როგორ ცხოვრობს ერთადერთი მუნიციპალიტეტი, სადაც არჩევნები ოპოზიციამ მოიგო. რეპორტაჟი წალენჯიხიდან
წალენჯიხა – პატარა მუნიციპალიტეტი დასავლეთ საქართველოში, 2021 წლის ადგილობრივი თვითმმართველობის არჩევნების შემდეგ, გამონაკლის ადგილად იქცა.
ეს ერთადერთი თვითმმართველი თემია, საქართველოს 64 მუნიციპალიტეტს შორის, სადაც არჩევნები ოპოზიციამ მოიგო.
ამ დრომდე, 2014 წლიდან, საქართველოში ყველა მუნიციპალიტეტსა და ქალაქს მმართველი პარტია, ოლიგარქ ბიძინა ივანიშვილის “ქართული ოცნება” მართავდა.
წალენჯიხა დასავლეთ საქართველოში, სამეგრელოს რეგიონში მდებარეობს, ოკუპირებული აფხაზეთის საზღვართან რამდენიმე კილომეტრში. ამ მუნიციპალიტეტში ოცი ათასზე ოდნავ მეტი ადამიანი ცხოვრობს და საქართველოს სხვა პატარა რაიონებისგან არაფრით გამოირჩევა.
წალენჯიხის საარჩევნო შედეგს საქართველოში დიდი რეზონანსი მოჰყვა.
ეს ფაქტი იქცა მიმებისა და ხუმრობის თემად სოციალურ ქსელში – ბევრი წერდა, რომ თავისუფლების საძიებლად წალენჯიხაში გადადის, ზოგმა თქვა, რომ ეძებდა ფესვებს “წალენჯიხის მწვანე ბარათის მისაღებად.”
იყვნენ ისეთებიც, ვინც სერიოზულად დაფიქრდა წალენჯიხაში უძრავი ქონების – სახლის ან მიწის შეძენაზე. რამდენიმე გავლენინამა მეწარმემ კი თქვა, რომ მზად არის წალენჯიხაში ინვესტიცია ჩადოს.
ოპოზიცია ფიქრობს, რომ წალენჯიხა პოლიტიკური ფრონტის წინახაზი და სხვა მუნიციპალიტეტებისთვის მაგალითი უნდა გახდეს.
JAMnews- ი ჩავიდა ამ პატარა ქალაქში, რომ ენახა, როგორ ცხოვრობს აქ ხალხი, რატომ აღმოჩნდა ასეთი განსხვავებული ქვეყნის საარჩევნო რუკაზე და რა შანსი აქვს განვითარებისთვის.
დეკემბრის ბოლოა, ცივა და წვიმს. წალენჯიხისკენ გზას ზუგდიდიდან მივუყვებით.
გზა ძველია, დანგრეული, ორმოებით სავსე. გზის ორივე მხარეს ლამაზი, დიდი მეგრული სახლებია ჩამწკრივებული, მოვლილი ეზოებით.
რაღაც პერიოდის შემდეგ მუქი შავი, ახლადდაგებული ასფალტის გზა იწყება. წალენჯიხაში შევდივართ. აბრა იუწყება, რომ ეს გზა საავტომობილო გზების დეპარტამენტმა მოაწესრიგა.
ქალაქის ცენტრში დიდი, ახალი, წითელი ბაფთებით მორთული ნაძვის ხე დგას.
„ეს კოკა – კოლას საჩუქარია. რამდენიმე დღის წინ აინთო საზეიმოდ“, – გვეუბნება ბექა ჩაჩიბაია, ჩვენი მასპინძელი, რომელიც წალენჯიხის ცენტრში შეგვხვდა.
ბექა ადგილობრივია. 36 წლის. რამდენიმე წელი პოლონეთში იმუშავა. ამბობს, რომ იქ ძალიან მძიმე სამუშაო პირობები იყო, ამიტომ ვერ გაუძლო და დაბრუნდა.
ევროპაში წალენჯიხიდან ბევრია წასული.
„ახალგაზრდა ბიჭები უმეტესად პოლონეთში დადიან, გერმანიაშიც არიან, თურქეთშიც, ოღონდ სეზონურად – უფრო ზაფხულის თვეებში როცა არის კონკრეტული ფიზიკური სამუშაო. მიდიან სამი თვით და მერე ფიქრობენ იქ დარჩენაზე“, – მიყვება ირაკლი ხარჩილავა, წალენჯიხის მერის წარმომადგენელი ქალაქ ჯვარში.
