"ყველას ვაწყენინეთ, იზოლაციის საფრთხეში ვართ"- რა თქვა საქართველოს პრეზიდენტმა. მოკლედ
რა თქვა საქართველოს პრეზიდენტმა
ხელისუფლების ანტიდასავლური რიტორიკა, უმოქმედობა, შეწყვეტილი საერთაშორისო ვიზიტები, საზოგადოების შეცდომაში შეყვანა ე.წ. “მეორე ფრონტზე” აპელირებით, ევროპარლამენტარების, მეგობარი და მოკავშირე ქვეყნების განაწყენება, იზოლაციის საფრთხე – ამ საკითხებზე ისაუბრა საქართველოს პრეზიდენტმა სალომე ზურაბიშვილმა სპეციალურ ბრიფინგზე, რომელიც საქართველოს ევროკავშირში გაწევრიანების თემას ეხებოდა.
პრეზიდენტმა მკაცრად გააკრიტიკა საქართველოს ხელისუფლება. შეაჯამა მისი ვიზიტები ევროპასა და ამერიკაში და თქვა, რომ ევროკავშირის გზაზე, სადაც უკვე “ბევრი გაფუჭებული საქმეა”, ჯერ ისევ არის მცირე, მაგრამ რეალური შანსი.
რა თქვა სალომე ზურაბიშვილმა ნახევარსაათიან ბრიფინგზე – ყველა გზავნილი, მოკლედ.
- საქართველო: პროსახელისუფლებო მედია ანტიდასავლურ პროპაგანდას აძლიერებს. სკანდალური გამოკითხვა “იმედზე”
- “უკრაინა ომს აგებს. ზელენსკიმ ომი ვერ აიცილა”. ვინ დგას საქართველოში რუსული პროპაგანდის უკან
- აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
- “ჩალის ფასი”, “ფეიკი”, “ომში ჩათრევა” – ხელისუფლება ევროპარლამენტის რეზოლუციაზე
სალომე ზურაბიშვილის ბრიფინგი თბილისში, ორბელიანის სასახლეში, 14 ივნისს გაიმართა. ეს ბრიფინგი პრეზიდენტმა წინა დღეს დააანონსა. პრეზიდენტის განცხადებებს წინ უსწრებდა ევროპარლამენტის კრიტიკული რეზოლუცია და საქართველოს პრემიერის მკვეთრად ანტიდასავლური, არაერთი განცხადება.
“ბრიუსელში ბევრი გაფუჭებული საქმე დამხვდა”
სალომე ზურაბიშვილმა საუბარი ბრიუსელში გამართული ვიზიტის შეჯამებით დაიწყო.
„ბრიუსელში დამხვდა ის, რასაც უნდა დავარქვა გაფუჭებული საქმე. გასული წელს, ბათუმის ასოცირებული ტრიოს დეკლარაცია, რომელსაც ჩვენი ინიციატივით მოეწერა ხელი, იყო მნიშვნელოვანი ეტაპი. მაშინ ცხადი იყო, რომ საქართველოს მოწინავე პოზიცია ეჭირა. გაფუჭებული საქმე ჰქვია იმას, რომ ერთი წლის შემდეგ საქართველომ მოწინავე ქვეყნიდან ბოლო ადგილას გადაინაცვლა”.
პრეზიდენტმა ისაუბრა ევროპარლამენტის რეზოლუციაზე. თქვა, რომ ბიძინა ივანიშვილისთვის სანქციების დაწესების რეკომენდაცია ხელისუფლების უმოქმედობის შედეგია. მისი თქმით, ოპოზიცია ბრიუსელში საკუთარი მიზნებისთვის მუშაობდა, მთავრობას კი მისი წილი საქმე არ გაუკეთებია:“არჩია ხან დუმილი, ხან შეურაცხყოფით პასუხი სერიოზულ კითხვებზე. შედეგიც მიიღო”.
სალომე ზურაბიშვილმა თქვა ისიც, რომ ახლა მთავრობა კონსპირაციული თეორიებითა და ანტიევროპული განცხადებებით, საკუთარი დაუდევრობის გადაფარვას ცდილობს:
“დაუდევრობის გადაფარვის მცდელობაა ჩემზე გადმობრალება, ვითომ დავსვი ტოლობის ნიშნები და არა ის, რომ მმართველმა პარტიამ არაფერი გააკეთეთ იმისთვის, რომ ბიძინა ივანიშვილი ამ რიგში არ ჩაწერილიყო. თქვენ უნდა მიხედოთ ამ საკითხს“.
