ქართული კვალი თურქეთში დაკავებული სოციალური ქსელების ინფლუენსერების საქმეში
მეუღლეების ენგინის და დილან პოლატების საქმე
სოციალური ქსელების თურქი ინფლუენსერების, ენგინ და დილან პოლატების საქმეზე თურქულმა გამოძიებამ საქართველოსთან კავშირის შესახებ განაცხადა. პოლატების წყვილი სტამბოლში ფულის გათეთრების ბრალდებით დააკავეს. არსებული მონაცემებით, ყალბი კომპანიების მეშვეობით მათ მიერ ლეგალიზებული თანხების რეალური მფლობელი თურქეთის მოქალაქეა, რომელზეც 5 წლის წინ ბათუმში გამოძიება დაიწყო.
- აზერბაიჯანში TikTok-ზე წვდომა განბლოკეს
- დენიელ ფრიდი: საქართველო არასწორ ცხენზე დებს ფსონს, ევროპას არ სჭირდება კიდევ ერთი უნგრეთი
ენგინ პოლატი და მისი მეუღლე დილან პოლატი პირველ ნოემბერს სტამბოლში დააკავეს. თურქეთის სამართალდამცავი ორგანოების მიერ სტამბოლსა და თურქეთის ექვს პროვინციაში ერთდროულად ჩატარებული ოპერაციების შედეგად, პოლატებთან ერთად კიდევ 12 ადამიანი დააკავეს, მათ შორის მათი ნათესავები.
დილან პოლატი სოციალურ ქსელებში ცნობილი გახდა ვიდეოებით, სადაც ის და მისი ქმარი ქორწილში სტუმრად ყოფნის დროს დიდ თანხებს ჩუქნიან სიძე-პატარძალს. ასევე ერთ ვიდეოში პოლატი საჩუქრად იღებს ქმრისგან ვერტმფრენს. ისინი წარმოუდგენელ თანხებს ხარჯავენ სხვადასხვა სავაჭრო ცენტრებში. ასევე, პოლატი სვამს ყავას, რომელსაც ოქროს მტვერს აყრის და ამას ვიდეოზე იღებს.
9 მილიონი დოლარის გადარიცხვა ყალბი ქვითრების გამოყენებით
ფინანსური დანაშაულების გამოძიების დეპარტამენტის, MASAK-ის განცხადების თანახმად, 200 მილიონი ლირა [დაახლოებით 9,2 მილიონი აშშ დოლარი] ჩაირიცხა პოლატების ახლო ნათესავების ანგარიშებზე სამი კომპანიის მიერ ლიკვიდაციამდე გაცემული ყალბი ქვითრების საფუძველზე. მოგვიანებით გაირკვა, რომ ეს თანხები ბრუნავდა ოჯახის წევრების კუთვნილ კომპანიებს შორის და გროვდებოდა ენგინ პოლატის საკუთრებაში არსებულ უძრავი ქონების კომპანია Milda Gayrimenkul-ში – ამ ფულით მრავალი უძრავი ქონება და ძვირადღირებული მანქანა იყო შეძენილი.
MASAC-ის ოფიციალური განცხადების შემდეგ, საგადასახადო ინსპექციამ გაჩხრიკა პოლატების კუთვნილი 15 სამუშაო ადგილი და ჩამოართვა როგორც მეუღლეებს, ასევე მათი ახლო გარემოცვის წევრებს მოძრავი და უძრავი ქონება.
გენერალური პროკურატურის განცხადებით, წყვილს ბრალად ედება “დანაშაულებრივი გზით მიღებული შემოსავლის ლეგალიზაცია“, “გადასახადებისგან თავის არიდება“ და ფეხბურთსა და სპორტის სხვა სახეობებში ფსონების და აზარტული თამაშების ორგანიზების შესახებ კანონის No7258 მუხლის დარღვევა.
დერკან ბაშერი, ვეისელ შაჰინი და ოპერაცია “ჰანდიკაპი”
პოლატებზე გამოძიების დაჩქარების მოტივაცია სამართალდამცავებმა იმით განმარტეს, რომ 2018 წლიდან საქართველოს მართლმსაჯულებას ემალებოდა დერკან ბაშერი, რომელმაც ფული უკანონოდ მიითვისა.
