უნივერსიტეტში დაპირისპირება გრძელდება

თბილისის სახელმწიფო უნივერსიტეტში დაპირისპირება გრძელდება.
სტუდენტების ორი, ურთიერთსაპირისპირო აქცია დღეს უნივერსიტეტში ერთდროულად გაიმართა. სტუდენტების ერთი ჯგუფი კანცლერის პოსტზე კვლავ გიორგი გაფრინდაშვილის კანდიდატურას აპროტესტებს და ე.წ. ოდეერის არსებობის თემაზე გამოძიების დაწყებას მოითხოვს. მეორე აქცია კი, გაფრინდაშვილის მხარდამჭერებმა გამართეს და რექტორის გადადგომის მოთხოვნა წამოაყენეს.
საპროტესტო აქცია დაპირისპირებულ მხარეებს შორის ფიზიკურ შეხლა-შემოხლაში გადაიზარდა.

დაპირისპირება მას შემდეგ დაიწყო, რაც თვითმმართველობის წევრები უნივერსიტეტის შენობაში შევიდნენ და იმ ადგილას მისვლას ცდილობდნენ, სადაც სტუდენტები რამდენიმე დღეა, უნივერსიტეტის ავტონომიის მოთხოვნით აქციას მართავენ.
სიტუაცია უნივერსიტეტის დაცვამ და პოლიციამ მალევე განმუხტა.

ცოტა ხნის წინ კანცლერის თანამდებობაზე საკუთარი კანდიდატურა მოხსნა გიორგი გაფრინდაშვილმა. გაფრინდაშვილის თქმით, ეს გადაწყვეტილება უნივერსიტეტის ინტერესებიდან გამომდინარე მიიღო

 
_______________________________________________________________________________

                                                                11.03.2013

თსუ-ს სტუდენტებს, რომლებიც მესამე დღეა, უნივერსიტეტში საპროტესტო აქციებს მართავენ, ილიას სახელმწიფო უნივერსიტეტის სტუდენტებიც შეუერთდნენ.

პროტესტი გრძელდება. მოთხოვნებს შორისაა: მოიხსნას გიორგი გაფრინდაშვილის კანდიდატურა, გამოიძიონ ‘ოდეერის’ უნივერსიტეტში არსებობა, შეიკვეცოს თვითმართველობის უფლებამოსილებები და პრივილეგიები.


თბილისის სახელმწიფო უნივერსიტეტში, სამი დღეა, დაპირისპირება გრძელდება. ვითარება დაიძაბა უნივერსიტეტის სენატში ახალი კანცლერის არჩევის წინ.

ამ პოსტზე  წარდგენილი ერთადერთი კანდიდატი სტუდენტების ნაწილისთვის მიუღებელი აღმოჩნდა. სტუდენტები უნივერსიტეტის შენობასთან და ფოიეში შეიკრიბნენ და უნივერსიტეტის შენობა ღამითაც არ დაუტოვებიათ.
კონკრეტულად რას აპროტესტებენ სტუდენტები?

კანცლერი რექტორის შემდეგ თანამდებობრივად მეორე პირია უნივერსიტეტში. მისი ერთ–ერთი მოვალეობაა ფინანსური და ადმინისტრაციული რესურსების მართვა. შესაბამისად,უნივერსიტეტის ფუნქციონირებისთვის დიდი მნიშვნელობა აქვს, თუ ვინ დაიკავებს ამ თანამდებობას

უნივერსიტეტის სენატს, რომელიც 42 წევრისგან შედგება და რომელშიც პროფესორები და სტუდენტები შედიან, ახალი კანცლერი 10 მარტს უნდა აერჩია. ამ თანამდებობაზე ერთადერთი კანდიდატურა _ გიორგი გაფრინდაშვილი იყო წარდგენილი.

გაფრინდაშვილის შესაძლო დანიშვნა სტუდენტებმა უნივერსიტეტის ფოიეში სტვენითა და ხმამაღალი შეძახილებით გააპროტესტეს.

სტუდენტებმა სენატის სხდომასა და კენჭისყრაზე დასწრება მოითხოვეს. ამას ხელი შეუშალა უნივერსიტეტის დაცვამ,შემდე კი, ვითარების გამწვავების გამო, პოლიციის გამოძახება გახდა საჭირო, რამაც სტუდენტების პროტესტი კიდევ უფრო გაამძაფრა. აქციის მონაწილეებმა დარბაზში შესვლის საშუალება არც სენატის წევრებს მისცეს, რამაც სხდომის ჩაშლა გამოიწვია.