“ყველას ვეჩხუბებით და ვაწყენინეთ შეურაცხმყოფელი განცხადებებით”
სალომე ზურაბიშვილმა ჩამოთვალა ხელისუფლების ბოლო ერთი წლის ის გადაწყვეტილებები, რამაც, მისი აზრით, საქართველო ევროკავშირის კანდიდატის სტატუსს დააშორა.
პრეზიდენტმა გაიხსენა გასული წლის ზაფხულში, ასოცირებული ტრიოს მიერ საქართველოში, პეტრაში ხელმოწერილი დეკლარაცია. მისი აზრით, ეს დიდი ნაბიჯი იყო. ამის მერე კი აღარ გაჩერებულა დამაზიანებელი გადაწყვეტილებები:
“პირველ რიგში, შარლ მიშელის დოკუმენტის ანულირება. კაცი ჩამოვიდა 18-19 ივლისს და 28 ივლისს გამოვაცხადეთ ანულირება. შემდეგ, 5 ივლისის საქმეზე ქმედითი გადაწყვეტილებების არ მიღება. 75-მილიონიან ევროკავშირის სესხზე უარის თქმა ისე, რომ ჩვენ ეს არ გვჭირდება, რაში გვჭირდება. უარი გენპროკურორის არჩევის ახალ წესზე, რომელიც ასევე უკავშირდება შარლ მიშელს“.
პრეზიდენტმა ასევე ახსენა: სექტემბერში გავრცელებული მიყურადების ფაილები, ნოემბერში იუსტიციის საბჭოს წევრების დანიშვნა და ცესკოს თავმჯდომარის არჩევის წესის შეცვლა, უზენაეს სასამართლოში მოსამართლეების დაჩქარებული წესით დანიშვნა, დეკემბერში სახელმწიფო ინსპექტორის სამსახურის გაუქმება, გვარამიას უდროო და სასჯელის ყველაზე მძიმე ფორმით დაკავება და ბოლოს, მოსმენების კანონში ცვლილებების დაჩქარებულად შეტანა.
პრეზიდენტმა თქვა, რომ ამ დამაზიანებელ ნაბიჯებთან ერთად, მთავრობას არც უმოქმედობა დაუკლია. დიდი ხანია შეწყდა მთავრობის წევრების ვიზიტები ევროპის ქვეყნებსა და ამერიკაში, ასევე, ვიზიტები შემცირდა საქართველოშიც.
„ამავე დროს, ჩვენ ყველას ვეჩხუბებით და ვაწყენინეთ შეურაცხმყოფელი განცხადებებით. სამივე ბალტიის ქვეყანა, რომლებიც იყვნენ ჩვენი მთავარი მოკავშირეები ევროატლანტიკური ინტეგრაციის გზაზე, პოლონეთი, უკრაინა. თვითონ შარლ მიშელი, რომელიც სამჯერ ჩამოვიდა და გვევლინებოდა ინსტიტუციურ მხარდამჭერად.
გავანაწყენეთ ევროპარლამენტარები. ევროპარლამენტში ყველაზე ძლიერი პარტია… და დღეს კიდევ ვიმუქრებით, თუ არ მოგვცეს სტატუსი, ფარდას ავხდითო. არ ვიცი, რა ფარდას და როგორ ავხდით, მაგრამ, ფარდა რომ ჩვენზე ნელ-ნელა ახდილია, ეს უნდა გვადარდებდეს”.
“უკრაინასთან დაკავშირებით საქართველომ კითხვის ნიშნები გააჩინა”
სალომე ზურაბიშვილი უკრაინისა და სანქციების თემასაც შეეხო. მან თქვა, რომ მთავრობის რიტორიკის გამო უკრაინასთან დაკავშირებით კითხვის ნიშნები გაჩნდა, სანქციების თემა კი გაუგებარია:
„თან შევუერთდით, ვიცით, რომ შეერთებული ვართ და თან ვამბობთ, რომ არ ვართ. ამავე დროს ვაკრიტიკებთ სხვებს, ვისთვისაც ამ სანქციების ფასი მძიმეა. უარყოფითად ვაფასებთ სანქციებს და ვეუბნებით, უშედეგო იქნებაო”.
