თსუ-ის ლექტორები და სტუდენტები უნივერსიტეტბის გაერთიანებაზე რექტორისგან განმარტებას ითხოვენ
უნივერსიტეტბის გაერთიანება
თბილისის სახელმწიფო უნივერსიტეტში მზარდი უკმაყოფილება მოჰყვა ხელისუფლების გადაწყვეტილებას, თსუ და საქართველოს ტექნიკური უნივერსიტეტი გააერთიანოს. დაახლოებით 600 სტუდენტი და ლექტორი რექტორ ჯაბა სამუშიასგან განმარტებას მოითხოვს და აცხადებს, რომ პროცესი არც სამართლებრივად და არც აკადემიურად დასაბუთებული არ არის.
თსუ-ის ლექტორის, იაგო კაჭკაჭიშვილის თქმით, სოციალურ და პოლიტიკურ მეცნიერებათა ფაკულტეტის პროფესორ-მასწავლებლები და სტუდენტები არა მხოლოდ შეშფოთებას, არამედ ღია პროტესტსაც გამოხატავენ ხელისუფლების მიერ დაანონსებული რეფორმის მიმართ.
კაჭკაჭიშვილის შეფასებით, თსუ-სა და სტუ-ს გაერთიანებას “არ გააჩნია არც სამართლებრივი და არც შინაარსობრივი ან კონცეპტუალური საფუძველი“ და წარმოადგენს ხელოვნურ გადაწყვეტილებას, რომელიც უნივერსიტეტებს აკადემიური განვითარების თვალსაზრისით ზიანს მიაყენებს.
მისივე თქმით, უცნობია, რა არგუმენტებით ან კონსულტაციების გარეშე მიიღეს გადაწყვეტილება. პროტესტის ნიშნად, უნივერსიტეტში მომზადდა განცხადება, რომელსაც უკვე დაახლოებით 600 პროფესორი და სტუდენტი აწერს ხელს.
“ეს პროცესი დღეს დაიწყო, სულ რამდენიმე საათის წინ, და უკვე ასეულობით ხელმოწერა შეგროვდა. ხელმოწერები კიდევ გაგრძელდება. ამით გვინდა გამოვხატოთ საფუძვლიანი პროტესტი გაუთვლელი და მავნე გადაწყვეტილების წინააღმდეგ, რომელიც აზიანებს საქართველოში საუნივერსიტეტო ცხოვრების განვითარებას,“ — თქვა კაჭკაჭიშვილმა.
გაერთიანების იდეა 29 იანვარს გაახმოვანა განათლების მინისტრმა გივი მიქანაძემ, რომელმაც განაცხადა, რომ გადაწყვეტილება მმართველი პარტიის, “ქართული ოცნების“, მიერ დაწყებული განათლების რეფორმის ნაწილია. თუმცა ინიციატივამ სწრაფად გამოიწვია წინააღმდეგობა როგორც სტუდენტებში, ისე ლექტორებსა და ადმინისტრაციის პერსონალშიც.
კრიტიკოსების თქმით, ხელისუფლება რეფორმას სიჩქარით ატარებს და აკადემიურ საზოგადოებასთან რეალური კონსულტაციების გარეშე იღებს გადაწყვეტილებებს, რომლებიც უნივერსიტეტების ავტონომიას და განვითარების ლოგიკას ეწინააღმდეგება.
თსუ-ში დაწყებული პროტესტი უკვე სცდება ერთ ფაკულტეტს და აჩენს უფრო ფართო კითხვას: არის თუ არა განათლების რეფორმა რეალურად მიმართული ხარისხის გაუმჯობესებისკენ, თუ ის ადმინისტრაციულ გაერთიანებებსა და პოლიტიკურ კონტროლს ემსახურება.
