თურქეთში სამუშაოდ წასვლაზე განცხადება 1366-მა ადამიანმა შეიტანა, აქედან 600 უკვე წავიდა
27 ივლისიდან, მას შემდეგ, რაც მთავრობამ საქართველოს მოქალაქეებს თურქეთში მყოფი დამსაქმებლის მხრიდან 3-თვიანი მიწვევის წარდგენის შემთხვევაში ამ ქვეყანაში სამუშაოდ წასვლის უფლება მისცა, მეზობელ ქვეყანაში სამუშაოდ უკვე 600-მდე ადამიანი გადავიდა.
აჭარის დასაქმების სააგენტოს ინფორმაციით, სააგენტოში თურქეთში სამუშაოდ წასვლის თაობაზე 1366 განცხადება შევიდა, მათგან წასვლის ნებართვა 1018-მა ადამიანმა მიიღო.
თურქეთში სამუშაოდ წასვლის მსურველმა ნებართვის მისაღებად რეგისტრაცია უნდა გაიაროს პორტალზე – https://abroadworkers.moh.gov.ge/.
განცხადებას განიხილავს სპეციალურად შექმნილი სამუშაო ჯგუფი. პასუხს განმცხადებელი მოკლე ტექსტური შეტყობინებების სახით 7 დღის განმავლობაში მიიღებს.
თურქეთში სამუშაოდ წასვლის ნებართვის მისაღებად საჭიროა:
თურქეთის რესპუბლიკის მოქალაქე ფიზიკური პირის ან თურქეთის რესპუბლიკაში რეგისტრირებული იურიდიული პირის მიერ გაცემული ნოტარიულად დამოწმებული მიწვევა.
მიწვევაში უნდა იყოს მითითებული მიწვეული საქართველოს მოქალაქის სახელი, გვარი, პირადი ნომერი და მიწვევის პერიოდი – სამი თვე.
მიწვევის ნოტარიულად დამოწმებული თარგმანი ქართულ ენაზე და მობილური ტელეფონის ნომერი.
• რამდენს კარგავს საქართველო კორონავირუსის გამო? საგარეო ვაჭრობა პანდემიის დროს – ციფრები
• კორონავირუსი ლილოში. ფოტორეპორტაჟი
თურქეთიდან უკან, სამშობლოში დაბრუნების შემდეგ, საქართველოს მოქალაქეებმა 2-კვირიანი სავალდებულო კარანტინი უნდა გაიარონ.
კორონავირუსის ეპიდემიის გამო საქართველო-თურქეთის საზღვარი 16 მარტს ჩაიკეტა, რის გამოც საქართველოს უამრავი მოქალაქე უმუშევარი დარჩა.
ყოველწლიურად თურქეთში სამუშაოდ საქართველოს ათასობით მოქალაქე მიდის. მათი დიდი ნაწილი სეზონურ სამუშაოებზე, მაგალითად თხილის კრეფაზე, ან სამომხმარებლო სექტორშია დასაქმებული.
ბოლო 2 თვის განმავლობაში საქართველო-თურქეთის საზღვრის გახსნის მოთხოვნით აჭარის მთავრობასთან არაერთი აქცია გაიმართა. აქციის მონაწილეები აცხადებდნენ, რომ ჩაკეტილი საზღვრის გამო მათ დასაქმების ერთადერთი რეალური შესაძლებლობა და შემოსავლის წყარო დაკარგეს და ოჯახებით შიმშილის ზღვარზე აღმოჩნდნენ.
