UNICEF: საქართველოში 10 ათასამდე ბავშვს სახლში ინტერნეტი არ აქვს

საქართველოში სასკოლო ასაკის ბავშვების 15 პროცენტს არ აქვს სახლში ინტერნეტზე წვდომა – წერია გაეროს ბავშვთა ფონდისა (UNICEF) და საერთაშორისო სატელეკომუნიკაციო კავშირის (ITU) ახალ ერთობლივ ანგარიშში.

და ეს მაშინ, როდესაც კორონავირუსის პანდემიის გამო, უკვე მეცხრე თვეა საქართველოში დახურულია სკოლები.

სკოლის მიღმა საქართველოში დაახლოებით 661 ათას 500 ბავშვი დარჩა. ისინი ონლაინ სწავლობენ.

● ახალი ცხოვრება ორი თვით. რა შეზღუდვები დააწესა საქართველოს მთავრობამ

● საქართველოში 29 800 ბავშვს სახლში წყლითა და საპნით ხელის დაბანის პირობები არა აქვს

ანგარიში “რამდენ ბავშვს და ახალგაზრდას აქვს სახლში ინტერნეტზე წვდომა?” გლობალურ სურათს მიმოიხილავს და მთელ მსოფლიოში პანდემიის გამო სასკოლო ასაკის ბავშვების პრობლემებს ეხება.

ანგარიშის მიხედვით, მსოფლიოში სასკოლო ასაკის ბავშვების ორ მესამედს არ აქვს სახლში ინტერნეტზე წვდომა. 

აქვე ნათქვამია, რომ სასკოლო ასაკის ბავშვებთან ერთად, ინტერნეტთან წვდომა ასევე არ აქვს 15-დან 25 წლამდე ასაკის 759 მილიონ ახალგაზრდას, ანუ 63 პროცენტს.

რაც შეეხება საქართველოს, ანგარიშში ნათქვამია, რომ საქართველოში პანდემიამდეც იყო ინტერნეტიზაციის პრობლემა, რაც არათანაბარ და არაკონკურენტულ პირობებში აყენებდა ათასობით ახალგაზრდას სხვა თანატოლებთან.

საქართველოში ასევე მზარდია იმ ახალგაზრდების რიცხვი, რომლებსაც სჭირდებოდათ საბაზისო ონლაინ დასაქმების და სამეწარმეო უნარ-ჩვევების შესწავლა.

“ინტერნეტზე წვდომის არარსებობა ხელს უშლის ბავშვებს და ახალგაზრდებს იყვნენ კონკურენტუნარიანები თანამედროვე ეკონომიკაში”, – ამბობს საქართველოში გაეროს ბავშვთა ფონდის წარმომადგენელი, ღასან ხალილი.

მიუხედავად იმისა, რომ შეზღუდვები მსოფლიოს ბევრ ქვეყანაშია და ბავშვები ბევრგან სწავლობენ დისტანციურად, დაბალშემოსავლიან ქვეყნებში და სოფლებში ისინი კიდევ უფრო ჩამორჩებიან თავიანთ თანატოლებს – წერია ანგარიშში.