რატომ მისცა უმრავლესობამ ხმა ოპოზიციას? – ვეკითხები ახალდანიშნულ, უპარტიო რწმუნებულს, თან ვაზუსტებ, მერის ნათესავი ხომ არ არის, მპასუხობს, რომ უბრალოდ მოგვარეები არიან.
ირაკლი ხარჩილავა ამბობს, რომ წალენჯიხა ყოველთვის იყო ოპოზიციური. მაგრამ ამას კიდევ რამდენიმე ფაქტორი დაემატა: ხელისუფლების უყურადღებობა, უკიდურესი გაჭირვება.
წალენჯიხაში ამბობენ იმასაც, რომ ამ არჩევნებში ხელისუფლება საეჭვო რეპუტაციის ადამიანებს გაურიგდა და ხალხზე ზეგავლენას მათი საშუალებით ცდილობდა – ზეწოლით, მოსყიდვითა და დაშინებით. ამას უკურეაქცია მოჰყვა.
„თითქოს ჩვენი რაიონი საქართველოს რუკიდან წაიშალა, არ არსებობდა. ხალხი ხედავდა, რომ ჭაობში იძირებოდა და გამოსავალი არ ჩანდა. მიხვდნენ, რომ ცვლილებები აუცილებელი იყო“, – მეუბნება ადგილობრივი ლევან ბელქანია.
წალენჯიხაში მცხოვრებლებისთვის შემოსავლის წყარო ან თხილისა და მოცვის მეურნეობაა, ან ვაჭრობა. ადგილობრივი თვითმმართველობისა და სკოლა – ბაღების გარდა, სხვა სამუშაო ადგილი აქ არ არის.
ენგურჰესზე, რომელიც წალენჯიხის მუნიციპალიტეტში მდებარეობს, მოსახლეობის მცირე ნაწილია დასაქმებული
“ორი მაღაზია მაქვს, მაგრამ ვერ ვწვდები ხარჯებს. რვა სული ვართ ოჯახში, ყველას ხომ უნდა საჭმელ-სასმელი. ჩემი შვილები მეხმარებიან, ერთი იტალიაშია, მეორე რუსეთში. აქ მარტო ვაჭრობაა, სხვა შემოსავალი არ აქვს ხალხს“, – მეუბნება მაია გაბედავა.
მაიას წალენჯიხის ბაზარში წვრილმანებისა და აქსესუარების პატარა ჯიხური აქვს. ზამთრის სუსხისგან თავს ჯიხურის კარზე ჩამოფარებული, შუაზე გაჭრილი სქელი ცელოფნით იცავს.
წალენჯიხის ბაზარი არაფრით განსხვავდება საქართველოს სხვა პატარა ქალაქების მოუვლელი ბაზრებისგან. პროდუქტები აქაც შუა ქუჩაში, ღია ცის ქვეშ იყიდება, ხილის ყუთები პირდაპირ ძირზე, ტალახში აწყვია, ხალხი და მანქანები ერთმანეთში ირევა, გზა დანგრეულია, ორმოები წვიმის წყლითაა სავსე.
ოპოზიციონერი მერის მოგებას წალენჯიხაში მერის პიროვნულ ფაქტორსაც მიაწერენ. ის რომ, გიორგი ხარჩილავა ადგილობრივია, აქაურებისთვის მნიშვნელოვანი დეტალია.
- ფოთი – ღარიბი მდიდარი ქალაქი საქართველოში
- ანაკლია – შავი ზღვის მარგალიტი, რომელიც პოლიტიკის მძევალი გახდა
- პოლიტიკური სასამართლო, ზეწოლა მედიაზე, კორუფცია – საქართველო Freedom House-ის ანგარიშში
“გაყალბების მიუხედავად, გავიმარჯვეთ”
წალენჯიხის ახალი მერი, გიორგი ხარჩილავა ყველაზე დიდი ოპოზიციური პარტიის, „ერთიანი ნაციონალური მოძრაობის“ წევრია.
ამ არჩევნებამდე მას სამეგრელოს მიღმა არავინ იცნობდა. დღეს ხარჩილავა ცენტრალური არხების ტოქშოუების ხშირი სტუმარია.
ორშაბათი დილაა, ისევ წვიმს. წალენჯიხის მერიის ეზო მანქანებითაა სავსე.
