ვაიმარის სამკუთხედი: არჩევნები EU-ს კანდიდატის სტანდარტების შესაბამისად არ ჩატარებულა
ვაიმარის სამკუთხედის განცხადება
ვაიმარის სამკუთხედის ქვეყნების, გერმანიის, საფრანგეთისა და პოლონეთის საგარეო საქმეთა მინისტრები საქართველოში პოლიტიკური კრიზისის შესახებ ერთობლივ განცხადებას ავრცელებენ და აღნიშნავენ, რომ კრიზისი “ქართული ოცნების” პოლიტიკურმა კურსმა და მისი მხრიდან ევროინტეგრაციის გზას ჩამოშორებამ გამოიწვია. მათივე თქმით, არჩევნები EU-ს კანდიდატის სტანდარტების შესაბამისად არ ჩატარებულა.
ანალენა ბერბოკის, ჟან-ნოელ ბაროსა და რადოსლავ შიკორსკის განცხადებაში წერია, რომ ეუთო/ოდირის 26 ოქტომბრის დასკვნამ არჩევნების შესახებ გერმანიის, საფრანგეთისა და პოლონეთის ეჭვები დაადასტურა.
გარდა ამისა, სამი ქვეყნის განცხადებაში ვკითხულობთ, რომ ვაიმარის სამკუთხედი მომიტინგეებზე ძალადობას გმობს. მინისტრების თქმით, “ქართული ოცნების” მხრიდან რეპრესიებსა და დემოკრატიულ უკუსვლას გერმანიის, პოლონეთისა და საფრანგეთის მხრიდან ეროვნულ და EU-ს დონეზე მმართველ პარტიასთან ურთიერთობების გაუარესება მოჰყვა.
რა წერია განცხადებაში
ჩვენ, ვაიმარის სამკუთხედის საგარეო საქმეთა მინისტრები, სერიოზულად შეშფოთებულები ვართ პოლიტიკური კრიზისის გამო, რომელიც საქართველოში 26 ოქტომბრის საპარლამენტო არჩევნებისა და ქართული ოცნების მხრიდან EU-ში გაწევრიანების პროცესის შეჩერების გადაწყვეტილების შემდეგ დაიწყო. ამ კრიზისის მიზეზი არის საქართველოს მმართველი პარტიის პოლიტიკური კურსი და მისი გადახვევა ევროპული გზიდან.
საქართველოს ხელისუფლებას არაერთხელ მოვუწოდეთ, რომ თავიანთი კურსი შეეცვალათ და ევროპული ნორმებისა და ღირებულებების დაცვით და რეფორმების შემოღებით ევროკავშირში ინტეგრაციას დაბრუნებოდნენ.
მკაცრად ვგმობთ წინა კვირას მშვიდობიან მომიტინგეებზე, მედიასა და ოპოზიციის ლიდერებზე ძალადობას და ვიხსენებთ საქართველოს ხელისუფლების პასუხისმგებლობას, რომ ადამიანის უფლებებს პატივი სცენ და ფუნდამენტური თავისუფლებები, მათ შორის, შეკრების თავისუფლება და მედიის თავისუფლება. უმკაცრესად ვგმობთ მუქარებს პოლიტიკური ფიგურების წინააღმდეგ.
ქართული ოცნების მხრიდან რეპრესიისა და დემოკრატიული უკუსვლის პოლიტიკურ კურსს საპასუხოდ მოჰყვა ჩვენი ურთიერთობის ევროპულ და ეროვნულ დონეზე დაქვეითება და საქართველოს ხელისუფლების დახმარებისა და მასთან თანამშრომლობის შემცირება.
შესაბამისად, ჩვენ მივიღებთ EU-ს გადაწყვეტილებას ქართული დიპლომატიური და სამსახურებრივი პასპორტების მქონე პირებისთვის უვიზო მიმოსვლის დასრულების შესახებ და ევროკავშირისა და ეროვნულ დონეზე დამატებით ზომებს განვიხილავთ.
ეუთო/ოდირის საბოლოო დასკვნა საქართველოში 26 ოქტომბრის საპარლამენტო არჩევნების შესახებ ადასტურებს ჩვენს ეჭვებს საარჩევნო პროცესის სანდოობის შესახებ, ფართოდ გავრცელებული უწესრიგობებთან და ბრალდებების საპასუხოდ არასათანადო გამოძიებებთან ერთად. არჩევნები არ ჩატარებულა EU-ს კანდიდატისგან მოსალოდნელი სტანდარტების შესაბამისად.
საქართველოს ხელისუფლებას მოვუწოდებთ, ყველა რელევანტურ დაინტერესებულ პირთან ეროვნული დიალოგი აწარმოოს, რათა ახლანდელი ვითარებიდან გამოსავალი იპოვოს და საქართველოს დემოკრატიაში საჯარო ნდობა აღადგინოს. ეუთო/ოდირის რეკომენდაციებისა და სტანდარტების შემოღებისკენ მოწოდება, მათ შორის ახალი არჩევნების ჩატარების შესაძლებლობა, რომელიც ქართული საზოგადოების ნაწილებიდან მოდის, ხელისუფლების მხრიდან პასუხს იმსახურებს პოლიტიკურ ძალებთან და სამოქალაქო საზოგადოების წარმომადგენლებთან გულწრფელ დიალოგში.
ხელახლა ვიმეორებთ ჩვენს მტკიცე გადაწყვეტილებას, რომ ქართველი ხალხის დემოკრატიულ და ევროპულ მისწრაფებებს მხარი დავუჭიროთ.
