ვოლსკი-ხიდაშელის შეხვედრა. საუბრის მთავარი თემა ოკუპირებულ აფხაზეთთან ურთიერთობების აღდგენა იყო
ვოლსკი-ხიდაშელის შეხვედრა
საქართველოს პარლამენტის პირველი ვიცე-სპიკერი, გია ვოლსკი პარლამენტის შენობასთან მდებარე კაფე „მელოგრანოში“ შეხვდა კრამლთან დაახლოებულ ბიზნესმენს, დავით ხიდაშელს.
ამ შეხვედრის შესახებ ცნობილი გახდა ელენე ხოშტარიას ოპოზიციური პარტიის “დროას” წევრების, ნათია ლეთოდიანის და ზურა სარჯველაძის მიერ გავრცელებული ინფორმაციიდან. ლეთოდიანი და სარჯველაძე ასევე იმყოფებოდნენ კაფეში და შეესწრნენ შეხვედრას. მათ საუბრის დეტალებიც მოისმინეს და ფეისბუკზე ვოლსკის და ხიდაშელის ფოტოც გაავრცელეს.
საუბრის მთავარი თემა ოკუპირებულ აფხაზეთთან ურთიერთობების აღდგენა იყო.
რაზე საუბრობდნენ ხიდაშელი და ვოლსკი
„დროას“ წევრები აღნიშნავენ, რომ შეხვედრის დროს კაფეში ისხდნენ და საუბარი ესმოდათ. “დროას” ფეისბუკ გვერდზე ამ საუბრის ნაწყვეტების და მთავარი ასპექტების ჩამონათვალი გაკეთდა. აი რა დასკვნები გამოიტანეს საუბრიდან “დროას” წევრებმა:
1. რუსი ოლიგარქი დავით ხიდაშელი პირდაპირ ელაპარაკება აფხაზეთის ე.წ. მთავრობის წარმომადგენლებს და მათ პოზიციებს აცნობს საქართველოს პარლამენტის თავმჯდომარის პირველ მოადგილეს, გია ვოლსკის. ხიდაშელი ახსენებს აფხაზეთის ე.წ. შს მინისტრს, უშიშროების ყოფილ უფროსს [რობერტ კიუტს];
2. ხიდაშელი ვოლსკის ესაუბრება კონფედერაციაზე აფხაზეთთან და სამხრეთ ოსეთთან;
3. ხიდაშელი ვოლსკის ესაუბრება ოკუპირებულ აფხაზეთში ტვირთების შეტანასა და ბიზნეს ურთიერთობებზე;
4. “რკინიგზის 37 კმ. აფხაზეთში არის დანგრეული” – ხიდაშელი ვოლსკის ესაუბრება აფხაზეთის რკინიგზის აღდგენაზე;
5. “შვიდი კომპანიაა და 20 პროცენტი დღგ” – ეუბნება ხიდაშელი ვოლსკის;
6. “მე რომ ეს თემა დავძრა უნდა ვიცოდე, რომ იქიდან ერთ კვირაში უნდა გადმოდგან ნაბიჯი.” – ეუბნება გია ვოლსკი ხიდაშელს;
7. “ღარიბაშვილს ვეუბნებოდი აფხაზეთის მთავარ ხუთ მინისტრთან, ვინც ყველაფერს წყვეტს, გქონდეთ ურთიერთობები, კომუნიკაცია” – ეუბნება ხიდაშელი ვოლსკის;
8. “თქვენ გაქვთ თემა და გჭირდებათ მიმართულება” – ეუბნება გია ვოლსკი დავით ხიდაშელს.
გია ვოლსკის კომენტარი
ამ შეხვედრის კომენტირება ვოლსკის რამდენჯერმე მოუწია ჟურნალისტებთან.
მან დაადასტურა, რომ ხიდაშელს მართლაც აფხაზეთის თემაზე ესაუბრებოდა. ვოსკის თქმით, ხიდაშელს ის მანამდსე არ იცნობდა, ბიზნესმენი თავად დაუკავშირდა და შეხვედრა თხოვა.
ვოლსკის თქმით, ხიდაშელთან მისი საუბარი რამდენიმე კონკრეტულ მიმართულებას შეეხო:
ხიდაშელმა თქვა, რომ მნიშვნელოვანია, საქართველოს ხელისუფლების წარმომადგენლებმა აფხაზურ მხარესთან კარგი პირადი ურთიერთობების ჩამოყალიბება მოახერხონ.