მერია ძველი, ნავთის სუნით გაჟღენთილი, საბჭოთა დროის შენობაა. მერის კაბინეტის მისაღები ხალხითაა სავსე. გიორგი ხარჩილავას მერიის თანამშრომლებთან ერთად რიგითი მცხოვრებლებიც ელოდებიან. ყველა ნერვულად დადის და მერთან შესვლას ჩქარობს. უმეტესად ყველა რაღაც დახმარებას ითხოვს.
წინა დღეს წალენჯიხის სოფლებში წვიმამ გზები დაანგრია, ერთგან ხანძარიც იყო. მერი ამბობს, რომ დღეს ბევრი საქმე აქვს – ხალხის მიღებაც უნდა მოასწროს, დანგრეული გზის ნახვაც და ნახანძრალი ოჯახების მონახულებაც.
მერის კაბინეტი დიდი ოთახია. სამუშაო მაგიდასთან ტყავის მაღალსაზურგიანი სავარძელი დგას, უკან საქართველოსა და ევროკავშირის დროშებით. მაგიდაზე ბევრი საკანცელარიო ნივთია.
ოპოზიციონერი მერი შუა ოთახში უხერხულად იშმუშნება.
51 წლის გიორგი ხარჩილავა ადგილობრივია, წალენჯიხაში დაბადებული და გაზრდილი. ცოლი და სამი შვილი ჰყავს.
პოლიტიკაში ეს მისი პირველი ნაბიჯი არ არის. ერთხელ, წინა ხელისუფლების პერიოდში, უკვე იყო წალენჯიხის საკრებულოს თავმჯდომარე.
2021 წლის წალენჯიხის მერის არჩევნებში მისი მთავარი კონკურენტი, მმართველი პარტიის კანდიდატი გოგა გულორდავა იყო. პირველ ტურში კონკურენტს 207 ხმით მოუგო, მეორე ტურში კი – 311-ით, – ხარჩილავამ ამომრჩეველთა ხმების 51.09 პროცენტი, გულორდავამ კი 48.9 პროცენტი მიიღო.
ხარჩილავა ამბობს, რომ წალენჯიხაში ხელისუფლებამ ამომრჩეველზე ზეწოლის ყველა მეთოდი გამოიყენა – დაშინება, მოსყიდვა, გაყალბება:
„წინასაარჩევნოდ მაჟორიტარობის ოთხმა კანდიდატმა მოიხსნა კანდიდატურა, ოთხივე პედაგოგი იყო. მუშაობდა სისტემა, რეჟიმი. აქაც გაყალბდა არჩევნები, მაგრამ, ზღვარი არსებობს გაყალბებაშიც და ჩვენ ამ ზედა ზღვარზე გავიარეთ. რომ არა ეს გაყალბება, 70 პროცენტსაც ავიღებდით“.
როგორ მოიგეთ არჩევნები? – ვეკითხები წალენჯიხის მერს.
„წალენჯიხას ისტორიული კონტექსტები აქვს და ეს კონტექსტები დროში მეორდება. 90-იან წლებში, ეროვნული მოძრაობა, 2003-ში „ვარდების რევოლუციაც“ აქედან დაიწყო. შემდეგ რეფორმების წლები იყო. ადამიანების კრიტიკული განწყობები არასოდეს განელებულა. მითუმეტეს ახლა, ყველა აცნობიერებს, რომ რეალურად ჩვენ ჩრდილოელ მეზობელთან ვართ ბრძოლაში.
ჩემი ბიოგრაფიაც, ამ ქალაქთან ეგზისტენციალური მოტივებით ვარ დაკავშირებული ახალგაზრდობიდან – საგანმანათლებლო საქმიანობა, სპორტული საქმიანობა“, – მპასუხობს გიორგი ხარჩილავა.
პირველი კრიზისი
არჩევნებიდან ორი თვის თავზე, წალენჯიხაში ის მუხტი არ არის, როგორიც საქართველოს დედაქალაქიდან მოჩანს. გამარჯვების ეიფორია და ემოციები ჩამცხრალია.
კამერებთან ღიად საუბარს ბევრი ერიდება. პირად საუბრებში ზოგი ამბობს, რომ მიუხედავად იმისა, რომ ოპოზიციას დაუჭირა მხარი, პრობლემები აღარ სურს და საჯაროდ აღარ ილაპარაკებს. აქ ამბობენ, რომ ოპოზიციის მომავალი წალენჯიხაში ისევ ბუნდოვანი გახდა, „ვინ იქნება ხვალ სათავეში“, არავინ იცის.
