ტვ “პირველს” და” მთავარ არხს” ინკასო დაადეს

“მთავარი არხის” იურისტის, თამთა მურადაშვილის განცხადებით, ტელეკომპანიამ ვერ მოახერხა იანვრის საშემოსავლო გადასახადის გადახდა, რის გამოც ფინანსთა სამინისტროს შემოსავლების სამსახურმა 20 მარტს, საღამოს მაუწყებლის ანგარიშებს ინკასო დაადო. 

“მაშინ, როდესაც ბიზნესი კრიზისშია, შესაბამისად, ვერც ტელევიზიებს ურიცხავს სარეკლამო მომსახურების თანხას, ფინანსთა სამინისტრომ გადაწყვიტა, რომ მედიის მუშაობა არაა საჭირო და ინკასო დაადო ორ ტელევიზიას – მთავარ არხს და ტვ პირველს,” – წერს  სოციალურ ქსელ facebook-ში “მთავარი არხის” საინფორმაციო სამსახურის უფროსი, ნოდარ მელაძე. 

გაოგნებული ვარ და სიტყვები არ მყოფნის! ბატონებო, ჩვენი და თქვენი მტერი კორონაა და არა თავისუფალი მედია! გავიმეორებ: ხალხი აქ საკუთარ სიცოცხლეს საფრთხის ქვეშ აყენებს, თქვენ კი ამ ჟურნალისტებს, ოპერატორებს, მემონტაჟეებს, მძღოლებს შემოსავლის გარეშე ტოვებთ !!!,”- ასე გამოეხმაურა არხის ანგარიშებზე ინკასოს დადებას “ტვ პირველის” დამფუძნებელი ვატო წერეთელი.

როგორც ტვ “პირველში” აცხადებენ, მათ შემოსავლების სამსახურს 19 მარტს მიმართეს თხოვნით, რომ გადასახადის გადასახდელად დამატებით 10-დღიანი ვადა მიეცათ, თუმცა, უშედეგოდ.

ფინანსთა მინისტრის ვანო მაჭავარიანის განცხადებით, ინკასო რამდენიმე ათას კომპანიას ავტომატურ რეჟიმში დაედო და ტელევიზიები გამონაკლისს არ წარმოადგენენ.

ტვ “პირველის” და” მთავარ არხის” ანგარიშებზე ინკასოს დადებას გამოეხმაურა კოალიცია ”მედია ადვოკატირებისათვის”.  

“ჩვენ არაერთხელ ვისაუბრეთ, რომ მაუწყებლების მიმართ შერჩევითი საგადასახადო პოლიტიკის წარმოება იყო და რჩება საქართველოს სხვადასხვა ხელისუფლების იარაღად მედიაზე ზეწოლისათვის. დღეს კი მედიის შეუფერხებლად მუშაობა, როდესაც COVID-19-თან დაკავშირებით შექმნილი ვითარების გამო, მოსახლეობისთვის მნიშვნელოვანია ინფორმაციის მიღება, სახელმწიფოს პასუხისმგებლობას აასმაგებს. მოვუწოდებთ საქართველოს მთავრობას, მიიღოს დროებითი ზომები და დაუყოვნებლივ მოეხსნას ინკასო ტელეკომპანიებს”,  – აღნიშნულია კოალიციის განცხადებაში. 

2019 წლის 15 დეკემბერს ფინანსთა სამინისტროს შემოსავლების სამსახურმა TV პირველს, კავკასიასა და რუსთავი 2-ს ინკასო დაადო. TV პირველისა და კავკასიის წარმომადგენლები ეს გადაწყვეტილება კრიტიკული მედიის გაჩუმების მცდელობად შეაფასეს. ისინი აცხადებდნენ, რომ იმ ფონზე, როცა ტელეკომპანია იმედსა და რუსთავი 2-ს გაცილებით უფრო მაღალი საგადასახადო დავალიანება ჰქონდათ, სამინისტრო მათ 10-წლიან რესტრუქტურიზაციას სთავაზობდა, მათ კი გადახდას.

კრიტიკის პასუხად ფინანსთა მინისტრმა განაცხადა, რომ მისი წინამორბედების დროს მიდგომა უსამართლო იყო და არ უნდა მიეცათ ამ არხებისთვის ამხელა ვალის დაგროვების საშუალება და ძველი უსამართლობით ახალი ვალის დაგროვება ვერ გამართლდებოდა.

2020 წლის 22 იანვარს ვატო წერეთელმა განაცხადა, რომ საგადასახადო დავალიანება გადაიხადეს და მათ ანგარიშებს ინკასო მოეხსნა. მან მინისტრს მოუწოდა, რომ აეთივე პრინციპულობით მოეთხოვა ვალის დაფარვა სხვა ტელეკომპანიებისთვისაც.

20 თებერვალს ფინანსთა მინისტრმა, ივანე მაჭავარიანმა განაცხადა, რომ ტელეკომპანიებს, რომლებსაც ბიუჯეტის წინაშე დაგროვილი დავალიანება აქვთ,  5-წლიანი გადახდის გრაფიკს შესთავაზებდნენ.