უწყვეტი პროტესტის 346-ე დღე რუსთაველის გამზირზე. ვიდეო ბლოგების სერიიდან " პროტესტი საქართველოში"
რუსთაველის გამზირზე საპროტესტო აქცია მიმდინარეობს. პროტესტის მონაწილეები მსვლელობით თავისუფლების მოედნისკენ გაემართნენ ტაბიძისა და დადიანის ქუჩების გავლით კვლავ პარლამენტის შენობასთან დაბრუნდნენ.
მანამდე მოქალაქეები პარლამენტის წინ შეიკრიბნენ, სადაც პოლიციელებს კორდონი აქვთ მოწყობილი და აქციის მონაწილეებს გზაზე გადასვლის საშუალებას არ აძლევენ.
ერთ წელზე მეტია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.
აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.
აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები, რადგან, 2024 წლის შემოდგომის არჩევნებს ამ დრომდე არ აქვს აღიარება და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.
პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.