ოპოზიციურ თემში პირველი კრიზისი უკვე სახეზეა – წალენჯიხის საკრებულოს დღემდე არ აურჩევია თავმჯდომარე. საკრებულოს სხდომა, რომელზეც თავმჯდომარე უნდა აერჩიათ, ოთხჯერ გადაიდო. მეოთხე უშედეგო მცდელობა 23 დეკემბერს იყო.
საქმე იმაშია, რომ წალენჯიხის საკრებულოში, სადაც 27 დეპუტატია, უმრავლესობა არცერთ პარტიას არ აქვს: 11 დეპუტატი მმართველი პარტია, “ქართული ოცნებიდანაა” არჩეული, ამდენივე “ერთიანი ნაციონალური მოძრაობიდან, სამი დეპუტატი ყოფილი პრემიერის გიორგი გახარიას პარტიას წარმოადგენს – “გახარია საქართველოსთვის”, ერთი დეპუტატი ჰყავს ოპოზიციურ პარტიას “ლელო” და ერთიც ახლა დამოუკიდებელი დეპუტატია, თუმცა, ის საკრებულოში გახარიას პარტიიდან მოხვდა. ის სულ ცოტა ხნის წინ გაემიჯნა პარტიას.
ფაქტობრივად, ძალთა ბალანსი თანაბარია – 12 ოპოზიცია ( 11 ენმ +1 ლელო), 12 ხელისუფლება (ქართული ოცნება + 1 დამოუკიდებელი დეპუტატი). გადამწყვეტი ყოფილი პრემიერის, გიორგი გახარიას პარტიის წარმომადგენელი სამი დეპუტატის ხმაა.
„ერთიანი ნაციონალური მოძრაობა“ პარტიას „გახარია საქართველოსთვის“ სთავაზობს საკრებულოს თავმჯდომარის პოზიციაზე თავიანთი კანდიდატი წამოაყენონ. მაგრამ, მეოთხე სხდომაა თავმჯდომარეობის კანდიდატს არცერთი პარტია არ ასახელებს.
- რა იმალება ვარდისფერი ფლამინგოს უკან? რეპორტაჟი დენდროლოგიური პარკიდან
- ოლიგარქის სოფელი. როგორ ცხოვრობენ ჭორვილაში დღეს? რეპორტაჟი
- დიდი ხეები – მილიარდერის უკანასკნელი ცდუნება
ირაკლი ხარჩილავა დარწმუნებულია, რომ ეს ხელოვნურად გაჭიანურებული პროცესია, რადგან ხელისუფლებას ამ ერთი მუნიციპალიტეტის დათმობაც არ უნდა ოპოზიციისთვის და აქ ხელახალი არჩევნების დანიშვნას ცდილობს:
„ხელისუფლება ვერ ეგუება იმას, რაც აქ მოხდა. რამდენადაც წალენჯიხა ჩვენთვის გამარჯვების ადგილი და მოტივაციის მიმცემია სხვა მუნიციპალიტეტებისთვის, იმდენად შიშის ფაქტორია „ქართული ოცნებისთვის“ – ადგილი, საიდანაც შეიძლება ცვლილება დაიწყოს“, – ამბობს ხარჩილავა.
ვინც და რაც არ უნდა იდგეს პროცესის უკან, ფაქტი რჩება ფაქტად – მუნიციპალიტეტში, რომელიც ლამის მთავარი პოლიტიკური ცენტრი უნდა გამხდარიყო, პროცესები გაყინულია – ადგილობრივ საკრებულოს არ ჰყავს თავმჯდომარე, შესაბამისად, მუნიციპალიტეტს არ აქვს 2022 წლის ბიუჯეტი, გაჩერებულია სხვა პროცესებიც.
წალენჯიხაში არც ცენტრალურ ოპოზიცია აქტიურობს – ეს ქალაქი დღის წესრიგიდან გაქრა. მთავარი ოპოზიციური ძალა პატიმრობაში მყოფი მიხეილ სააკაშვილის ფიგურის გარშემოა კონცენტრირებული.
„პროცესი წინ ვერ მიდის და საკრებულოები სხვა საკითხების გამხილვაზე ვერ გადადიან. ამან თითოეულ შემთხვევაში შეიძლება გამოიწვიოს მუნიციპალური მასშტაბის კრიზისი, ეს კი პირველ რიგში კონსენსუსზე დაფუძნებული მმართველობის იდეას ურტყამს“, – ამბობს საქართველოს ახალგაზრდა იურისტთა ასოციაციის „დემოკრატიული ინსტიტუტების მხარდაჭერის“ პროგრამის დირექტორი ვახუშტი მენაბდე.
