“ვაჟკაცის სახე შეარცხვინეს” - სკანდალი დაღესტნის სკოლაში გამართული საღამოს გამო

ბალერინებად გადაცმული სკოლის მოსწავლეების ხუმრობამ დაღესტანი აღაშფოთა

“კავკაზსკი უზელის” მასალების მიხედვით

მახაჩკალის ერთ-ერთ ლიცეუმში, ბოლო ზარზე, სკოლის მოსწავლეებმა კომიკური ნომერი –  ბალეტ “გედების ტბის” პაროდია შეასრულეს. ბიჭები ბალერინების ფორმებში გამოვიდნენ, რაც სკანდალის მიზეზი გახდა.

წარმოდგენის ვიდეოჩანაწერი სწრაფად გავრცელდა სოციალურ ქსელებში და მალე თინეიჯერების ნამდვილი ბულიგი დაიწყო.

”სირცხვილია, სასწრაფოდ უნდა გავყაროთ დაღესტნიდან!” – წერენ მომხმარებლები კომენტარებში.

”სირცხვილია მთელი კავკასიისთვის, მთელი რუსეთისთვის!”

”ისინი კაცის, ვაჟკაცის, მეომრის სახეს არცხვენენ”.

“ქალებიც იცინიან, იმის ნაცვლად რომ იტირონ”.

”ფუ, სირცხვილი, სირცხვილი და სირცხვილი. რად აქციეთ თქვენი შვილები, მშობლებო? მუსლიმები ხართ თუ ვინ? “

იყო კომენტარები ბიჭების დასაცავად, მაგრამ ბევრად ნაკლები:

”თქვენ უნდა შეგრცხვეთ, კომიკურ ცეკვას სერიოზულად რომ იღებთ”, – წერს ერთ-ერთი მომხმარებელი.

განზე არც ადგილობრივი ხელისუფლების წარმომადგენლები დარჩენილან. დაღესტნის საზოგადოებრივი პალატის წევრმა შამილ ხადულაევმა თინეიჯერების გამოსვლას სასკოლო კონცერტზე ”ცოდვისკენ პირველი ნაბიჯი” უწოდა.

”თუნდაც ხუმრობა იყოს, ჩვენ მას არ მივესალმებით. უფრო მეტიც, იქ ერთი მეორეს ახტება, ის კი იჭერს. ჩვენთან კონტაქტიც კი არ არის მიღებული, გარდა ხელის ჩამორთმევისა, – ამბობს ხადულაევი – პატარა ბიჭსაც ზრდასრული კაცივით ვექცევით და ველაპარაკებით ”.

აზრი გამოთქვეს რელიგიურმა ლიდერებმაც.

”რესპუბლიკის მუფტიატმა გადაწყვიტა ამ ინციდენტის დეტალები გაერკვია, რომელიც მახაჩკალას ერთ-ერთ ლიცეუმში მოხდა. ამ მიზნით, სკოლის ადმინისტრაციასა და მშობლებს მუფტის თანაშემწე და მახაჩკალას განათლების განყოფილების უფროსი ეწვივნენ. მათ განიხილეს სიტუაცია და შეეცადნენ საუკეთესო გამოსავალი ეპოვათ”, – განაცხადა დაღესტნის მუფთიატმა 25 მაისს ინსტაგრამის საკუთარ გვერდზე.

როგორც სააგენტო “კავკლაზსკი უზელს” ლიცეუმის თანამშრომელმა განუცხადა, მოსწავლეების მიერ დადგმული ცეკვა აუდიტორიამ საკმაოდ ადეკვატურად აღიქვა:

”აუდიტორიაში ყველას ესმოდა, რომ ეს იუმორია. ბავშვებმა უბრალოდ მიუზიკლი დადგეს. ისინი კარგი, მორალურად მდგრადი მოსწავლეები და აქტივისტები არიან. მუდმივად მონაწილეობენ შეჯიბრებებსა და ოლიმპიადებში, პრიზებიც აქვთ აღებული. ჩვენ ყველანი შოკირებულები ვართ იმით, რაც მათ ამ ცეკვის გამო გადახდათ, ”- ამბობს მასწავლებელი.

”კავკაზსკი უზელი” ამ სიტუაციის შესახებ ფსიქოლოგს, დაღესტნის სახელმწიფო უნივერსიტეტის თანამშრომელს, სერგეი ჭიპაშვილს ესაუბრა.

”ყოველთვის სასაცილოა, როდესაც მამაკაცები ქალებს განასახიერებენ. ბევრი კომედიური ფილმი, როგორც ამერიკული, ისე საბჭოთა, ამაზეა აგებული. დრო იცვლება და ყველაფერი სხვა ფორმით აღიქმება”, – ამბობს ჭიპაშვილი.

სკანდალი ბალეტის გამო არის ცალკეული ადამიანების მცდელობა ყურადღება მიიქციონ, ამბობს სვეტლანა ანოხინა, დაღესტანში ცნობილი ჟურნალისტი და უფლებადამცველი.

”ხალხს ან არ ესმის, ან არ უნდა ამის გაგება. შესაძლოა მათ უბრალოდ უნდათ, ისეთი აღმაშფოთებელი რამ ხდებოდეს, რომ მონაწილეობა მიიღონ მის წინააღმდეგ ბრძოლაში. და ყველა ასეთი აღშფოთება ყოველთვის სექსს და სხეულს ეხება. ყველა სხვა სფეროში მათ ამის საშუალება არ აქვთ. ისინი ვერ აკონტროლებენ თავიანთ ცხოვრებას, ბევრი რამის ეშინიათ. ახლა კი შესაძლებლობა აქვთ საერთო აღშფოთებას შეუერთდნენ.”