ბათუმელი მედროშე თემურ ქათამაძე თურქეთში გააძევეს
თემურ ქათამაძე თურქეთში გადაიყვანეს
ბათუმის აქციების დროს დაკავებული თემურ ქათამაძე თურქეთში გააძევეს. ინფორმაციას ამის შესახებ მისი საცოლე, ნინო კაკულია ადასტურებს. ქათამაძე გუშინ ღამეს, არდაღანში გადაიყვანეს. კაკულია ამბობს, რომ ეს ადგილი, სარფისგან მოშორებით განზრახ შეირჩა, რადგანაც იყო ინფორმაცია, რომ სარფთან მედროშის მხარდამჭერი აქცია იგეგმებოდა. მისივე ცნობით, ქათამაძეს ქალაქ ორდუში გადაიყვანენ, სადაც მასზე საქმეა აღძრული.
შინაგან საქმეთა მინისტრის მოადგილის, ალექსანდრე დარახველიძის თქმით, საქართველოდან თემურ ქათამაძის გაძევება “საქართველოს კანონმდებლობის სრული დაცვით” მოხდა.
“ხაზგასმით აღვნიშნავთ, რომ მისი გაძევება მოხდა საქართველოს კანონმდებლობის სრული დაცვით, სასამართლოს მიერ კანონიერ ძალაში შესული გადაწყვეტილების შესაბამისად. აღნიშნული პირის საქმესთან დაკავშირებით სასამართლოს 8 სხვადასხვა ინსტანციაში ჩატარდა განხილვები და სასამართლომ სრულად გაიზიარა შსს-ს მიგრაციის დეპარტამენტის პოზიცია.
ასევე, დაცვის მხარემ დროებითი ღონისძიების მოთხოვნით მიმართა ადამიანის უფლებათა ევროპულ სასამართლოს, რომელმაც მისი მოთხოვნა არ დააკმაყოფილა. გაფარ ილმაზმა არ ისარგებლა ქვეყნის ნებაყოფლობით დატოვების შესაძლებლობით, შესაბამისად, მისი გაძევება იძულების წესით მოხდა საქართველოს კანონმდებლობის მოთხოვნის შესაბამისად”, – თქვა მან ბრიფინგზე.
კომენტარი
თამთა მიქელაძე, “სოციალური სამართლიანობის ცენტრის” ხელმძღვანელი:
“ახლა გამოვიდა ბრიფინგი შსს მინისტრის მოადგილე, ალექსანდრე დარახველიძე და აღიარა იძულებით გავაძევეთ თემურ ქათამაძეო. პროტოკოლის მიხედვით, მისი თურქული სახელი და გვარი წარმოთქვა.
ანუ შსს-მ აღიარა, რომ 1 საათითაც არ დააყოვნა და თემურ ქათამაძე დაუყოვნებლივ იძულებით გააძევა საქართველოდან, ისე რომ მის პარტნიორთან და ჩვენთანაც კი ვერ გააზიარა ეს ამბავი.
კარგად იცოდნენ, რომ სტრასბურგის შემდეგ, გაეროს ადამიანის უფლებათა კომიტეტისთვის გვქონდა მიმართული და ერთი ზედმეტი დღეც არ მისცეს თემურ ქათამაძეს, რომ ბოლომდე ამოგვეწურა საერთაშორისო მექანიზმების რესურსი.
უმოწყალო – ჩემთვის ეს ტერმინი ამ სისტემის ყველაზე კარგი აღმნიშვნელია.”
ვინ არის თემურ ქათამაძე
მუჰაჯირების შთამომავალი, 56 წლის თემურ ქათამაძე [გაფფარ ილმაზი] საქართველოში ლტოლვილის სტატუსის მოსაპოვებლად იბრძოდა. მანამდე მას სამჯერ უთხრეს უარი საქართველოს მოქალაქის უფლებებზე.
1968 წელს, თურქეთში დაბადებული ქათამაძე, როგორც თავად ამბობს, მუჰაჯირების მეოთხე თაობას წარმოადგენს. მისი წინაპრებიც, მე-19 საუკუნის 70-იანი წლების მიწურულს, აჭარაში რუსეთის გაბატონების შემდეგ, კვლავ იძულებით გადასახლდნენ ოსმალეთის იმპერიაში, დღევანდელი თურქეთის ტერიტორიაზე.
ქართული ენის, ისტორიისა და კულტურის გულშემატკივარი, ხშირად ქართულ სამოსში გამოწყობილი თემურ ქათამაძე ხალხმა დაკავებამდე გაიცნო და “ბათუმელი მედროშე“, “მედროშე ბაბუ” შეარქვა. თემურ ქათამაძე ბათუმის აქციებზე ყოველთვის საქართველოს დროშით ხელში იდგა – ჯერ კიდევ რუსული კანონის წინააღმდეგ პროტესტის დროიდან, ბოლო უწყვეტი აქციების ჩათვლით.
თურქეთში, ქალაქ სტამბოლში დაბადებული თემურ ქათამაძე საქართველოში პირველად 1991 წელს ჩამოვიდა და აღმოაჩინა, რომ თურქეთში ნასწავლი ქართული ენა თანამედროვე ქართულისგან განსხვავდებოდა. საქართველოდან წაღებული სახელმძღვანელოებითა და მასალებით, ენის დახვეწა დაიწყო, წლების შემდეგ კი, საქართველოს მოქალაქეობის მოპოვების რთულ გზას შეუდგა, თუმცა უშედეგოდ.
თემურ ქათამაძე პოლიციამ ორჯერ დააკავა. პირველად 11 იანვარს ბათუმის პოლიციის სამმართველოსთან აქციაზე, ხოლო მეორედ 17 იანვარს, იზოლატორიდან გამოსვლის დღეს. ქათამაძის მიერ “ბათუმელებისთვის” გამოგზავნილ წერილში რეჟიმის პატიმარი წერდა, რომ დაკავებისას მასზე ფიზიკურად იძალადა ირაკლი დგებუაძემ და 10-მა პოლიციელმა.
“საქართველოში გატარებული 13 წლის განმავლობაში ივანიშვილის რეჟიმის მსხვერპლი არაერთხელ გავხდი… და ბოლოს როგორც ბათუმის აქციების “მედროშე ბაბუ“ ივანიშვილის რეჟიმის პოლიტიკური რეპრესიების მსხვერპლი გავხდი. ჩემი შეფასებით ჯერ ბათუმში, აქციის დროს უკანონო დაკავება, შემდეგ კი ქვეყნიდან გაძევების მიზნით ხელმეორე დაკავება იყო “ქართული ოცნების“ პოლიტიკური დაკვეთა, მიმართული ჩემზე შურის საძიებლად წლების მანძილზე მოქალაქეობისთვის ჩემი ბრძოლისა და ოპოზიციური პოლიტიკური შეხედულებების გამო.” – წერდა თემურ ქათამაძე ციხიდან გამოგზავნილ წერილში.
