იოგას ხალიჩები და კოკა-კოლა - როგორ ჩაშალეს ძალადობრივმა ჯგუფებმა თბილისი პრაიდის ფესტივალი
თბილისი პრაიდი ჩაიშალა
ფესტივალი Tbilisi Pride, რომელიც თბილისში 8 ივლისს უნდა გამართულიყო, ჩაშლილია.
ღონისძიება ჰომოფობიურმა ჯგუფებმა ჩაშალეს, რომლებიც დღეს სპეციალურად ფესტივალის ჩასაშლელად ხალხმრავალ აქციაზე შეიკრიბნენ.
აქცია 12 საათზე ვაჟა-ფშაველას ძეგლთან დაიწყო. აქციის მონაწილეებმა გზა გადაკეტეს. სახელდახელოდ მოწყობილ სცენაზე, მიკროფონთან ალტ-ინფოს და სხვა რადიკალური ჰომოფობიური დაჯგუფებების წევრები გამოჩნდნენ. გამომსვლელების მთავარი გზავნილი იყო ის, რომ დასავლეთი ცდილობს საქართველო გარყვნას და ამისთვის ლგბტქ+ თემის მხარდამჭერ ორგანიზაციებს აფინანსებს.
გამომსვლელები ასევე ხშირად ახსენებდნენ “გლობალურ ომის პარტიას”, რომელიც ცდილობს ქვეყანა ომში ჩაითრიოს. გამომსვლელები აკრიტიკებდნენ ასევე უკრაინის ხელისუფლებას, რომელმაც ომი ვერ აიცილა თავიდან და “აცლა ცდილობს საქართველოს სათავეში ნაციონალები და სააკაშვილი დააბრუნოს”.
“ჩვენ ვიწყებთ მოძრაობას ანტიმაიდანი,” – თქვა მიკროფონთან გამოსვლისას ალტ-ინფოს დამფუძნებელმა ზურა მახარაძემ.
დღის პირველი საათისთვის აქციის მონაწილეები, რომელთა რაოდენობა სხვადასხვა შეფასებით ათასიდან 3 ათასამდე მერყეობდა, “ლისი ვანდერლენდის” მიმართულებით დაიძრნენ. სწორედ იქ იგეგმებოდა თბილისი პრაიდის ფესტივალის გამართვა.
ფესტივალის ორგანიზატორებს ლისის ტერიტორიაზე უკვე გამზადებული ჰქონდათ საფესტივალო სივრცე ღია ცის ქვეშ – ძირს ელაგა იოგას სავარჯიშო ხალიჩები ბალახზე კომფორტულად მოსათავსებლად. ასევე გამაგრილებელი სასმელები ფესტივალის სტუმრებისთვის.
ჰომოფობ რადიკალებს ლისის ტერიტორიამდე დიდი რაოდენობით პოლიციელებიც მიჰყვებოდნენ. თუმცა, ვიდრე ლისამდე არ ავიდნენ, მათი შეჩერება არავის უცდია.
რადიკალებს შორის იყო ბევრი მღვდელი. აქციის ზოგიერთ მონაწილეს ეცვა შავი მაისურები თეთრი ჯვრებით.
უკვე ლისზე, პოლიცია შეეცადა არ მიეშვა რადიკალები “ლისი ვანდერლენდის” ტერიტორიაზე, თუმცა მათ საპოლიციო კორდონის გარღვევა მოახერხეს და ფესტივალის ტერიტორიაზე შეიჭრნენ. ამ დროისთვის თბილისი პრაიდის ორგანიზატორები და ფესტივალის სტუმრები უკვე აღარ იმყოფებოდნენ ადგილზე – დაპირისპირების თავიდან ასაცილებლად მათ დატოვეს ლისის ტერიტორია.
„მოგვიწია ტერიტორიის დატოვება. სამართალდამცავებმა ტერიტორიის დაცვა ვერ შეძლეს,“ – წერენ ფესტივალის ორგანიზატორები.
ძალადობრივმა ჯგუფებმა ფესტივალის ტერიტორია დაარბიეს, ლგბტ დროშები და სხვა სიმბოლოები დაწვეს. ასევე დაწვეს უკრაინის დროშა.
ასევე, მიითვისეს პრაიდისთვის განკუთვნილი ნივთები. მაგალითად, ფოტოებზე ჩანს როგორ ტოვებენ ლისის ტერიტორიას ჰომოფობი რადიკალები იოგას ვარდისფერი ხალიჩებით ხელში და ასევე კოკა-კოლას ბოთლებით ჯიბეებში.
8 ივლისს ფესტივალით უნდა დასრულებულიყო პრაიდის კვირეული, რომელიც წელს ლგბტ აქტივისტების მიმართ მუქარის გამო დახურულ კარს მიღმა მიმდინარეობდა.
