"მალე საქართველოს მოსახლეობის 10 პროცენტი რუსი იქნება". ვითარება ლარსზე - ხელისუფლების და ოპოზიციის რეაქცია
ვითარება ზემო ლარსზე
უკვე მეექვსე დღეა, ზემო ლარსის სასაზღვრო გამშვებ პუნქტთან კილომეტრიანი რიგები დგას და რუსეთიდან საქართველოს მიმართულებით მომავალი მანქანების და ადამიანების ნაკადი არ იკლებს.
ეს ვითარება მას შემდეგ შეიქმნა, რაც 21 სექტემბერს დილით რუსეთის პრეზიდენტმა ვლადიმირ პუტინმა რუსეთის ფედერაციაში ნაწილობრივი მობილიზაცია გამოაცხადა.
საქართველო არ ავრცელებს კონკრეტულ სტატისტიკას, თუ რამდენი ადამიანი შემოვიდა ლარსიდან 21 სექტემბრის შემდეგ.
ჩრდილოეთ ოსეთის ვიცე-პრემიერის ირბეკ ტომაევის განცხადებით, ზემო ლარსის საბაჟო გამშვები პუნქტის გავლით საქართველო-რუსეთის საზღვარი გასული კვირის განმავლობაში 37 ათასმა მანქანამ და 115 ათასზე მეტმა ადამიანმა გადაკვეთა.
ტელეგრამში ვრცელდება ფოტოები, სადაც ჩანს, რომ ზემო ლარსის სასაზღვრო-გამშვები პუნქტის რუსეთის მხარეს გადაადგილდება ჯავშანტრანსპორტიორი, რომელზეც სამხედრო ფორმაში ჩაცმული ნიღბიანი ადამიანები სხედან.
რუსეთის “ეფესბე” გამოეხმაურა ამ ინფორმაციას – უწყებაში აცხადებენ, რომ მას გამოიყენებენ იმ შემთხვევაში, თუ ვინმე საზღვრის გარღვევას შეეცდება.
ეფ-ეს-ბე უარყოფს ინფორმაციას, რომ ლარსთან საგუშაგოს მოწყობას გეგმავენ.
“ჯავშანტრანსპორტიორი მოძრაობს, მაგრამ არა საგუშაგოს მოსაწყობად. ეს, უხეშად რომ ვთქვათ, სარეზერვო საშუალებაა ნებისმიერი გაუთვალისწინებელი შემთხვევისთვის – თუ რეზერვისტები მოინდომებენ გამშვები პუნქტის გარღვევას და სასაზღვრო ფორმალობების გაუფორმებლად დატოვებენ ქვეყანას. მხოლოდ ამ მიზნით”.
რუსეთის მოქალაქეების ქვეყანაში მასობრივი შემოსვლა მთავარი თემაა საქართველოში ბოლო დღეების განმავლობაში.
უნდა ჩაკეტოს თუ არა საქართველომ საზღვარი რუსეთის მოქალაქეებისთვის? – ამ კითხვაზე საქართველოში აზრთა სხვადასხვაობაა.
საქართველოს მოქალაქეების ნაწილი მიიჩნევს, რომ რუსეთის მოქალაქეების უკონტროლო ნაკადი დიდი საფრთხეა ქვეყნის უსაფრთხოებისთვის. ასევე არის მოლოდინი, რომ რუსეთის მოქალაქეების შემოსვლასთან ერთად ქვეყანაში კვლავ მოიმატებს ბინის ქირის და უძრავი ქონების ფასი და ადგილობრივებისთვის ცხოვრება გაძვირდება.
ფინანსთა მინისტრი ლაშა ხუციშვილი აცხადებს, რომ ვითარება დრამატული არ არის, საზღვარზე რუსეთის მოქალაქეების შემოსვლა კონტროლდება და სახელმწიფოს მხრიდან გათვალისწინებულია საფრთხეები:
“საბაჟო და სასაზღვრო კონტროლი მუშაობს დადგენილი წესების მიხედვით. ინფორმაცია გამშვებ პუნქტებზე გროვდება, ანალიზი ხორციელდება და მხოლოდ ამის შემდეგ მიიღება გადაწყვეტილება ამა თუ იმ პირთან მიმართებით,” – განაცხადა ხუციშვილმა.
„ქართული ოცნების“ დეპუტატმა ბექა დავითულიანმა ასევე განაცხადა, რომ ამ ეტაპზე რუსეთიდან საქართველოში ჩამოსული მოქალაქეების ნაკადი სრულად კონტროლდება.
