“თბილისმა აღიარა ის, რასაც 17 წელი ველოდით" - ცხინვალში "ოცნების" კომისიის დასკვნას ეხმაურებიან
თეა წულუკიანის კომისია
ცხინვალში “ქართული ოცნების” კომისიის დასკვნას ეხმაურებიან და ამბობენ, რომ თბილისმა აღიარა ის, რასაც “17 წელი ველოდით ჩვენ და რუსეთი.”
საქართველოს პარლამენტში თეა წულუკიანმა მისი კომისიის ანგარიშის წარდგენის დროს 2008 წლის ომზე საუბრისას თქვა, რომ ქართული ჯარი სამხედრო საქმისგან შორს მყოფი პოლიტიკოსების ომში აღმოჩნდა, რომელმაც გარე ძალების დახმარების იმედით და ქართველი სამხედროების აზრის უგულებელყოფით ქალაქ ცხინვალზე შეტევა განახორციელეს.
დე ფაქტო სამხრეთ ოსეთის ე.წ. სახელმწიფო საინფორმაციო სააგენტო რეს-ი ანალიტიკურ სტატიაში სახელწოდებით “საქართველომ ოფიციალურად აღიარა პასუხისმგებლობა 2008 წელს სამხრეთ ოსეთის წინააღმდეგ ომის გაჩაღებისათვის” ასევე წერს, რომ ნებისმიერ შემთხვევაში ეს ანგარიში წარმოადგენს ოფიციალურ და საბოლოო დოკუმენტს, რომელიც ადასტურებს სამხრეთ ოსეთისა და რუსეთის პოზიციის სისწორეს.
რას წერს რეს-ი
“2008 წლის აგვისტოში საქართველოს მხრიდან სამხრეთ ოსეთის რესპუბლიკისა და რუსეთის ფედერაციის წინააღმდეგ განხორციელებული ფართომასშტაბიანი სამხედრო აგრესიიდან 17 წლის შემდეგ თბილისში ის აღიარება გაჟღერდა, რომელსაც სამხრეთ ოსეთი და რუსეთი ამდენი წელი ელოდნენ.
პარლამენტის პლენარულ სხდომაზე ყოფილი პრეზიდენტ მიხეილ სააკაშვილის დროს ჩადენილი დანაშაულებების საკვლევი კომისიის თავმჯდომარემ თეა წულუკიანმა წარმოადგინა 460-გვერდიანი ანგარიში, რომელიც არ ტოვებს ეჭვს: აგრესიული ომი სამხრეთ ოსეთის მშვიდობიანი მოსახლეობის წინააღმდეგ დაიწყო იმდროინდელმა საქართველოს ხელისუფლებამ მიხეილ სააკაშვილის ხელმძღვანელობით.
ნებისმიერ შემთხვევაში ეს ანგარიში წარმოადგენს ოფიციალურ და საბოლოო დოკუმენტს, რომელიც ადასტურებს სამხრეთ ოსეთისა და რუსეთის პოზიციის სისწორეს. ის ამტკიცებს, რომ რუსეთის ფედერაციის მიერ განხორციელებული “საქართველოს მშვიდობისკენ იძულების“ ოპერაცია იყო ერთადერთი შესაძლებელი პასუხი საქართველოს რეჟიმის აგრესიაზე, რომლის მიზანიც იყო ძალით გაენადგურებინა სამხრეთ ოსეთის რესპუბლიკა და მისი მშვიდობიანი მოსახლეობა.
ამ კონტექსტში შეუძლებელია არ აღინიშნოს, რომ საქართველოს პარლამენტის კომისია უფრო გულწრფელი აღმოჩნდა, ვიდრე დასავლელი პოლიტიკოსები, რომლებიც თითქმის 20 წელი იმეორებდნენ მანტრას თითქოს რუსეთისა და სამხრეთ ოსეთის ბრალზე 2008 წლის ომში.” – წერს დე ფაქტო ხელისუფლების გამოცემა სტატიაში.
დროებითი საგამოძიებო კომისია “ქართული ოცნების” პარლამენტში 2025 წლის 5 თებერვალს შეიქმნა. კომისიის მიზანი წინა ხელისუფლების, “ერთიანი ნაციონალური მოძრაობის” საქმიანობის შესწავლაა. კომისიას “ქართული ოცნების” დეპუტატი, თეა წულუკიანი ხელმძღვანელობდა.
კომისია სხდომაზე იბარებდა პოლიტიკოსებს და მათ დაკითხვას პირდაპირ ეთერში გადასცემდა. მის წინააღმდეგ, ვინც კომისიაზე არ მივიდა, დაიწყო გამოძიება სისხლის სამართლის კოდექსით (349-ე მუხლი).
“საქართველოს პარლამენტის დროებითი საგამოძიებო კომისიის მოთხოვნის შეუსრულებლობა” ისჯება ჯარიმით ან ერთ წლამდე ვადით თავისუფლების აღკვეთით. ამავე დროს, ასეთ პირებს ეკრძალებათ თანამდებობის დაკავება სამ წლამდე ვადით.
“ქართული ოცნების” ხელისუფლებამ ერთ თვეში ექვსი ოპოზიციონერი ლიდერი გაუშვა ციხეში. ყველა მათგანს პარლამენტში შექმნილ “ქართული ოცნების” საგამოძიებო კომისიაზე მიუსვლელობას ედავებიან. ამ კომისიას, ისევე როგორც პარლამენტს, ოპოზიცია არალეგიტიმურად მიიჩნევს და არ აღიარებს.
