თურქეთი ტურისტული სეზონის გახსნას უკვე მაისის ბოლოს გეგმავს. როგორ მოხდება ამის ორგანიზება
წყარო – Hurriyet
თუკი ახალი პრობლემები არ წარმოიქმნება – მაისის ბოლოს, თურქეთი, შიდა ტურიზმს განაახლებს და შიდა ფრენებს დაუშვებს.
თუმცა, კურორტებზე სიტუაცია მნიშვნელოვნად შეიცვლება, კერძოდ, აკრძალული იქნება ბუფეტების პოპულარული პრაქტიკა, რადგან ის პატარა სივრცეში ბევრი ადამიანის თავშეყრას იწვევს.
ასევე, სავარაუდოდ, გაიზრდება ფასები – პროფილაქტიკური ზომების მთელი სისტემის გამო, რათა არ დაუშვან კორონავირუსის ინფექციის ახალი აფეთქება.
29 აპრილის მონაცემებით, თურქეთი COVID-19-ით ინფიცირებულთა რაოდენობით, მსოფლიოში, მეშვიდე ადგილზეა. საერთო ჯამში, ქვეყანაში, 115 ათასამდე ინფიცირებულია, მათგან სამი ათასამდე გარდაიცვალა.
როგორც თურქეთის კულტურისა და ტურიზმის მინისტრმა, მეჰმეთ ერსოიმ განაცხადა, თურქეთში უკვე შეიქმნა სერტიფიცირების სპეციალური კომისია, რომელმაც ტურისტული ობიექტებისთვის წესები შეიმუშავა.
- კომისია მუდმივად შეამოწმებს სასტუმროებსა და რესტორნებს და ყოველ ჯერზე ახალ ცნობას გასცემს იმის შესახებ, რომ ისინი დამუშავებულია ვირუსის წინააღმდეგ.
- რეგულარულად ჩატარდება ტრანსპორტის სანიტარული დამუშავება, რომლითაც ტურისტებს ემსახურებიან. მძღოლები სპეციალური ტრენინგს გაივლიან, სადაც პანდემიის პირობებში მუშაობას ისწავლიან.
- აეროპორტები, სასტუმროები, რესტორნები, მუზეუმები და არქეოლოგიური ობიექტები მოერგებიან სოციალური დისტანცირების მოთხოვნებს.
- ყველა კურორტზე მზად იქნებიან ექიმები და დამონტაჟდება სპეციალური აპარატურა, მათ შორის, თერმული სკრინინგის, რომელიც ტემპერატურის გასაზომად გამოიყენება.
- მოხდება სამედიცინო ინფრასტრუქტურის ინვენტარიზაცია, მათ შორის, ინტენსიური თერაპიისა და ხელოვნური სუნთქვის აპარატების და მათ შედეგებს ტუროპერატორებს გააცნობენ.
მაისის ბოლოს, თურქეთი, რამადანის დასრულებას აღნიშნავს.
“ამასთან დაკავშირებით, ტურიზმის გამოცოცხლებას ველით ისეთ დასახლებებში, როგორებიცაა შოგუთი, სელემიე და ბოზბურუნი. მოთხოვნადი იქნება აპარტ-ოტელები და სასტუმრო სახლები”, – მიაჩნია მარმარისის მერს, მემეთ ოქთაის.
მისი თქმით, განიხილება პლაჟებზე შეზლონგების რაოდენობის ორჯერ შემცირების შესაძლებლობა.
«ველით, რომ თავდაპირველად გამოჩნდებიან მოიჯარეები, გარკვეული დროის შემდეგ კი – სასტუმროს სტუმრები», – თქვა ბოდრუმის მერმა, აჰმეთ არასმა. ქალაქში, მკაცრად გაკონტროლდება სტუმრების რაოდენობა ყველა რესტორანში, ღამის კლუბებსა და პლაჟებზე.
საექსკურსიო გემებზე არ დაიშვება 12 ადამიანზე მეტი.
საგარეო ტურიზმი
შიდა ტურიზმის შემდეგ, თურქეთი საკუთარი კურორტების უცხოელებისთვის გახსნასაც აპირებს.
ტურიზმის მინისტრის თქმით, ივლისის შუა პერიოდიდან ელოდებიან ტურისტების გამოჩენას აზიის ქვეყნებიდან, შემდეგ კი გამოცოცხლდება ისეთი მიმართულებები, როგორებიცაა გერმანია და ავსტრია. ბოლო ეტაპზე, მაგრამ ასევე 2020 წლის სეზონზე, მეჰმეთ ერსოი ელოდება ტურისტებს დიდი ბრიტანეთიდან და რუსეთიდან.
2019 წელი თურქეთის ტურისტული სექტორისთვის სარეკორდო იყო. 52 მილიონმა ტურისტმა ქვეყანას, დაახლოებით, 35 მილიარდი დოლარი მოუტანა.
