ტიმოთი სნაიდერი: 15 მიზეზი, თუ რატომ არის უკრაინის გამარჯვება კაცობრიობისთვის მნიშვნელოვანი
ტიმოთი სნაიდერი უკრაინაზე
ცნობილმა ამერიკელმა ისტორიკოსმა, წიგნების ”სისხლის მიწები: ევროპა ჰიტლერსა და სტალინს შორის” და “ტირანიის შესახებ” ავტორმა ტიმოთი სნაიდერმა თავის ბლოგზე გამოაქვეყნა პოსტი, რომელშიც მოკლედ ჩამოაყალიბა მიზეზები, რის გამოც კაცობრიობას ძალიან სჭირდება უკრაინის გამარჯვება.
ჩემთვის, როგორც პოლიტიკური სისასტიკეების მკვლევრისთვის, პირველი პუნქტი – გენოციდის დასრულება – საკმარისზე მეტი მიზეზია უკრაინის მოგება მინდოდეს. თუმცა, დანარჩენ 14 პუნქტსაც დიდი მნიშვნელობა აქვს: „თითოეული მათგანი განასახიერებს შესაძლებლობას, რომელზეც პოლიტიკოსების თაობები ოცნებობდნენ, მაგრამ ეს ოცნებები არასოდეს ახდა. ასეთი რამ ცხოვრებაში ერთხელ ხდება და ამ შანსის ხელიდან გაშვება არ შეიძლება. ბევრი რამ უკვე გაკეთდა [უკრაინის მიერ], თუმცა ჩვენ ჯერ ვერ მოვახერხეთ ამ მომენტის სრულად გამოყენება.
„უკრაინელები გვაძლევენ შანსს, შემოვაბრუნოთ ამ საუკუნის ტენდენციები; მოვიპოვოთ თავისუფლება და უსაფრთხოება, რომელსაც ჩვენ ვერასდროს მივაღწევდით ჩვენი ძალისხმევით. ერთადერთი, რაც გვევალება – უნდა დავეხმაროთ მათ გამარჯვებაში.”
_________
ეს არის 15 მიზეზი, თუ რატომ არის უკრაინის გამარჯვება მნიშვნელოვანი მთელი მსოფლიოსთვის:
1. სისასტიკის შესაჩერებლად. რუსული ოკუპაცია არის გენოციდი. ტერიტორიებზე, რომლებსაც იბრუნებენ უკრაინელები, არ ხდება ადამიანების სიცოცხლის ხელყოფა. პირიქით, ისინი გადაარჩენენ სიცოცხლეს, აღადგენენ ადამიანების ფუნდამენტურ უფლებას, არ გახდნენ წამების, დეპორტაციის და მკვლელობის მსხვერპლნი.
2. საერთაშორისო სამართლებრივი წესრიგის შესანარჩუნებლად. ამ წესრიგის საფუძველია ის, რომ არცერთ ქვეყანას არ აქვს უფლება შეიჭრას სხვის ტერიტორიაზე და შემოიერთოს იგი (რასაც აკეთებს რუსეთი). რუსეთის აგრესიული ომი, რა თქმა უნდა, უკანონოა, თუმცა სამართლებრივ წესრიგს საკუთარი თავის დაცვა უჭირს.
3. იმპერიების ეპოქის დასასრულებლად. შესაძლოა, ეს არის ბოლო ომი, რომელიც კოლონიურ ლოგიკით მიმდინარებს. ამ ლოგიკის თანახმად, სახელმწიფო და ხალხი, რომელსაც თავს ესხმი, უბრალოდ „არ არსებობს“. თუმცა, იმპერიალიზმს წერტილი მხოლოდ იმ შემთხვევაში დაესმება, თუ რუსეთი წააგებს.
4. ევროკავშირის სამშვიდობო იდეის დასაცავად. რუსეთის ომი მიმართულია არა მხოლოდ უკრაინის წინააღმდეგ, არამედ უფრო ფართო იდეის წინააღმდეგ, რომ ევროპულ სახელმწიფოებს მშვიდობიანი თანამშრომლობა არ შეუძლიათ. თუ იმპერია გაიმარჯვებს, ევროინტეგრაცია დაინგრევა.
5. რათა რუსეთში კანონის უზენაესობას შანსი მიეცეს. სანამ რუსეთი იმპერიულ ომებს აწარმოებს, მისი საშინაო პოლიტიკა რეპრესიული რჩება. რუსების მომავალ თაობებს შეეძლებათ უკეთესად და თავისუფლად ცხოვრება მხოლოდ იმ შემთხვევაში, თუ რუსეთი წააგებს ამ ომს.
6. ტირანიის პრესტიჟის შესასუსტებლად. ამ საუკუნის ტენდენცია ავტორიტარიზმისკენაა მიმართული, პუტინიზმი კი მისი სიმბოლოა. თუკი დემოკრატია ტირანიაზე გაიმარჯვებს, ეს ტენდენცია შეიცვლება: ფაშიზმი ხომ ძალაუფლების კულტია, მისი დისკრედიტირება მარცხს შეუძლია.