ექსპერტი თვითმმართველობის საკითხებში, ირაკლი მელაშვილი გვეუბნება, რომ თუ ეს კრიზისი გაგრძელდა და სამ თვეში ბიუჯეტი ვერ დამტკიცდა, ხელისუფლება წალენჯიხაში საკრებულოს რიგგარეშე არჩევნებს დაინიშნავს:
„და, მე ეჭვი მეპარება, რომ ეს ოპოზიციისთვის მომგებიანი ვარიანტი იყოს, თუნდაც, იგივე გახარიასთვის“, – ამბობს მელაშვილი.
მისი თქმით, გამოსავალი მოლაპარაკებაა, საკრებულოების ევროპული მოდელი, როდესაც- თანამდებობები მიღებული ხმების მიხედვით ნაწილდება:
„არა ერთ, გამარჯვებულ პარტიას მიაქვს ყველა მანდატი, არამედ ნაწილდება იმის მიხედვით, ვინ რამდენი პროცენტი მიიღო. ვიღაცას თუ მაგალითად ხმების 30 პროცენტი აქვს მიღებული, თანამდებობების 1/3 შეხვდება. შემდეგ ეს თანამდებობის პირები კონკურენციაში არიან ერთმანეთთან, ცდილობენ მოსახლეობას აჩვენონ, ვინ უკეთ აკეთებს საქმეს. მაგრამ, ეს ქართულ პოლიტიკაში არ ხდება“.
თქვენ რა დათმობისთვის ხართ მზად, რომ ეს კრიზისი დაძლიოთ? – ვეკითხები წალენჯიხის მერს.
„დათმობა ხომ არის სამ დეპუტატს რომ თავმჯდომარეობის კანდიდატზე თანხმობას უცხადებს 11 დეპუტატი?! ხომ არის დათმობა?! წაგებული „ოცნება“ ცდილობს, რომ დამარცხებული არჩევნები გაიფორმოს, საკრებულოში თავმჯდომარეობის და კომისიებში უმრავლესობის ამბიცია აქვს და მე ვკითხულობ რატომ? საიდან?“ – მპასუხობს მერი.
“წალენჯიხის მეგობრების კლუბი” და შანსები განვითარებისთვის
ვიდრე საკრებულოს კრიზისი დაიძლევა, გიორგი ხარჩილავა დროს არ კარგავს. ხშირად არის დედაქალაქში და იმ ადამიანებს ხვდება, ვინც მზად არის წალენჯიხის განვითარებაში წვლილი შეიტანოს.
ხარჩილავა ამ ხალხს მეგობართა კლუბში აერთიანებს. სია უკვე შთამბეჭდავია.
საერთაშორისო ორგანიზაციამ აღმოსავლეთ ევროპის ცენტრი მრავალპარტიული დემოკრატიისთვის (EECMD) წალენჯიხაში უკვე გახსნა ახალი ოფისი – დემოკრატიის ჰაბი.
ორგანიზაცია ადგილობრივების პოლიტიკურ განათლებასა და თვითმმართველობის ეფექტურობის გაუმჯობესებაზე იმუშავებს.
წალენჯიხაში საგანმანათლებლო და კულტურულ საქმიანობას დააფინანსებს ტელეკომპანია „ფორმულა“. ტელევიზია ახალგაზრდებისთვის მედია ჰაბს ხსნის, ტერენტი გრანელის მუზეუმისთვის პოეტის ნახატების დაბეჭდვას აპირებს და ქალაქ ჯვარში სტადიონის საფარს აახლებს. შეთანხმება უკვე ხელმოწერილია. სტადიონზე აზომვითი სამუშაოებიც ჩატარდა.
ამ სტადიონზე პატრონაჟს შემდეგ კომპანია „კოკა – კოლა ბოთლერს ჯორჯია“ აიღებს. მისგან პირველი საჩუქარი, ახალი ნაძვისხის სახით, წალენჯიხამ უკვე მიიღო.
წალენჯიხაში გეგმები აქვს „ვითიბი ბანკის“ დამფუძნებელს მამუკა ხაზარაძეს. ხაზარაძე იყო პირველი, ვინც არჩევნების შედეგების შემდეგ თქვა, რომ წალენჯიხაში სახლს იყიდის და საცხოვრებლად გადავა.
