უკრაინაში ომის გამო აფხაზეთის გავლით ტვირთების გადატანა გასამმაგდა. რას ფიქრობს თბილისი?
აფხაზეთის გავლით ტვირთების გადატანა გასამმაგდა
უკრაინის ომისა და დასავლეთის მიერ რუსეთისთვის დაწესებული სანქციების გამო აფხაზეთის გავლით სატრანზიტო ვაჭრობა შესამჩნევად გაიზარდა. რუსეთიდან ტვირთი რკინიგზის საშუალებით აფხაზურ პორტებში ხვდება და იქიდან, როგორც წესი, თურქეთში მიაქვთ. ეს გზა გამოიყენება უკუ მიმართულებითაც – თურქეთიდან რუსეთისკენ. მაგრამ, ამ შემთხვევაში, ექსპორტთან შედარებით მოცულობა მცირეა.
მხოლოდ გასული ხუთი თვის განმავლობაში აფხაზეთის რკინიგზით გადატანილი ტვირთის მოცულობა იმაზე მეტია, ვიდრე გასულ წელს ჯამში.
- რუსეთი აფხაზეთს ფინანსურ დახმარებას უმცირებს, რათა დამოუკიდებლობა ასწავლოს
- აფხაზეთის ხელისუფლებასა და ოპოზიციას ორივეს ცალ-ცალკე უყვარს რუსეთი
- მოსაზრება აფხაზეთიდან: რუსეთის მიერ ლუგანსკისა და დონეცკის აღიარება – რა იქნება შემდეგ?
2022 წლის ხუთ თვეში აფხაზეთში დაახლოებით 7 ათასი ვაგონი ჩავიდა. ტვირთის საერთო მოცულობა 500 ათასი ტონაა.
„მთავარი ტრანზიტული ტვირთი ქვანახშირია. თუმცა სატრანზიტო საქონლის ხაზი ყოველ ჯერზე ფართოვდება. მაგალითად, ცოტა ხნის წინ პირველად გადავიტანთ წყალბადის ზეჟანგი. ახლა საკმაოდ ბევრ შეკვეთას ვასრულებთ ფანერების გადატანაზე, რომელიც თათრეთიდან თურქეთში იგზავნება“, - ამბობს აფხაზეთის რკინიგზის წარმომადგენელი.
ტვირთების გადატანაზე აფხაზეთის რკინიგზის სადგურის შეკვეთები მზარდია, მაგრამ მთელი მოცულობის ათვისებას ტექნიკური პრობლემები უშლის ხელს. კერძოდ, აფხაზეთის რკინიგზა არ არის ადაპტირებული დიდი ტონაჟის კონტეინერების მიღებისა და გადამუშავებისთვის, მაგრამ ეს მოგვარების პროცესშია და, სავარაუდოდ, ივნისის ბოლოს აფხაზეთის გავლით დიდი ტონაჟის ტვირთების ტრანზიტი შესაძლებელი გახდება.
რას ფიქრობს და რას აპირებს საქართველოს მთავრობა სანქცირებული რუსული ტვირთების გადაზიდვაზე აფხაზეთის რკინიგზით, უცნობია. JAMnews მეორე დღეა ცდილობს საქართველოს საგარეო საქმეთა სამინისტროსგან მიიღოს პასუხი რამდენიმე კითხვაზე, თუმცა, უშედეგოდ.
კითხვებს არც საზღვაო ტრანსპორტის სააგენტოში უპასუხეს იმ მოტივით, რომ ეს მათი კომპეტენცია არ არის.
ეკონომიკის სამინისტროში JAMnews-ს უთხრეს, რომ ასეთი ინფორმაცია მათთვის უცნობია. საქართველოში თურქეთის საელჩოშიც აცხადებენ, რომ მსგავს ინფორმაციას არ ფლობენ.
თურქეთი ნატოს ერთადერთი წევრია, რომელიც რუსეთის წინააღმდეგ საერთაშორისო სანქციებს არ შეუერთდა, თუმცა ანკარამ დაგმო უკრაინაში რუსეთის შეჭრა. მანამდე კი, რუსეთის მიერ ლუგანსკისა და დონეცკის დამოუკიდებლობის აღიარებას პრეზიდენტმა ერდოღანმა მიუღებელი უწოდა.
სანქციებზე უარი რეჯეფ თაიფ ერდოღანმა ბუნებრივი აირის საჭიროებით ახსნა და თქვა, რომ აუცილებელი რესურსების თითქმის ნახევარი რუსეთიდან შემოდის. ასევე, მან ახსენა რუსეთის დახმარებით მშენებარე ატომური სადგურის, AKKUYU-ს მშენებლობა.
„პირველ რიგში, ჩემს ხალხს ზამთარში სიცივეში ვერ დავტოვებ. გარდა ამისა, მე არ შემიძლია შევაჩერო ჩვენი ინდუსტრია“, – თქვა ერდოღანმა.
რუსეთსა და თურქეთს მჭიდრო ეკონომიკური კავშირები აქვთ. თურქეთი რუსეთისთვის სიდიდით მეხუთე საექსპორტო ბაზარია, რუსეთი თურქეთისთვის კი – მეათე.
თურქეთის სტატისტიკის სამსახურის ინფორმაციით, მიმდინარე წლის თებერვალში რუსეთის მოქალაქეების მიერ ქვეყანაში საცხოვრებელი ფართის ყიდვის მონაცემები 96%-ით გაიზარდა. Forbes-ის ინფორმაციით, მარტში რუსეთის მოქალაქეებმა თურქეთში 64 კომპანია დააფუძნეს, რაც თებერვალთან შედარებით ორჯერ მეტია. გარდა ამისა, ინვესტიციის შედეგად მოქალაქეობის გამარტივებულად მიღების შესაძლებლობა მარტივი გამოსავალია რუსი ოლიგარქებისთვის.
პარალელურად, თურქეთს მჭიდრო ურთიერთობები აქვს უკრაინასთანაც. გარდა ეკონომიკური კავშირებისა, ანკარა კიევს იარაღით ამარაგებს. სწორედ თურქული წარმოებისაა უპილოტო საფრენი აპარატი Bayraktar-ი, რომლებსაც უკრაინელები წარმატებით იყენებენ რუსეთის სამხედრო თავდასხმის წინააღმდეგ. გარდა ამისა, რუსეთის უკრაინაში შეჭრის გამო ანკარამ სამხედრო ხომალდებისთვის ბოსფორისა და დარდანელის სრუტეები დაკეტა.
უკრაინაში რუსეთის შეჭრის შემდეგ თურქეთი ცდილობს ორ სახელმწიფოს შორის ძირითადი შუამავალი იყოს და სტამბოლში მოლაპარაკებებიც გაიმართა. მანამდე ერდოღანმა თქვა, რომ თურქეთი ორივე ქვეყანას მეგობრად მიიჩნევს. ამასთან, ანკარა აღიარებს და მხარს უჭერს უკრაინის ტერიტორიულ მთლიანობას.
აფხაზეთის გავლით ტვირთების გადატანა გასამმაგდა