„მან [ხიდაშელმა] თქვა, რომ იქნებ პირადი ურთიერთობები აფხაზურ მხარესთან კარგი იყოს… ავუხსენი, რომ აფხაზურ მხარეს უნდა, ქართულ მხარეს ელაპარაკოს, როგორც აფხაზეთის დამოუკიდებელი რესპუბლიკა და ეს გარემოება შეუძლებელს ხდის რაიმე პირადი კონტაქტების და ურთიერთობების ჩამოყალიბებას“,- ამბობს ვოლსკი.
ასევე, ვოსკიმ დაადასტურა, რომ შეხვედრაზე საუბარი იყო კონფედერაციაზე. ხიდაშელმა ვოლსკის უთხრა, რომ “კარგი იქნებოდა, აფხაზეთთან შეიქმნას კონფედერაცია”.
„რაც შეეხება კონფედერაციას, ეს სიტყვა საკმაოდ ხმამაღლა ახსენა, – ისე, რომ გვერდით მსხდომმა ადამიანებმა მოიხედეს კიდეც… საზოგადოების დიდმა ნაწილმა იცის, რომ კონფედერაცია შეიძლება, მაგრამ ასეთ ვითარებაში ამაზე საუბარი არ არის. საამისოდ არც არანაირი წინაპირობაა. კონფედერაცია ახსენა, მაგრამ ეს არ ნიშნავს, რომ ამაზე მიმდინარეობს საუბარი,” – ამბობს ვოლსკი.
ასევე “ტვ პირველთან” საუბარში ვოლსკიმ აღნიშნა, რომ ხიდაშელთან არ უსაუბრია რუსეთთან ურთიერთობების თემაზე.
„რუსეთთან ურთიერთობების რაიმე თემა განხილული არ ყოფილა, გარდა იმისა, რომ თქვა, კარგი იქნება, რომ დავუბრუნდეთ იმ შეთანხმებას, რომელიც ჰქონდა საქართველოს 2011 წელს“.
საქართველოსა და რუსეთს შორის 2011 წელს ხელმოწერილი შეთანხმება გულისხმობს ე.წ. “სავაჭრო კორიდორების” შექმნას რუსეთიდან საქართველოსა და სომხეთში აფხაზეთისა და სამხრეთ ოსეთის ტერიტორიების გავლით. ეს შეთანხმება რუსეთის მსოფლიო სავაჭრო ორგანიზაციაში გაწევრიანების წინ გაფორმდა.
ჟურნალისტებთან საუბრისას “ოცნების” დეპუტატი ასევე ხაზს უსვამს, რომ ხიდაშელს მასთან “არ უსაუბრია, როგორც „ქართული ოცნების“ წარმომადგენელთან“.
კითხვაზე, თვითონ ხიდაშელი რა სტატუსით ესაუბრებოდა, გია ვოლსკიმ თქვა: „არავითარი სტატუსი არ გააჩნია, არავის სახელით არ ლაპარაკობდა. არიან ადამიანები, ზოგიერთები თავიანთ მოსაზრებებს უაზიარებენ სხვა ადამიანებს“.
კომენტარი აფხაზეთიდან
ამ ამბავს უკვე მოჰყვა გამოხმაურება სოხუმიდან. ოკუპირებული აფხაზეთის ე.წ. შინაგან საქმეთა მინისტრი ბიზნესმენ დავით ხიდაშელთან მოლაპარაკებებს უარყოფს. “ეხო კავკაზასთვის” მიცემულ კომენტარში რობერტ კიუტის ამბობს, რომ საქართველოს პარლამენტის პირველი ვიცე-სპიკერის, გია ვოლსკის შესახებ მხოლოდ მედიით იცის.
“ეს ხიდაშელი არც კი მინახავს არასდროს, ხოლო ვოლსკის შესახებ მხოლოდ მედიაში გავრცელებული ცნობებით ვიცი… არანაირი მოლაპარაკებები არ მიწარმოებია, მითუმეტეს მათთან”, – განაცხადა რობერტ კიუტმა.
კიუტის თქმით, გავრცელებული ინფორმაცია აბსურდულია, ხოლო რკინიგზის აღდგენასთან დაკავშირებული საკითხები მის კომპეტენციაში არ შედის.
