სუსი: სოხუმმა დაადასტურა გალში საქართველოს მოქალაქის, თემურ კარბაიას გარდაცვალების ფაქტი
თემურ კარბაიას გარდაცვალება
საქართველოს უსაფრთხოების სამსახურში აცხადებენ, რომ სოხუმმა დაადასტურა საქართველოს მოქალაქის გარდაცვალების ფაქტი, თუმცა საოკუპაციო რეჟიმს არ დაუდასტურებია თემურ კარბაიას უკანონოდ დაკავების მცდელობა და მის წინააღმდეგ სამართალდამცავების მხრიდან ძალადობა.
ფაქტს ეხმაურება პრეზიდენტი ზურაბიშვილი, სახალხო დამცველი გამოძიებას ითხოვს.
რა მოხდა
საქართველოს მოქალაქე, 43 წლის თემურ კარბაია აფხაზეთში, გალში ადგილობრივი პოლიციის მხრიდან ძალადობის შედეგად გარდაიცვალა, იუწყება ქართული მედია კარბაიას ოჯახის წევრებზე დაყრდნობით.
გავრცელებული ინფორმაციით, კარბაია გალში, ქუჩაში ე.წ. მილიციელებმა გააჩერეს საბუთების შესამოწმებლად, შემდეგ დააკავეს და სასტიკად სცემეს. საქართველოს მოქალაქე სოხუმის საავადმყოფოში გადაიყვანეს, სადაც იგი მიყენებული ტრავმების შედეგად 9 დეკემბერს ღამე გარდაიცვალა.
ახლობლების ინფორმაციით, გარდაცვლილს სხეულს მრავლობითი დაზიანებები აღენიშნებოდა – სისხლჩაქცევები და მოტეხილობები.
„ყველგან აქვს დაზიანებები. განადგურებულია, ნეკნები, გვერდები, ძვლები დამტვრეული აქვს… ფაქტი გუშინ წინ მოხდა. ამის შემდეგ კომაში იყო და გუშინ ღამე გარდაიცვალა საავადმყოფოში… ჯერ-ჯერობით სხვა არაფერი ვიცით. არ ვიცი, ექსპერტიზა ჩაუტარდა თუ არა ცხედარს…გამოძიება თუ დაიწყო, არც ეს ვიცით. ქუჩაში მიდიოდა და დააკავეს. მარტო ეს ვიცით. სამი ადამიანი სცემდაო“, – უთხრა “რადიო თავისუფლების” კორესპონდენტს თემურ კარბაიას ძმის ცოლმა, რომელიც ოჯახთან ერთად ზუგდიდში ცხოვრობს.
საქართველოს სახელმწიფო უსაფრთხოების სამსახურში აცხადებენ, რომ მომხდარის გარემოებებს არკვევენ, ამოქმედებულია ევროკავშირის დამკვირვებელთა მისიის „ცხელი ხაზი“.
„აღნიშნულ ინციდენტთან დაკავშრებით გააქტიურდა ევროკავშირის სადამკვირვებლო მისიის ჩართულობით მოქმედი ცხელი ხაზი. გაზიარებული ინფორმაციით, საოკუპაციო რეჟიმის წარმომადგენლებმა დაადასტურეს საქართველოს მოქალაქის გარდაცვალების ფაქტი, თუმცა, არ დაადასტურეს ხსენებული პირის უკანონოდ დაკავების მცდელობა. იქიდან გამომდინარე, რომ პროცესები ოკუპირებული ტერიტორიის სიღრმეში, ანუ ოკუპირებულ ქალაქ გალში განვითარდა, მიმდინარეობს დამატებითი ინფორმაციის მოკვლევის პროცესი“, – აღმნიშნულია სუსის განცხადებაში.
პრეზიდენტის კომენტარი
ქვეყნის პრეზიდენტი სალომე ზურაბიშვილი კარბაის გარდაცვალების ფაქტს სოციალურ ქსელ X-ში გამოეხმაურა.
The brutal beating by local militia resulting in the death of another Georgian citizen, Teymur Karbaia, in occupied Abkhazia- is a tragic reminder of the blatant violations of elementary Human rights in the territories occupied by Russia. Sad 75th anniversary!
— Salome Zourabichvili (@Zourabichvili_S) December 10, 2023
„ოკუპირებულ აფხაზეთში ადგილობრივი მილიციის მხრიდან სასტიკი ცემის შედეგად საქართველოს კიდევ ერთი მოქალაქე, თეიმურ კარბაია დაიღუპა – ეს რუსეთის მიერ ოკუპირებულ ტერიტორიებზე ადამიანის ელემენტარული უფლებების აშკარა დარღვევის ტრაგიკული შეხსენებაა. მწუხარე 75 წლის იუბილე!“
სახალხო დამცველის შეფასება
სახალხო დამცველის, ლევან იოსელიანის განცხადებით, 10 დეკემბერს, როდესაც მსოფლიოში ადამიანის უფლებათა დაცვის საერთაშორისო დღე აღინიშნება, კიდევ ერთხელ გავრცელდა ინფორმაცია ოკუპირებული ძალების მხრიდან საქართველოს მოქალაქის სიცოცხლის ხელყოფის სავარაუდო ფაქტის შესახებ.
იოსელიანი პასუხისმგებლობას რუსეთს აკისრებს:
„ოკუპირებული გალის რაიონში საქართველოს მოქალაქეს, თემურ კარბაიას, საოკუპაციო რეჟიმის ე.წ. მილიციის თანამშრომლებმა, სავარაუდოდ, სიტყვიერი შეურაცხყოფა მიაყენეს და სცემეს, რის შედეგადაც საქართველოს მოქალაქე საავადმყოფოში გადაყვანისთანავე გარდაიცვალა. საქართველოს მოქალაქის სიცოცხლის უფლების სავარაუდო დარღვევაზე პასუხისმგებლობა რუსეთის ფედერაციას ეკისრება, რადგან სწორედ ეს უკანასკნელი ახორციელებს ოკუპირებულ ტერიტორიაზე კონტროლს“.
სახალხო დამცველი მოუწოდებს საქართველოს ხელისუფლებას, ასევე ყველა საერთაშორისო ადამიანის უფლებათა დაცვით და სადამკვირვებლო ორგანიზაციას მაქსიმალური ძალისხმევა გამოიჩინონ ზემოაღნიშნულ ფაქტზე ეფექტიანი გამოძიების, დამნაშავეების დასჯისა და რუსეთის ფედერაციისათვის პასუხისმგებლობის დაკისრების უზრუნველსაყოფად:
„სამწუხაროა, რომ საოკუპაციო რეჟიმი დღემდე დაუსჯელს ტოვებს საქართველოს ოთხი მოქალაქის – დავით ბაშარულის, გიგა ოთხოზორიას, არჩილ ტატუნაშვილისა და ირაკლი კვარაცხელიას მკვლელობაზე პასუხისმგებელ პირებს. ასევე დღემდე გამოუძიებელია ერთი თვის წინ სოფელ კირბალის მიმდებარედ ოკუპირებულ ტერიტორიაზე საქართველოს მოქალაქის მკვლელობის ფაქტი. აღნიშნულის ფონზე საერთაშორისო ორგანიზაციებისა და მთლიანად საერთაშორისო საზოგადოების ჩართულობა განსაკუთრებით მნიშვნელოვანია სიცოცხლის უფლების სავარაუდო დარღვევების პრევენციისათვის, რადგან ამგვარი ქმედებების დაუსჯელობა საქართველოს მოქალაქეების სიცოცხლეს განსაკუთრებული საფრთხის ქვეშ აყენებს“.