ინვესტორების მოზიდვის გარდა, გიორგი ხარჩილავას გეგმებშია წალენჯიხა საქართველოს ტურისტულ რუკაზე გაჩნდეს.
ფოტო: დავით ფიფია/JAMnews
მხარის ამ პოტენციალზე ადგილობრივებიც საუბრობენ.
„ათასობით ადამიანი ზაფხულში ყოველ დღე გადის ქალაქ ჯვარს და მიემართება მესტიისკენ ისე, რომ ბევრი მათგანი ერთ თეთრსაც კი არ ხარჯავს აქ. ეს იმითაა გამოწვეული, რომ წალენჯიხაში ელემენტარული პირობები არ არის, გზები არ არის, რომ ტურისტი რაიმე ობიექტამდე მივიდეს“, – მეუბნება ლევან გობეჩია.
ლევანი ქალაქ ჯვარში ცხოვრობს და ტურისტულ სააგენტოს ამუშავებს. ამბობს, რომ ამ მუნიციპალიტეტს აქვს შესაძლებლობა ველოტურიზმი და კულინარული ტურიზმი განავითაროს, ჯომარდობის ადგილად იქცეს.
მისი აზრით, ინფრასტრუქტურის მოწესრიგების გარდა, ხელისუფლებამ ტურისტულ სექტორს ხელსაყრელი პირობები უნდა შესთავაზოს და უსაფრთხოების გარანტიები მისცეს.
„წალენჯიხა ახლა ყველას ყურადღების ცენტრშია. ახლა გვაქვს შასნი, რომ ეს ცნობადობა გამოვიყენოთ და ტურისტული ადგილები გავაპიაროთ“, – მეუბნება ჩემი კიდევ ერთი წალენჯიხელი რესპონდენტი ლევან კვარაცხელია.
წალენჯიხა თვითონაც მდიდარია ტურისტული მარშრუტებით აქ გადის, საქართველოს მაღალმთიანეთის, ერთ-ერთ ყველაზე გამორჩეულ, ტობოვარჩიხალის ტბამდე მისასვლელი გზა.
წლის განმავლობაში ტობოვარჩხილს ათასობით ადამიანი სტუმრობს. წალენჯიხაში ფიქრობენ, რომ ეს შესაძლებლობები უნდა გამოიყენონ.
წალენჯიხის ფაქტორი – ქართული ოპოზიციის წარმატების გზა?
ექსპერტები ფიქრობენ, რომ საქართველოში არსებული პოლიტიკური ვითარებისა და პერმანენტული პოლიტიკური კრიზისის გათვალისწინებით, წალენჯიხა პოლიტიკური ბრძოლის მთავარი ობიექტი უნდა გახდეს, როგორც ხელისუფლების, ასევე ოპოზიციისთვის.
„ეროვნული დონის ხელისუფლებას აქვს ინტერესი, რომ წალენჯიხაში არ გაამართლოს ოპოზიციონერმა მერმა, ამიტომ, ამ მმართველობას პრობლემებს შეუქმნის. ოპოზიციისთვის კი ეს ტესტია – მან უნდა აჩვენოს, რომ ის მხოლოდ პროტესტის ძალა კი არ არის, კონსტრუქციული მმართველობის უნარის მქონე ძალაა“ , – ამბობს პოლიტოლოგი გია ნოდია.
მისი აზრით, ახლა წალენჯიხის ოპოზიციონერ მერს მხარდაჭერა სჭირდება:
„თუნდაც ის, რომ ყურადღების ცენტრში იყოს, ნებისმიერი დარღვევა თუ შევიწროება რომელიც იქნება მის მიმართ. ამას უნდა აკეთებდეს პირველ რიგში ბუნებრივია „ნაციონალური მოძრაობა“, რომლის წარმომადგენელიცაა მერი, მაგრამ ეს არის ობიექტურად ყველა პოლიტიკურ-ოპოზიციური ძალის ინტერესი“.
ოპოზიციური ძალები კი ამ ინტერესს არ იჩენენ. მათი დღის წესრიგიდან წალენჯიხა გაქრა.
JAMnews -ი თითქმის სამი კვირის განმავლობაში ცდილობდა „ერთიანი ნაციონალური მოძრაობიდან“ მოესმინა, რა გეგმები აქვთ წალენჯიხასათან დაკავშირებით, თუმცა უშედეგოდ.
