ყარაბაღი: თურქული შეიარაღება და კონფლიქტის ზონაში ჩარჩენილი 80 ჟურნალისტი
გაზიარება
გაზიარება
ერევნის აზრით, თანამედროვე თურქული შეიარაღება ყარაბაღის კონფლიქტში გადამწყვეტ როლს ასრულებს.
ბაქოში იხსენებენ, რომ ძირითადი შეიარაღება აზერბაიჯანში რუსეთიდან ჩადის და აქვთ შესყიდვები სხვა ქვეყნებიდანაც.
„რეპორტიორები საზღვრებს გარეშე“ ყარაბაღში, შეტაკებების ზონაში მყოფი 80 ჟურნალისტის ბედზე ნერვიულობს.
27 სექტემბრიდან მოყოლებული, აზერბაიჯანისა და სომხეთის არმიები ყარაბაღის კონფლიქტის ზონაში აქტიურად იბრძვიან ჯავშანტექნიკის, არტილერიისა და უპილოტო საფრენი აპარატების გამოყენებით. ორივე მხარე ერთმანეთს ადანაშაულებს დასახლებული პუნქტების დაბომბვაში. ორივე მხრიდან ათასობით სამხედრო და მშვიდობიანი მოქალაქე დაიღუპა. ამ დროის განმავლობაში, სამჯერ გამოცხადდა ზავი – 10, 18 და 27 ოქტომბერს, მაგრამ სამივეჯერ ის მაშინვე დაირღვა. მხარეები ზავის დაუცველობაში ერთმანეთს ადანაშაულებენ.
2020 წლის 5 ნოემბრისთვის არსებული ბოლო მოვლენების მიმოხილვა
ინფორმაცია ბაქოდან
• საბრძოლო მოქმედებების დაწყებიდან, აზერბაიჯანული მხრიდან 92 მშვიდობიანი მოქალაქე დაიღუპა და 404 დაიჭრა.
• აზერბაიჯანის თავდაცვის სამინისტრომ განაცხადა, რომ სომეხი სამხედროები ბომბავენ აზერბაიჯანის ტერტერისა და აღდამის რაიონებს – მაგრამ უარყო სომხური მხარის ცნობა, აზერბაიჯანული არმიის მიერ ხოჯავენდისა (მარტუნი) და შუშის დაბომბვის განახლების შესახებ.
• „თურქეთიდან არანაირი სამხედრო დახმარება არ არის, ბაქო ანკარისგან მხოლოდ თანამედროვე შეიარაღებას ყიდულობს“, – განაცხადა აზერბაიჯანის პრეზიდენტმა ილჰამ ალიევმა ესპანურ საინფორმაციო სააგენტო EFE-სთან ინტერვიუში.
• „ძირითადი შეიარაღება აზერბაიჯანში რუსეთიდან ჩამოდის. ჩვენ ვყიდულობთ იარაღს სხვა ქვეყნებისგანაც. რატომღაც, ყველა მხოლოდ თურქეთზე ლაპარაკობს“, – აღნიშნა ალიევმა.
• „სომხეთის პრემიერ-მინისტრთან შეხვედრას აზრი არ აქვს. უკანასკნელი ორი წლის განმავლობაში, ბევრჯერ შევხვდი მას, თუმცა, უშედეგოდ, გამონაკლისი იყო პირველი შეხვედრები“, – განაცხადა აზერბაიჯანის პრეზიდენტმა.
ინფორმაცია ერევნიდან
• სომხეთმა ევროკავშირს აზერბაიჯანისთვის „აღმოსავლეთ პარტნიორობის“ პროგრამის გაყინვა შესთავაზა.
• სომხეთის მიერ რუსეთთან სამხედრო დახმარებაზე მოლაპარაკებები „სრულიად საიდუმლო“ რეჟიმში მიმდინარეობს, დეტალები ჯერჯერობით არ იქნება – საგარეო საქმეთა მინისტრის მოადგილე.
• ომის გამო, დაახლოებით, 33 ათასი ყარაბაღელი და საზღვრისპირა სოფლების სკოლების 10 ათასი მოსწავლე დისტანციურ სწავლებაზე გადავიდა, განაცხადა სომხეთის განათლების მინისტრის მოადგილემ.
• აზერბაიჯანმა სომხეთში, გეღარქუნიქის რაიონში, ოთხი სოფლის წინააღმდეგ გამოიყენა უპილოტო თვითმფრინავი. ყველა აპარატი განადგურდა, აღიძრა სისხლის სამართლის საქმე.
• „მსოფლიო ლიდერები კონფლიქტში თურქეთის როლს სათანადოდ ვერ აფასებენ. საუბარია თურქულ ტექნოლოგიებზე – თანამედროვე უპილოტო თვითმფრინავებზე, ზებგერით მოიერიშე F-16-ებზე, თურქეთში მომზადებულ სამხედროებზე, რომლებიც, რეალურად ხელმძღვანელობენ საბრძოლო მოქმედებებს“, – განაცხადა სომხეთის პრეზიდენტმა შვედურ საზოგადოებრივ რადიო Sveriges Radio AB-სთან ინტერვიუში.
მესამე მხარის განცხადებები
• მოსკოვმა კვლავ შეშფოთება გამოთქვა იმასთან დაკავშირებით, რომ ყარაბაღის კონფლიქტის ზონაში ჩადიან „ექსტრემისტი დაქირავებული მებრძოლები ახლო აღმოსავლეთიდან, რომლებიც ჯიჰადისტურ იდეოლოგიას მისდევენ“.
„აშკარაა სამხრეთ კავკასიაში, ახალი ტერორისტული ანკლავის გაჩენა“, – განაცხადა ბრიფინგზე, რუსეთის ფედერაციის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ.
• ყარაბაღში ჩარჩა 80 ჟურნალისტი, ისინი სომხეთში გადასვლას ვერ ახერხებენ – გადაკეტილია ლაჩინი-შუშისა და ვარდენისი-ქალბაჯარის გზები. ამის შესახებ, ტვიტერის საკუთარ გვერდზე, „რეპორტიორები საზღვრებს გარეშე“ წერს.