7. რათა შეგვახსენოს ყველას, რომ დემოკრატია საუკეთესო სისტემაა. უკრაინელებმა შეისისხლხორცეს აზრი, რომ თავად ირჩევენ საკუთარ ლიდერებს. საკუთარი დემოკრატიის დასაცავად უკრაინელები დიდ რისკზე მიდიან და ამით გვახსენებენ, რომ ჩვენ ყველამ უნდა გავიღოთ რისკი ჩვენი დემოკრატიის დასაცავად.
8. ევროპაში დიდი ომის საფრთხის აღმოსაფხვრელად. ათწლეულების მანძილზე სსრკ-სთან და შემდეგ რუსეთთან კონფრონტაცია რეგიონული ომის მთავარი სცენარი იყო. უკრაინის გამარჯვება ამ სცენარს აღმოფხვრის და რუსეთის ახალ აგრესიას შეუძლებელს გახდის.
9. აზიაში დიდი ომის საფრთხის აღმოსაფხვრელად. ბოლო წლებში, ჩინეთის ტაივანში შესაძლო შეჭრას გლობალური ომის დაწყების მთავარ სცენარად განიხილავენ. უკრაინის გამარჯვება კი ასწავლის პეკინს, რომ მსგავსი აგრესია ძვირი ჯდება და დიდი ალბათობით წარუმატებელიც იქნება.
10. ბირთვული იარაღის გავრცელების თავიდან ასაცილებლად. უკრაინამ 90-იან წლებში უარი თქვა ბირთვული იარაღზე. დღეს რუსეთი, რომელსაც ბირთვული შეიარაღება აქვს, შეიჭრა ამ ქვეყანაში. თუკი უკრაინა დამარცხდება, ეს იქნება სიგნალი ბევრი ქვეყნისთვის, რომ ბირთვული იარაღის ქონა აუცილებელია საკუთარი თავის დასაცავად. ქვეყნები, რომლებსაც შეუძლიათ ბირთვული იარაღის შექმნა, მივლენ დასკვნამდე, რომ მათ ის აუცილებლად სჭირდებათ.
11. ბირთვული ომის რისკის შესამცირებლად. უკრაინის გამარჯვება ნაკლებად სავარაუდოს ხდის ომს ბირთვულ სახელმწიფოების მონაწილეობით და, ზოგადად, ბირთვული იარაღის გავრცელების წინააღმდეგ იმუშავებს. არაფერი არ შეამცირებს ბირთვული ომის რისკს ისე, როგორც უკრაინის გამარჯვება.
12. ბუნებრივი რესურსებისთვის მომავალი ომის თავიდან ასაცილებლად. დაჯგუფება “ვაგნერის” მთავარი დაინტერესება ამ ომში ბუნებრივი რესურსებია. გარდა იმისა, რომ “ვაგნერი” მუდმივად სჩადის სამხედრო დანაშაულებს, იგი ითვისებს ბუნებრივ რესურსებს ყველგან, სადაც კი შეუძლია. სწორედ ამისთვის იბრძვის “ვაგნერი” ბახმუტში.
13. სურსათის მარაგის უზრუნველსაყოფად და გლობალური შიმშილის თავიდან ასაცილებლად. უკრაინა მსოფლიოს მნიშვნელოვან ნაწილს კვებავს. რუსეთი ამ საკვებს იარაღად იყენებს. როგორც რუსმა პროპაგანდისტმა, მარგარიტა სიმონიანმა თქვა თქვა, “ერთადერთი იმედი შიმშილია”.
14. წიაღისეულ საწვავზე დამოკიდებულებისგან გასათავისუფლებლად. პუტინმა მთელ მსოფლიოს აჩვენა, თუ რა საფრთხეს უქმნის ნახშირწყალბადის ოლიგარქია კაცობრიობის მომავალს. მან იარაღად გამოიყენა ენერგიის მიწოდება, რამაც დააჩქარა შემობრუნება განახლებადი ენერგიისკენ. ეს პროცესი გაგრძელდება, თუ რუსეთი დამარცხდება.
15. თავისუფლების ღირებულების განსამტკიცებლად. მიუხედავად იმისა, რომ მათ აქვთ ყველა მიზეზი, განსაზღვრონ თავისუფლება, როგორც რაღაცის წინააღმდეგ ბრძოლა (ამ შემთხვევაში რუსული ოკუპაციის) , უკრაინელები შეგვახსენებენ, რომ სინამდვილეში თავისუფლება არა ვიღაცის წინააღმდეგ, არამედ რაღაცისთვის ბრძოლაა – უფლებისთვის, რომ იყვნენ ისეთები, როგორებიც უნდათ, რომ იყვნენ მომავალში. იმ მომავალში, რომლის შექმნაშიც ისინი დღეს ეხმარებიან მსოფლიოს.