საპროტესტო აქციის მონაწილე სტუდენტები გაფრინდაშვილს ბრალად სდებენ უსაფრთხოების სამსახურთან ურთიერთობას, პოლიტიკური ინტერესების გატარებასა და სტუდენტებზე ძალადობას.

სტუდენტები აცხადებენ, რომ 2011 წელს გიორგი გაფრინდაშვილი, რომელიც მაშინ უნივერსიტეტის ადმინისტრაციის თანამშრომელი იყო, ხელს აფარებდა სტუდენტური თვითმართველობის წევრებს, რომლებიც ფიზიკურად უსწორდებოდნენ კრიტიკულად განწყობილ სტუდენტებს.

“თუკი სტუდენტი ეჭვს შეიტანდა თვითმართველობის საბიუჯეტო სახსრების მართებულად ხარჯვაში ან სხვა საკითხზე გააკრიტიკებდა სტუდენტურ თვითმართველობას, მას სასტიკად უსწორდებოდნენ. გაფრინდაშვილი მაშინ ადმინისტრაციაში იყო და ამ ყველაფერზე თვალს ხუჭავდა,“ _ ამბობს სენატის წევრი, სტუდენტი ლევან ლორთქიფანიძე.

გარდა ამისა, სტუდენტები აცხადებენ, რომ გაფრინდაშვილს კავშირი აქვს  სახელმწიფო უსაფრთხოების სამსახურის წარმომადგენელ ივა კასრაძესთან , რომელსაც ასევე ადმინისტრაციული თანამდებობა უკავია უნივერსიტეტში.

სტუდენტების უკმაყოფილება კიდევ უფრო გაამწვავა უნივერსიტეტის რექტორის ლადო პაპავას საჯარო აღიარებამ, რომ უმაღლეს სასწავლებელში მართლაც მუშაობენ ადამიანები, რომლებიც იქ სახელმწიფო უსაფრთხოების სამსახურმა მიავლინა, და  წარსულში გაფრინდაშვილის თანაკურსელი კასრაძე ერთ–ერთი მათგანია.

ამ განცხადებამ არასამთავრობო ორგანიზაციების აღშფოთება გამოიწვია. “საერთაშორისო გამჭვირვალობა საქართველომ პაპავას განმარტებები მოსთხოვა, თუ რა საფუძველზე თანამშრომლობს უნივერსიტეტი უსაფრთხოების სამსახურთან.
გაფრინდაშვილის კანდიდატურას აქტიურად უჭერს მხარს სტუდენტური თვითმართველობა, რომლის მიმართაც სტუდენტებს ასევე ბევრი პრეტენზია აქვთ. სტუდენტები ამბობენ, რომ თვითმართველობა ეს არის პრივილეგირებულ ადამიანთა ჯგუფი, რომლებსაც პირადი, მერკანტილური მიზნები ამოძრავებთ და უნივერსიტეტის ბიუჯეტს არამიზნობრივად ხარჯავენ.

‘თვითმართველობის წევრები, მაგალითად, დადიან ბაკურიანში დასასვენებლად და ამას ტრენინგს ეძახიან. ფულს იღებენ ფონდიდან, რომლითაც, წესით, სტუდენტების გაცვლით პროგრამებსა და კონფერენციებში მონაწილეობის ხარჯები უნდა დაფაროს,’ – ამბობს თსუ-ს სტუდენტი ირაკლი კუპრაძე ‘ეხო კავკაზასთან’ ინტერვიუში. 

თავად გაფრინდაშვილი მის წინააღმდეგ გამოთქმულ ბრალდებებს ფეისბუკზე გამოეხმაურა და მათ აბსურდული უწოდა.

საბოლოოდ სტუდენტებმა რექტორისგან გიორგი გაფრინდაშვილის კანდიდატურის შესახებ განხილვებში მონაწილეობის შეთავაზება მიიღეს. თუმცა, აქციის მონაწილეები პოზიციებს არ თმობენ და, გაფრინდაშვილის კანდიდატურის მოხსნასთან ერთად, კატეგორიულად ითხოვენ კანცლერის არჩევის სისტემის რეფორმირებას და რექტორატის მხრიდან თვითმმართველობის პრივილეგიების წახალისების შეწყვეტას.

გამოქვეყნებულია: 11.03.2016