საქმიანობა გაურკვეველი დროით შეაჩეროს.

უახლოეს ხანში შევეცდებით, საკუთარი რესურსებისა და ენთუზიაზმის ხარჯზე შევინარჩუნოთ ჩვენი ვებგვერდის საქმიანობა. სიახლეების გამოსვლა შეზღუდული იქნება. თუ რამდენ ხანს გავძლებთ ასე, ამას დრო გვიჩვენებს.

მადლობა ყველას, ვინც გადაწყვიტა ჩვენთვის და მეჰმან ალიევისთვის მხარის დაჭერა“.

დაკავებამდე ორი საათით ადრე მეჰმან ალიევმა „კავკაზსკი უზელს“ ინტერვიუ მისცა.

მეჰმან ალიევმა სააგენტოს წინააღმდეგ აღძრულ სისხლის სამართლის საქმეს „დაუსაბუთებელი და მიკერძოებული“ უწოდა.

კითხვაზე – „თქვენი აზრით, ვინ დგას ამ შემოწმების უკან?“ – ალიევმა განაცხადა: „ვფიქრობ, ამის უკან გადასახადების სამინისტრო არ დგას. როგორც უკვე გითხარით, ამ შემთხვევამდე მას ჩვენს მიმართ რაიმე პრეტენზია არ ჰქონია. სისხლის სამართლის საქმის აღძვრასთან დაკავშირებით 7 აგვისტოს გადაწყვეტილება – წმინდად პოლიტიკურია. ანუ ვიღაცამ ბრძანება გასცა, რომ სისხლის სამართლის საქმე აღძრულიყო. და თან ეს გადაწყვეტილება სასწრაფოდ იქნა მიღებული, რაც ასევე იმის მანიშნებელია, რომ ეს საქმე პოლიტიკურია. გადასახადების სამინისტრო ამ ყველაფერს ასეთი უხეში ფორმით ვერ გააკეთებდა.

მეჰმან ალიევმა გაიხსენა, რომ სააგენტო „ტურანი“ არაერთგზის შეჯახებია მთავრობის მხრიდან ზეწოლას, ბოლოს ეს 2008 წლის საპრეზიდენტო არჩევნების წინ მოხდა. „ახლა ჩვენ ისევ გარდამავალ პერიოდში ვიმყოფებით – მიმდინარეობს 2018 წლის საპრეზიდენტო არჩევნებისთვის მზადება, ვიცე-პრეზიდენტობის ახალი ინსტიტუტების ჩამოყალიბება, გუნდის შიდა გადაფორმატება. ეს მომენტები იმაზე მიუთითებს, რომ ზეწოლის ამგვარი ფორმა შემთხვევით ხასიათს არ ატარებს. ჟურნალისტების დაცვის საერთაშორისო კომიტეტმა (CPJ) Turan-ს აზერბაიჯანის ერთადერთი დამოუკიდებელი საინფორმაციო სააგენტო უწოდა და ხელისუფლებას მოუწოდა შეწყვიტოს მის თანამშრომლებზე თავდასხმები. Human Rights Watch-ის ადამიანის უფლებების დამცველებმა ასევე მოუწოდეს სახელმწიფოს, რომ სააგენტოს საქმიანობაში არ ჩაერიოს.

საერთაშორისო ჟურნალისტურმა ორგანიზაციამ „რეპორტიორები საზღვრებს გარეშე“ ასევე დაგმო მეჰმან ალიევის დაკავება.

“ხელისუფლება ტურანზე ზეწოლას აძლიერებს, რადგან მას თანამშრომლობა ვერ აიძულა“, – თქვა ორგანიზაციის „რეპორტიორები საზღვრებს გარეშე“ აღმოსავლეთი ევროპისა და ცენტრალური აზიის განყოფილების ხელმძღვანელმა ოიჰენ ბირმა.

„მეჰმან ალიევი აზერბაიჯანის თანამედროვე ჟურნალისტიკის ერთ-ერთი პიონერია. მისი ერთდერთ „დანაშაული“ ისაა, რომ ქვეყნის უკანასკნელ დამოუკიდებელ მასობრივ საინფორმაციო საშუალებას ხელმძღვანელობდა. ვითხოვთ მის დაუყოვნებლივ გათავისუფლებას და Turan-ის მიმართ პოლიტიკურად მოტივირებული ყველა ბრალდების გაუქმებას“, – დასძინა მან.

„რეპორტიორები საზღვრებს გარეშე“-ს 2017 წლის პრესის თავისუფლების ინდექსში აზერბაიჯანი 180 ქვეყნიდან 162-ე ადგილზეა.