ექსპერტის შეფასება
ქართველი ანალიტიკოსები მიიჩნევენ, რომ აფხაზეთის თემა “ქართულ ოცნებას” წინასაარჩევნოდ სჭირდება საკუთარი ამომრჩევლისთვის იმის საჩვენებლად, რომ თითქოსდა ტერიტორიული მთლიანობის აღდგენის მიმართულებით კონკრეტულ ნაბიჯებს დგამს.
პოლიტიკის ანალიტიკოსები მიიჩნევენ, რომ ეს არის ნიშნები, რომ 2024 წლის საპარლამენტო არჩევნების სამზადისში მყოფი „ქართული ოცნება“ აფხაზეთისა და სამხრეთ ოსეთის თემებით სპეკულირებას დაიწყებს და
„ეს ყველაფერ ტერიტორიული მთლიანობის აღდგენის ილუზიაზე იმუშავებს.ილუზიაზე იმიტომ, რომ რუსეთთან ახლანდელი ურთიერთობებით ამ პრობლემების გადაჭრა წარმოუდგენელია. საუბარია პრობლემის გადაჭრის ილუზიაზე, რომელიც “ოცნებას” უნდა, რომ მიჰყიდოს ამომრჩეველს“, – უთხრა რადიო თავისუფლებას „საქართველოს სტრატეგიული ანალიზის ცენტრის“ დამფუძნებელმა, გიორგი რუხაძემ.
დამოუკიდებელი დეპუტატის, თეონა აქუბარდიას თქმით, რაც ხდება, ადასტურებს საქართველოს ხელისუფლების მზარდ დამოკიდებულებას პუტინის რუსეთზე.
“ქართული ოცნება” აღიარებს, რომ შესაძლებელია მოსკოვის ელჩებთან ღიად შეხვედრა და პოლიტიკური თუ ბიზნეს სქემების განხილვა. ახლა მშვიდად განიხილავენ აფხაზეთთან სავაჭრო-ეკონომიკური კავშირების დამყარების საკითხს და ეს მთლიანად რუსეთის ინტერესების სფეროშია“.
ვინ არის დავით ხიდაშელი
დავით ხიდაშელი ქართული წარმოშობის რუსეთში მოღვაწე ბიზნესმენია, რომელსაც ახლო კავშირი აქვს რუს ოლიგარქ ვლადიმირ ევტუშენკოვთან. ევტუშენკოვი, მსხვილი რუსული კორპორაცია „სისტემის“ მფლობელი, რუსეთის უკრაინაში შეჭრის შემდეგ ერთ-ერთი პირველი იყო, ვისაც ბრიტანეთმა სანქციები დაუწესა.
თავის მხრივ ევტუშენკოვი ბიძინა ივანიშვილთან დაახლოებული პირია.
ხიდაშელი ერთხელ უკვე გამოჩნდა ქართულ პოლიტიკურ სივრცეში და მაშინაც წინასაარჩევნოდ.
მას საქართველოს ფართო საზოგადოება ე.წ. კარტოგრაფების საქმიდან იცნობს. სწორედ დავით ხიდაშელის მიერ რუსეთიდან ჩამოტანილი და თითქოსდა არქივებში მოპოვებული რუკის საფუძველზე დაიწყო საქართველოში სისხლის სამართლის გამოძიება სახელმწიფო საზღვრის დელიმიტაციისა და დემარკაციის კომისიის ყოფილი წევრების, ივერი მელაშვილისა და ნატალია ილიჩოვას წინააღმდეგ.
გამოძიების თანახმად, ილიჩოვა და მელაშვილი წინა ხელისუფლების დავალებით რუკებს აყალბებდნენ აზერბაიჯანის სასარგებლოდ და დავით გარეჯის ნაწილი აზერბაიჯანს მიაკუთვნეს. ეს ყველაფერი წინასაარჩევნოდ ხდებოდა და მთელი წინასაარცევნო კამპანია “ქართულმა ოცნებამ” სწორედ ამ პატრიოტულ ლოზუნგზე ააგო, რომ “გარეჯი საქართველოა”. “ოცნება” ხიდაშელის დახმარებით სეეცადა თავი წარმოეჩინა როგორც ქართული მიწების დამბრუნებელი და ამით გავლენა მოეხდინა საზოგადოებაზე წინასაარჩევნოდ. ამისთვის ივანიშვილმა მადლობაც კი დაგაუხადა ხიდაშელს საჯაროდ და “გმირი” უწოდა.
