თენგიზ ფხალაძის კომენტარი: არ უნდა შევეგუოთ იმ რეალობას, რომ დღეს უკრაინასა და მოლდოვასთან შედარებით ერთი ნაბიჯით უკან ვართ
თენგიზ ფხალაძის კომენტარი
საქართველოს ექსპრეზიდენტის, გიორგი მარგველაშვილის ყოფილი მრჩეველი საგარეო ურთიერთობის საკითხებში და ექსპერტი თენგიზ ფხალაძე ათენში, დასავლეთ ბალკანეთის სამიტს “ინტერპრესნიუსთან” ეხმაურება, რომელზეც უკრაინასთან და მოლდოვასთან ერთად საქართველო მიწვეული არ იყო. ფხალაძის თქმით, თუ “ჩვენ შევეგუეთ” იმას, რომ უკრაინასა და მოლდოვასთან შედარებით ერთი ნაბიჯით “უკან ვართ”, ხვალ “აუცილებლად ვიქნებით” ორი და სამი ნაბიჯით უკან.
21 აგვისტოს ათენში დასავლეთ ბალკანეთის სამიტი გაიმართა, რომელსაც ევროკავშირის კანდიდატი და პოტენციური კანდიდატი 8 ქვეყნის ლიდერები ესწრებოდნენ.
საბერძნეთის დედაქალაქში იმყოფებოდნენ კანდიდატი ქვეყნების, უკრაინისა და მოლდოვის პრეზიდენტები, ვოლოდიმირ ზელენსკი და მაია სანდუ. ათენში გამართულ ფორუმში არ მონაწილეობდა საქართველო.
ათენში არ ყოფნის მიზეზები საქართველოს საგარეო საქმეთა სამინისტროს ევროინტეგრაციის დეპარტამენტის გენერალურმა დირექტორმა, არჩილ ყარაულაშვილმა განმარტა და აღნიშნა, რომ ათენში, სამხრეთ-აღმოსავლეთ ევროპის 11 ქვეყნის ლიდერების მონაწილეობით გამართული სამიტი არ იყო ევროკავშირის მიერ ორგანიზებული ღონისძიება.
მისივე თქმით, ღონისძიების მთავარი თემა იყო უკრაინა-რუსეთის ომი და სწორედ ამიტომ იყო მიწვეული მოლდოვა და უკრაინა.
თენგიზ ფხალაძე: “შემიძლია გითხრათ, რომ სამიტი ნამდვილად მნიშვნელოვანი იყო. სამიტი დაკავშირებული იყო გაფართოების თემასთან, ამას ადასტურებს, თუნდაც შარლ მიშელის განცხადება, რომელიც მან სოციალურ ქსელში თავად გამოაქვეყნა. ეს იყო მნიშვნელოვანი ღონისძიება და ძალიან კარგი იქნებოდა ჩვენ ვყოფილიყავით.
ზოგადად, ჩვენ არ უნდა შევეგუოთ იმ რეალობას, რომ დღეს უკრაინასა და მოლდოვასთან შედარებით ერთი ნაბიჯით უკან ვართ, შემგუებლობა ამის მიმართ არ უნდა დავამკვიდროთ, იმიტომ, რომ ჩვენ თუ ამის მიმართ შემგუებლობა დავამკვიდრეთ, მაშინ ხვალ ორი ნაბიჯით უკან აღმოვჩნდებით. ყველაფერი უნდა გავაკეთოთ იმისთვის, რომ გადავიდეთ კანდიდატი ქვეყნების კლუბში. ეს არის ძალიან მნიშვნელოვანი.
ზოგადად, უნდა დავესწროთ აბსოლუტურად ყველა ღონისძიებას, სადაც განიხილება ევროკავშირის გაფართოების საკითხები და ყველა ის საკითხი, რომელიც საქართველოსთვის შეიძლება იყოს აქტუალური. ყველა ფორმატი უნდა იყოს გამოყენებული. ბევრი რამ შეიძლება ითქვას, რატომ არ ვესწრებოდით. ფაქტია, რომ არ ვესწრებოდით და ესაა ცუდი! უნდა გავაკეთოთ ის, რომ მომავალში დავესწროთ.
ბევრი ინტერპრეტაცია შეიძლება მოვისმინოთ, მაგრამ საკითხი რომ მნიშვნელოვანი იყო, ამას ადასტურებს, თუნდაც შარლ მიშელის ოფიციალური პოსტი „ფეისბუქსა“ და „ტვიტერზე“. იქ არის კარგად აღწერილი, თუ რას ეძღვნებოდა სამიტი და იქ რომ ნამდვილადაა გაფართოების თემები და ის, რომ იყო მნიშვნელოვანი.
მომავალში ყველაფერი უნდა გავაკეთოთ იმისთვის, რომ ასეთ ღონისძიებებზე საქართველო იყოს წარმოდგენილი. ასეთ ღონისძიებებზე არყოფნა ჩვენთვის არის ცუდი, ეს არის აქსიომა. უნდა მივიღოთ აქტიური მონაწილეობა და გარდა ამისა, ქვეყნის შიგნითაც უნდა ვაკეთებდეთ ყველაფერს, რომ კანდიდატის სტატუსიც მივიღოთ და მოლაპარაკებებიც გაიხსნას.
ახლა განიხილება ძალიან მნიშვნელოვანი საკითხი იმასთან დაკავშირებით, თუ როგორი იქნება ევროკავშირის შემდგომი გაფართოება, ეს იქნება 35 თუ 37 სახელმწიფო. ჩვენ ყველაფერი უნდა გავაკეთოთ, რომ ამ გაფართოების შემდგომ ტალღაში საქართველო მოიაზრებოდეს. ჩვენ თუ შევეგუეთ იმას, რომ ვართ ერთი ნაბიჯით უკან დღეს და ამის მიმართ შემგუებლობა დავამკვიდრეთ, ხვალ აუცილებლად ვიქნებით ორი და სამი ნაბიჯით უკან.“
● ევროკავშირში საქართველოს ყოფილი ელჩი: NATO-ს კონტექსტში უკრაინისგან დაშორება რთული სანახავია
● ზურაბ ბატიაშვილის მოსაზრება: საქართველო, რომელიც თავის დროზე რეფორმების მედროშე იყო, ახლა ყველაზე ჩამორჩენილ ჯგუფშია
● “იმედგაცრუებული ვართ, რომ საქართველო სანქციებს არ ასრულებს, თუმცა გვესმის” – რა თქვა სანქციების ოფისმა