სალომე ზურაბიშვილმა ბევრი ისაუბრა ე.წ. “მეორე ფრონტის” თემაზე. მან თქვა, რომ ეს მანიპულირების მიზნით მოგონილი, კონსპირაციული თეორიაა:
“არც ერთი ჩვენი პარტნიორისგან არსად, არც ერთხელ, არასოდეს არანაირი მოწოდება არ ყოფილა, სად ხართ, რატომ არაა მეორე ფრონტი, რას აპირებთ, მოდით, მიიღეთ მონაწილეობაო. ეს არ არსებობს, არის მოგონილი, ტყუილი”.
“მოლდოვამ შეძლო ის, რაც ჩვენ გვიჭირს – გაჩუმება და მუშაობა”
პრეზიდენტმა თქვა, რომ პასუხი კითხვაზე – რა უნდა გაეკეთებინა საქართველოს, ადვილია:
“თუნდაც ის რაც გააკეთა მოლდოვამ. ჩვენზე მეტი არც სანქციები მიუღია და არც მოუთხოვია ვინმეს, არც მისგან და არც ჩვენგან, არც ომში ჩართვა არავის მოუთხოვია. მაგრამ მოლდოვამ შეძლო ის, რაც ჩვენ გვიჭირს. შეძლო გაჩუმება და მუშაობა ევროპის ყველა დედაქალაქში. რაც ჩვენ არ გაგვიკეთებია, ვერ კი არა, არ. ეს ყველაფერი კითხვებს აჩენს“.
ამან კი, პრეზიდენტის შეფასებით, იზოლაციის საფრთხემდე მიგვიყვანა:
” არც მეგობარი, არც მოკავშირე გვყავს, ვინც ჩვენ პოზიციას გაიზიარებს და დაიცავს. არგუმენტებიც არ მიგვიწოდებია, რითაც დაგვიცავენ. ვინც ჩვენ დასაცავად მზად იყო, ის ყველაზე უფრო დავაზიანეთ და გავანაწყენეთ.
საფრთხე ჩნდება იზოლაციის. იზოლაცია, რომელიც ჩვენს მიერ არის შექმნილი. ეს ბევრად უფრო დიდი საფრთხეა, ვიდრე ე.წ. მეორე ფრონტის შექმნილი მითი”.
ამ იზოლაციაზე პასუხისმგებლობა კი, პრეზიდენტმა ხელისუფლებას დააკისრა, მიუხედავად იმისა რაც უნდა გაეკეთებინა ოპოზიციას.
“პასუხისმგებლობა დღევანდელ სიტუაციაზე ხელისუფლებაზეა და ამას ვერავის გადაუნაწილებს, რადგან ხელისუფლება ერთია“.
“უნდა ვაჩვენოთ ერთიანობა, სხვა გამოსავალი ჩვენ არ გვაქვს”
სალომე ზურაბიშვილმა თქვა, რომ “ამ მძიმე სურათის” მიუხედავად, ჯერ ისევ დარჩა მცირე, მაგრამ რეალური შანსი. მან ახსენა ევროპარლამენტის კრიტიკული რეზოლუცია. თქვა რომ მასში არის დადებითი ჩანაწერიც. იგულისხმა ის ნაწილი, სადაც წერია, რომ საქართველოს მოსახლეობა იმსახურებს კანდიდატის სტატუსს.
პრეზიდენტმა განაცხადა, რომ ახლა, ევროკომისიის გადაწყვეტილებამდე რამდენიმე დღით ადრე, საქართველომ ერთიანობა უნდა აჩვენოს.
“ევროპარლამენტიდანაც და ევროკავშირიდანაც, მოგვდის გზავნილები, რომ ყველაფერი დაკარგული არ არის. რა უნდა გავაკეთოთ? პირველ რიგში, ის რასაც გთავაზობთ პირველი დღიდან, – ერთიანობა, სხვა გამოსავალი ჩვენ არ გვაქვს“.