დერკან ბაშერი 2017 წელს დააკავეს ოპერაცია „ჰანდიკაპის“ დროს. ის იყო იმ დანაშაულებრივი ჯგუფის წევრი, რომელიც ფლობდა უკანონო ტოტალიზატორებს და რომელსაც ხელმძღვანელობდა ვეისელ შაჰინი. გამოძიების მასალების მიხედვით, შაჰინის არალეგალური ტოტალიზატორების ქსელი სხვადასხვა ქვეყანებში სულ ხუთ მილიარდამდე ევროს აკონტროლებდა.
“ჰანდიკაპის” სასამართლო პროცესზე, რომელშიც 59 ადამიანი იყო ბრალდებული, დერკან ბაშერს ბრალი ედებოდა ჩრდილოეთ კვიპროსის თურქულ რესპუბლიკაში მცხოვრები ვეისელ შაჰინის თურქეთის ქსელის არალეგალური ტოტალიზატორების ხელმძღვანელეობაში. მოსამართლემ მას ცხრა წლითა და სამი თვით თავისუფლების აღკვეთა მიუსაჯა.
მაგრამ დერკან ბაშერი გაათავისუფლეს 2017 წლის 26 აპრილს, სასამართლოს განაჩენის გამოცხადებამდე ორი კვირით ადრე. ფაქტია, რომ ვეისელ შაჰინის, დერკან ბაშერის და კიდევ ორი ბრალდებულის ადვოკატებმა აღკვეთის ღონისძიების შესაცვლელად საკასაციო საჩივარი შეიტანეს.
მიუხედავად იმისა, რომ საჩივარი პირველ ინსტანციაში არ დაკმაყოფილდა, ზემდგომმა ორგანომ საჩივარი დააკმაყოფილა. ბაშერი და მეტრისის ციხეში მყოფი კიდევ ორი სხვა ბრალდებული დაუყოვნებლივ გაათავისუფლეს. რაც შეეხება სილივრის ციხეში მყოფ შაჰინს, მისი დოკუმენტაცია გაჭიანურდა, ორი საათის შემდეგ კი, პროკურატურის მოთხოვნით, საქმე განიხილეს და მათი გათავისუფლების გადაწყვეტილება გაუქმდა.
ვეისელ შაჰინი დარჩა ციხეში, ხოლო დერკან ბაშერმა მოახერხა ქვეყნიდან გაქცევა.
კავშირი გალიფ ოზთურქთან
გავრცელებული ინფორმაციით, საქართველოში გაქცეული დერკან ბაშერი ისევ იქ ცხოვრობს და არალეგალური ტოტალიზატორების დიდ ბაზარს აკონტროლებს.
თურქული მედიის ცნობით, თურქეთში დერკან ბაშერის მიერ მართული ორი ტოტალიზატორის საიტის ყოველდღიური ბრუნვა ექვსი მილიონი ლირაა (დაახლოებით $276 ათასი).
ასევე ვრცელდება ინფორმაცია, რომ დერკან ბაშერი მუშაობდა 2018 წელს საქართველოში გაქცეულ თურქეთის კიდევ ერთ მოქალაქესთან – კომპანია Metro Turizm-ის მფლობელთან, გალიფ ოზთურქთან ერთად. ეს უკანასკნელი საქართველოში მას შემდეგ გაიქცა, რაც მასზე შეკვეთილი მკვლელობისთვის დაკავების ორდერი გამოიცა.
რამდენიმე ხნის წინ თურქულ მედიაში დერქან ბაშერის ფოტო გავრცელდა გალიფ ოზთურქთან ერთად. გავრცელებული ინფორმაციით, ეს ფოტო გადაღებულია Ocakbaşı-ის რესტორანში, რომელიც ბათუმში, დერკან ბაშერის საკუთრებაშია. გალიფ ოზთურქი ასევე, სავარაუდოდ, ფლობს სავაჭრო ცენტრს და სასტუმროს ბათუმში.
ოზთურქს, რომელიც 2022 წლის მაისში ბათუმში, საკუთარ სახლში, 7.2 კგ კოკაინთან ერთად დააკავეს, ქართულმა სასამართლომ რვა წლით თავისუფლების აღკვეთა მიუსაჯა.
2021 წლის იანვარში დერკან ბაშერი ინტერპოლის წითელი ცირკულარით ძებნილთა სიაში შეიყვანეს. ამის შემდეგ ის ქართულმა პოლიციამ დააკავა, მაგრამ სამი დღის შემდეგ გაათავისუფლა.