ზოგმა ოპოზიციურმა პარტიამ პირდაპირ გვითხრა, რომ ახლა ამ საკითხზე საუბარი არ სურთ.
ამასობაში, ექსპრეზიდენტ მიხეილ სააკაშვილის პატიმრობიდან გათავისუფლების მოთხოვნით, ოპოზიციამ მასობრივი შიმშილობის აქცია დაიწყო და ჩვენი დაჟინებული მცდელობა, წალენჯიხაზე საუბრის, უხერხულადაც კი მიიჩნიეს.
„ოპოზიცია აცდენილია ცხოვრებას, ეს ფაქტია. ახლა ფრონტის მთავარი ხაზი გადის, მიშა [მიხეილ სააკაშვილი] ციხეში იჯდება თუ გარეთ იქნება. მათ დიდი ხანია დაივიწყეს წალენჯიხა. ჩვენს ოპოზიციას ძალიან უყვარს დაპირებები, მაგრამ საქმეში ამის კონვერტირება ეზარება“, – ამბობს კიდევ ერთი ექსპერტი გია ხუხაშვილი.
ბორის ყურუას, პარტიიდან „გირჩი – მეტი თავისუფლება“, რომელიც ალბათ ერთადერთი იყო, ვინც ამ თემაზე საუბარს განსაკუთრებული ძალისხმევის გარეშე დასთანხმდა, ვკითხეთ, აქვს თუ არა ახლა ოპოზიციას რაიმე სტრატეგია წალენჯიხასთან დაკავშირებით.
დაგვიდასტურა, რომ ახლა ეს საკითხი დღის წესრიგში არ დგას. ყურუას არ აქვს ეპოქალური ცვლილებების მოლოდინი წალენჯიხაში.
„მაგრამ, ჩვენ შეგვიძლია ვაჩვენოთ, რომ თანამშრომლობა მუშაობს“, – მეუბნება „გირჩი – მეტი თავისუფლების“ წევრი და ამატებს, რომ კარგი იქნება ოპოზიციამ მერს დასახმარებლად საკონსულტაციო ორგანო შეუქმნას
ბოლო არჩევნებზე ხელისუფლების მართვის კოალიციური მოდელი ოპოზიციის ნაწილის მთავარი აქცენტი იყო.
გიორგი ხარჩილავას ორი მოადგილე ჰყავს, პირველი მოადგილე – ლაშა ზარქუა, უპარტიოა, მეორე მოადგილე თამარ ბელქანია კი პარტია „ლელოს“ წევრი. არჩევნების პირველ ტურში ბელქანია ხარჩილავას კონკურენტი იყო. მან ამომრჩეველთა ხმების 3% მიიღო.
ახლა ოპოზიციამ უნდა აჩვენოს, რომ ეს მოდელი მუშაობს და მერე ეს მოდელი მთელი საქართველოს მასშტაბით გამოიყენოს.
„თუ წალენჯიხაში ვერაფერი მოახერხეს, ეს ამომრჩევლისთვის დიდი იმედგაცრუება და ოპოზიციის ჩამოშლის დასაწყისი იქნება“, – ამბობს გია ხუხაშვილი.
ფოტო: დავით ფიფია/JAMnews
იმედი
ერთადერთი მუნიციპალიტეტი ხართ, ვინც ოპოზიციონერი მერი აირჩია. ყველას ყურადღება ახლა წალენჯიხისკენაა, თქვენ რა მოლოდინი გაქვთ? – ვეკითხები წალენჯიხელ მარინა ალასანიას:
„თუ ეს მერი დარჩა გამოვა რაღაცა, კი. ეს კარგი, ენერგიული ბიჭია და რაღაცას გააკეთებს ხალხისთვის. მე ასეთი რწმენა მაქვს და სხვისი რწმენა არ ვიცი“.
„მერს ხალხი თუ ამოუდგა გვერდში და ზემოდანაც მისცეს უფლება, ყველაფერი გამოუვა“, – მეუბნება მაია გაბედავა.
“ზემოდან” მერს უკვე უთხრეს, რომ ხელისუფლების დახმარების გარეშე ვერაფერს შეძლებს.