ასევე, დეპუტატი ვარაუდობს, რომ „რუსეთის ხელისუფლება, გავრცელებული ინფორმაციის თანახმად, 28-დან დაკეტავს საზღვარს და “შესაბამისად, ეს საკითხი საერთოდ აღარ იქნება აქტუალური“.
მისი თქმით, რუსეთის ფედერაციის მოქალაქეების შეშვებით საქართველო უკრაინას ეხმარება.
„რა ლოგიკაა, რომ არ გავუშვათ რუსეთიდან ფრონტის ხაზზე გასვლა. ანუ რუსეთის რეჟიმს მისცეს საშუალება, ისინი ბრძოლის ველზე დააყენოს და უკრაინას ზიანი მიაყენოს? ჩვენ ხომ უნდა დავეხმაროთ უკრაინას ომის მოგებაში, შესაბამისად, ჩვენი ინტერესებიდან გამომდინარე, თუ ეს ჩვენს ინტერესებს არ დააზარალებს, მაშინ მივიღებთ მათ, ვისაც იქ წასვლა არ სურს“, – განაცხადა დავითულიანმა.
რუსეთთან საზღვრის დაკეტვას და სავიზო რეჟიმის შემოღების ინიციატივით საქართველოში რამდენიმე ოპოზიციონერი პოლიტიკოსი გამოვიდა.
„სტრატეგია აღმაშენებლის“ თავმჯდომარე, გიორგი ვაშაძე აპირებს შექმნას პეტიცია რუსეთის მოქალაქეებისთვის საქართველოს საზღვრის დაკეტვასთან დაკავშირებით.
მისი თქმით, პუტინის მიერ დამტკიცებულ დოკუმენტში პირდაპირ წერია, რომ განსაკუთრებული ყურადღების ქვეშ იქნება ლატვიაში, ლიეტუვაში, ესტონეთში, საქართველოსა და მოლდოვაში რუსეთის მოსახლეობის უფლებების დაცვის საკითხი:
“ხოლო ისინი მასიურად მოდიან საქართველოში. რას ვითხოვთ ჩვენ?! დაუყოვნებლივ მოხდეს დროებით საზღვრის ჩაკეტვა რუსეთის მოქალაქეებისთვის. იყოს მხოლოდ სამი გამონაკლისი – საქართველოს მოქალაქეებს ჰქონდეთ უფლება დაბრუნდნენ საქართველოში, ჩვენს თანამემამულეებს, რომლებიც იმყოფებიან რუსეთის ფედერაციაში ჰქონდეთ სამშობლოში შემოსვლის უფლება და ჰუმანიტარული მიზნებისთვის, თუ რამე განსაკუთრებული მიზეზი იქნება. სხვა ვარიანტი და გამოსავალი ჩვენ არ გვაქვს იმისათვის, რომ თავიდან ავირიდოთ ის საფრთხე, რის წინაშეც ახლა ვდგავართ”.
ვაშაძის თქმით, თუ საზღვარი არ ჩაიკეტება, “უახლოეს დღეებში და კვირებში დადგება მოცემულობა, როდესაც საქართველოს მოსახლეობის 10 % იქნება რუსეთის მოქალაქეები. შესაბამისად, ეს იქნება საფრთხე საქართველოს ეროვნული ინტერესებისთვის”.
ამ საკითხზე ამერიკის შეერთებული შტატების ელჩს ეუთო-ში მაიკლ კარპენტერს კითხვა დაუსვა სააგენტო “ინტერპრესნიუსმა”.
ამერიკელი დიპლომატის თქმით, მას ესმის ქართველების შეშფოთება რუსეთის მოქალაქეების ქვეყანაში მასობრივი შედინების გამო.
„რუსეთი აგრძელებს დღეს საქართველოს სუვერენული ტერიტორიის 20%-ის ოკუპირებას… რუსეთს არასდროს მოუხდენია ცეცხლის შეწყვეტის 6- პუნქტიანი შეთანხმების პირობების იმპლემენტაცია 2008 წლის აგვისტოდან და ინარჩუნებს სამხედრო ძალებს ცხინვალის რეგიონსა და აფხაზეთში… ვაფასებ ქართველების შეშფოთებას, რომელიც მათ აქვთ რუსეთის მოქალაქეების ქვეყანაში მასობრივი შედინების გამო. მე მხოლოდ შემიძლია ვთქვა, რომ ეს საქართველოს ხელისუფლების სუვერენული გადაწყვეტილებაა იმასთან დაკავშირებით თუ ვინ მიიღოს და რა რაოდენობით“,- განაცხადა კარპენტერმა.
ვითარება ზემო ლარსზე