შინაგან საქმეთა სამინისტრომ ფესტივალის უსაფრთხოების უზრუნველსაყოფად სპეცრაზმიც გამოიყვანა, თუმცა სიტუაცია კონტროლიდან გამოვიდა. დაკავებულია რამდენიმე ადამიანი.
პრაიდის ორგანიზატორები აცხადებენ, რომ პოლიცია აშკარად მფარველობდა ჰომოფობიურ ჯგუფებს და მათთვის რეალურად ხელის შეშლა არც უცდია.
“იმდენად აბსურდული სპექტაკლი დაიდგა, ვერც გავიაზრეთ. ხელოვნური ქაოსი შექმნეს”, – ამბობს თბილისი პრაიდის თანადირექტორი ანა სუბელიანი რადიო თავისუფლებასთან საუბარში და ამატებს, რომ პოლიციამ მათ კარამდე მიაცილა ძალადობრივი ჯგუფი, საშუალება მისცა ფესტივალის ტერიტორიაზე შესულიყვნენ, ორგანიზატორებს კი ადგილი სწრაფად დაატოვებინეს.
“თანამშრომელმა შეამჩნია, როგორ შემოჰყავდათ ეს ხალხი ალტერნატიული შემოსასვლელებიდან, ხელით ანიშნებდნენ: “მოდით მოდით”-ო, – ამბობს სუბელიანი.
ლისის ტერიტორია ძალადობრივმა ჯგუფებმა მალევე დატოვეს. ნაწილმა პარლამენტთან გადაინაცვლა, სადაც მათ საკუთარი მოთხოვნები გააჟღერეს.
მოთხოვნებს შორისაა 2021 წლის 5 ივლისს აქციის დარბევისთვის დაკავებული ადამიანების გათავისუფლება და სექსუალური უმცირესობის წინააღმდეგ კანონის მიღება.
მოთხოვნების, საკანონმდებლო ორგანოს წინ „ალტ ინფოს“ დამფუძნებელმა ზურა მახარაძემ გააჟღერა.
მისი თქმით, დღეს საქართველოს კონსერვატიულმა ნაწილმა გამარჯვება მოიპოვა.
„დღეს გამარჯვების დღეა. დღევანდელი დღე საქართველოს კონსერვატიულმა ნაწილმა მოიგო 100-ით 0… და ყველაზე მთავარი… ვითხოვთ კანონს არა მხოლოდ ბაღებსა და სკოლებში, არამედ ყველგან ლგბტ პროპაგანდა, პრაიდები და ამათი ორგია უნდა იყოს აკრძალული! ეს არის ხალხის მოთხოვნა. ვითხოვთ კანონს!“– განაცხადა ზურა მახარაძემ.
გამოხმაურებები
8 ივლისის მოვლენებს გამოეხმაურა როგორც საქართველოს პრეზიდენტი, ისე საქართველოს დასავლელი პარტნიორები.
საქართველოს პრეზიდენტმა ასევე გააკრიტიკა სამართალდამცავების მუშაობა და თქვა, რომ ხელისუფლებამ ვერ დაიცვა შეკრების თავისუფლება:
“შეკრების უფლების დაცვა, სწორედ რომ ღონისძიების ჩატარებას ნიშნავს და არა ადგილის დაცლას, ვითომდა სხვანაირად ვერ იქნებოდა დაცული უსაფრთხოება,” – განაცხადა ზურაბიშვილმა.
● ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა
● ჰომოფობების ცეკვა პარლამენტთან. ფოტორეპორტაჟი
● TV პირველის ოპერატორი, რომელსაც 5 ივლისს სასტიკად სცემეს, გარდაიცვალა
● “უკრაინა ომს აგებს. ზელენსკიმ ომი ვერ აიცილა”. ვინ დგას საქართველოში რუსული პროპაგანდის უკან
პრეზიდენტმა ძალადობის წახალისებაში მმართველი პარტია დაადანაშაულა. მან თქვა, რომ რადიკალი ჰომოფობები “ქართული ოცნების” დეპუტატების მიერ იყვნენ წახალისებულნი და ღიად მხარდაჭერილნი.
“კონტრაქციების წაქეზებითა და სიძულვილის ენის არდაგმობით, მმართველი პარია ძალადობას ახალისებს და მის ყველა შედეგზე პასუხისმგებლობას იღებს,” – განაცხადა ზურაბიშვილმა.
სახალხო დამცველმა თავის განცხადებაში მოუწოდა შსს-ს ყველა კანონდარღვევაზე დროული და სათანადო რეაგირება მოახდინოს.
არასამთავრობო ორგანიზაციებმა ერთობლივი განცხადება გაავრცელეს, სადაც ასევე ხელისუფლებას აკისრებენ პასუხისმგებლობას.
“საგანგაშოა, რომ შინაგან საქმეთა სამინისტრო კვლავ განაგრძობს სიძულვილის ჯგუფების მიმართ შემწყნარებელ პოლიტიკას,” – ნათქვამია განცხადებაში.