„არჩევნების წინ პრემიერმა ღარიბაშვილმა ფაქტობრივად დააშინა ამომრჩეველი, რომ აი, თუ აირჩევთ ოპოზიციურ მერს, მას ცუდად ექნება საქმე, ჩვენს გარეშე ვერაფერს გააკეთებს. შედეგების შემდეგ თითქოს შეარბილა რიტორიკა, მაგრამ პრობლემა რჩება. არ უნდა ელოდოს ოპოზიციონერი მერი კარგ მოპყრობას ხელისუფლებისგან, რადგან ხელისუფლება მას პოლიტიკურ საფრთხედ აღიქვამს“, – მეუბნება გია ნოდია.
„მარტივი ამბებისთვის არც არჩევნებში გვიყრია კენჭი. ვიცოდით სად მოვდიოდით“, – ამბობს გიორგი ხარჩილავა, მაგრამ მისი საუბარი აღარ არის ისეთი ომახიანი, როგორც ეს ინვესტიციებსა თუ წალენჯიხის მეგობრებზე საუბრისას იყო.
ირაკლი მელაშვილი საკითხს უფრო პრაგმატულად უყურებს. მისი თქმით, თვითმმართველობის მოქმედი კოდექსის პირობებში, წალენჯიხის მერი ბიუჯეტს ვერ გაზრდის:
„მისი ბიუჯეტი ცენტრალურ ბიუჯეტზეა დამოკიდებული, ის ვერ მოიმატებს. წალენჯიხაში ილონ მასკმაც რომ ააშენოს ქარხანა, ბიუჯეტში ბევრი არაფერი არ შევა [რადგან მოგების გადასახადი მუნიციპალიტეტებიდან ცენტრალურ ბიუჯეტში მიდის_ JAMnews]. ამიტომ, ოპოზიციის აღტკინებული განცხადებები ცოტა დემაგოგოიას ჰგავს“
ამიტომ, მისი თქმით, წალენჯიხის მერმა კარგი მმართველობის მაგალითი უნდა აჩვენოს:
„და მოქალაქეების მაქსიმალური ჩართულობის თვითმმართველობის მუშაობაში. ამ კუთხით მერს ბევრი კარგი რამის გაკეთება შეუძლია და კარგი მაგალითის მიცემა მუნიციპალიტეტებისთვის“.
გია ნოდია შიშობს, რომ წალენჯიხის მერს შედეგების დადება გაუჭირდება:
„კი, ჩვენ წალენჯიხის მოდელს ვუყურებთ როგორც პრეცედენტს დემოკრატიისთვის, მაგრამ რიგითი ადამიანები ასე არ უყურებენ, ისინი ელოდებიან იმ შედეგებს, რაც მათ ცხოვრებას უნდა დაეტყოს. ამ თვალსაზრისით, ოპოზიციონერ მერს, რომელიც ბრძოლაშია ცენტრალურ ხელისუფლებასთან, გაუჭირდება შედეგზე გასვლა“.
ხალხი რომ ამ შედეგს ელის, ამას ადგილზეც გრძნობენ:
„ხალხში მუხტი შენელებულია, მაგრამ ეს ნორმალურია, ხალხი მომთხოვნია, სწრაფ შედეგს ელის, არჩევნებიდან კი ჯერ არც ისე დიდი დროა გასული“, – მეუბნება ადგილობრივი ლევან კვარაცხელია.
ხალხის განწყობებს უკვე შეეპარა ნიჰილიზმი. თქვენ როგორ ფიქრობთ, რა გამოუვა წალენჯიხის ოპოზიციონერ მერს, რომელსაც დიდი ტვირთი და რთული გზა აქვს? – ვეკითხები გიორგი ხარჩილავას.
მერი სევდიანდება, რამდენჯერმე მიბრუნებს კითხვას, რატომ მომეჩვენა ხალხი იმედგაცრუებული და ფიქრის შემდეგ მპასუხობს:
„წინასაარჩევნოდ ამაზე ფიქრიც წარმოუდგენელი იყო, – ასეთი შედეგი რომ დადგებოდა და ამ რეალობასთან მოგვიხდებოდა შეხვედრა. მაგრამ ამ არჩევანის უკან ისეთი ადამიანები დგანან, ისეთი ერთგულები, ისეთი წლები გამოიარეს, მე სხვა გზა არ მაქვს.
იმაზე მეტი უნდა შევძლო, ვიდრე შემიძლია. პირველი კოალიციური მოდელი ყალიბდება და ამან უნდა გაამართლოს, რომ შემდეგ გადამდები გახდეს.
ამიტომ გამოუვა!”
“მედიაქსელის” მხარდაჭერით