პრეზიდენტმა საზოგადოებას, ხელისუფლებას, ოპოზიციას, ევროკავშირისა და ევროკავშირის წევრი ქვეყნების ელჩებს, შესთავაზა, ყველა ერთად, 16 ივნისს, ევროპის მოედანზე შეიკრიბონ:
“დავინახოთ ერთმანეთი და დავანახოთ ევროპას ჩვენი თავი, ჩვენი ერთობა, ჩვენი ნება… არც პლაკატები იქნება, არც განცხადებები. თუ ვინმეს სიმღერა უნდა, შეუძლია, იმღეროს. დანარჩენი იქნება მხოლოდ დგომა, რომ ჩვენ გვინდა ჩვენი შვილებისთვის, შემდეგი თაობისთვის ევროპა“.
სალომე ზურაბიშვილმა 20 ივნისს დაგეგმილი აქციის ორგანიზატორებს მიმართა, “თუ დაფიქრდებიან, გადადონ შეკრება, რომელიც ბევრ საფრთხეს უკავშირდება”:
“ახლა ჩემი აზრით არაა დრო პოლიტიკური ამბიციების გამოჩენის, საზოგადოების გაყოფის და გახლეჩის“, – თქვა პრეზიდენტმა. და მან იქვე ხელისუფლებას მიმართა, რომ თუ მაინც ჩატარდება აქცია, ნებისმიერი ექსცესი მისი პასუხისმგებლობა იქნება.
რას აპირებს თავად პრეზიდენტი
სალომე ზურაბიშვილმა ევროკომისიის ხელმძღვანელს ურსულა ფონ დერ ლეიენს, მიმართა გაითვალისწინოს ქართველი ხალხის ნება.
„მივმართავ ქალბატონ ურსულა ფონ დერ ლაიენს, რომელსაც აქვს გადამწყვეტი სათქმელი კომისიის გადაწყვეტილების დასრულებისთვის და მოვუწოდებ, რომ საქართველოს ხალხის ნება, იმ ხალხის, რომლის ჯარისკაცებიც გერმანელ ჯარისკაცებთან ერთად იდგნენ ავღანეთში, როცა ქალბატონი ურსულა თავდაცვის მინისტრი იყო, გაითვალისწინოს, რომ ეს ხალხი იმსახურეს მისი 30-წლიანი და მეტი გავლილი გზის აღიარებას და ეს დღე დგება ახლა“.
მან ასევე თქვა, რომ წერილით მიმართავს ევროკავშირის წევრი 27-ვე ქვეყნის მეთაურს:
“და წარვუდგენ ყველა პოლიტიკურ, მორალურ და სტრატეგიულ არგუმენტს, თუ რატომ იმსახურებს საქართველო ამ ისტორიულ გადაწყვეტილებას და მისი დატოვება გზის მიღმა შეიძლება საბედისწერო შეცდომა იყოს“.
სალომე ზურაბიშვილმა ღიად მიმართა ხელისუფლებასაც, რომელსაც მისი ნათქვამი ბევრი რამ არ მოეწონება, “გაითვალისწინოს მოსახლეობის ურყევი, 30-წლიანი თუ არა 30-საუკუნოვანი მისწრაფება და ანტიევროპული რიტორიკისგან, როგორც არასაჭირო ნაბიჯებისგან თავი შეიკავოს”.
ოპოზიციას მოუწოდა თავი შეიკავოს დესტრუქციული ინფორმაციის გავრცელებისგან.
“დღეს სხვანაირად დგას საკითხი, ვინც იქნება პასუხისმგებელი იმაზე, რომ საქართველოს ახალ საფეხურზე აიყვანს, ის დაიმსახურებს ხალხის მადლიერებას და პოლიტიკური მომავლის გამყარებას.
დიდი იმედი მაქვს, რომ ყველანი ერთად ვიდგებით უმნიშვნელოვანეს გზაზე. მე ამ გზისთვის ჩამოვედი საქართველოში, ამ გზის გამო წავიდნენ ჩემი წინაპრები და მიზანი ის კი არ არის, რომ მეტი ქართველი წავიდეს ევროპაში, ან როგორც ზოგი ოცნებობს მეც გადავდგე და წავიდე პარიზში. მიზანია ყველამ ერთად ვიცხოვროთ იმ ოცნების საქართველოში, რომელიც იქნება ევროპულიც და ძალიან ქართულიც“, – განაცხადა პრეზიდენტმა.
რა თქვა საქართველოს პრეზიდენტმა