“სამწუხაროდ დღეს კიდევ ერთხელ ვნახეთ ხელისუფლების მიერ წაქეზებული და ორგანიზებული ძალადობა, რაც კიდევ ერთი უტყუარი დამამტკიცებელი საბუთია, რომ ხელისუფლება რუსული მეთოდებით ცდილობს ძალაუფლების შენარჩუნებას ,” – აღნიშნულია ოპოზიციური პარტიის, “სტრატეგია აღმაშენებლის” განცხადებაში.
„ევროპული საქართველოს“ თავმჯდომარე გიგა ბოკერია: “ჩვენზე წარმატებულ ქვეყნებშიც არსებობენ ძალადობისკენ მიდრეკილი ადამიანები, მაგრამ ჩვენს შემთხვევაში, ეს ხალხი ივანიშვილის რეჟიმის ნაწილი და მათი ინსტრუმენტია”.
“დღევანდელმა მოვლენებმა კიდევ ერთხელ დაადასტურა, რომ სახელმწიფო ინსტიტუტები ქვეყანაში თავის ფუნქციას ვერ ასრულებს, პარტიას ექვემდებარება და პოლიტიკური დღის წესრიგით მოქმედებს”,– ასე ეხმაურება პარტია „საქართველოსთვის“ „პრაიდ ფესტივალის“ ირგვლივ დღეს განვითარებულ მოვლენებს.
“დღეს თბილისში დატრიალებულმა ძალადობრივმა მოვლენებმა ნათლად აჩვენა, რომ ქართული სახელმწიფო ინსტიტუტები სრულად ჩამოშლილია და არ იცავს მოქალაქეთა თავისუფლებას და უსაფრთხოებას”, – ამის შესახებ „ლელოს“ განცხადებაშია ნათქვამი.
როგორც პარტიაში აღნიშნავენ, “დღეს ძალოვანი უწყებები ემსახურება არა საქართველოს და მისი მოქალაქეების, არამედ მმართველი გუნდის ინტერესებს, რომელიც ივანიშვილის დაკვეთით ასრულებს კრემლის სცენარს საქართველოში“.
“ხელისუფლების მიერ შექმნილი და წახალისებული ძალადობრივი დაჯგუფებები “რუსული ოცნების” მთავარ დასაყრდენად იქცნენ,– წერია „ნაციონალური მოძრაობის” მიერ გავრცელებულ განცხადებაში. მათივე ცნობით, საქართველოს ხელისუფლება ვერ ასრულებს თავის საბაზისო ვალდებულებებს, როგორიც არის მოქალაქეთა უსაფრთხოების დაცვა”.
საერთაშორისო რეაქცია
პრაიდის ფესტივალის დარბევიდან რამდენიმე საათში განცხადება გაავრცელა აშშ-ის საელჩომ და ხელისუფლებას მოუწოდა პასუხისგებაში მისცეს ყველა, ვინც კანონი დაარღვია და ნათლად აჩვენოს, რომ ძალადობა მიუღებელია.
„დღეს თბილისი პრაიდი იძულებული გახდა, გაეუქმებინა დაგეგმილი დახურული ღონისძიება, რადგან უმართავმა ხალხის მასამ, რომელიც ძალადობით იმუქრებოდა, დამსწრეებს მშვიდობიანი შეკრების შესახებ კონსტიტუციით დაცული უფლება წაართვა. საქართველოს ხელისუფლება ვალდებულია, დაიცვას საქართველოს ყველა მოქალაქის ძირითადი უფლებები “,- ნათქვამია საელჩოს განცხადებაში.
ევროკავშირის წარმომადგენლობა საქართველოში წუხილს გამოთქვამს დღეს, 8 ივლისს „პრაიდ ფესტივალის“ გაუქმების გამო და წერს, რომ გულდასაწყვეტია იმის დანახვა, რომ უსაფრთხოება და შეკრების თავისუფლება ვერ იყო უზრუნველყოფილი.
„ისინი, ვინც ძალადობისკენ მოუწოდებენ და ძალადობენ მართლმსაჯულების წინაშე უნდა წარდგნენ“, – წერია ევროკავშირის წარმომადგენლობის ფეისბუკგვერდზე.
„თბილისი პრაიდის“ დღევანდელ ღონისძიებაზე ძალადობას გმობს გაერო გმობს გაერთიანებული ერების ორგანიზაციის საქართველოს წარმომადგენლობაც:
„მოვუწოდებთ საქართველოს ხელისუფლებას, დაგმოს ეს შემაშფოთებელი ინციდენტი, პასუხი აგებინოს დამნაშავეებს და გადამწყვეტი ნაბიჯები გადადგას მშვიდობიანი შეკრებისა და გამოხატვის უფლების დაცვის გასაუმჯობესებლად ყველასთვის, მათ შორის, ლგბტქი+ პირებისთვის“.
