თბილისი გაიხსნა, კიდევ რა ამუშავდა 11 მაისიდან. დეტალურად

დღეიდან, 11 მაისიდან, თბილისი, რომელიც კორონავირუსის პანდემიის გამო 15 აპრილიდან ჩაკეტილი იყო,  გაიხსნა. ეს იმას ნიშნავს, რომ დედაქალაქში შესვლა და ქალაქიდან გასვლა უკვე თავისუფლად შეიძლება.

11 მაისის მონაცემებით, საქართველოში კორონავირუსით ინფიცირების 638 შემთხვევაა დადასტურებული. კარანტინის რეჟიმშია 4896 ადამიანი, ხოლო სტაციონარში მეთვალყურეობის ქვეშ – 444 პირი. კორონავირუსით ინფიცირებულთაგან 317 გამოჯანმრთელდა და 11  გარდაიცვალა.

გარდა ამისა, 11 მაისიდან საქართველოში კორონავირუსის ეპიდემიის გამო დაწესებული სხვა შეზღუდვებიც მოიხსნა.

კონკრეტულად რა მუშაობს და რა არა დღეიდან:

რა არის გახსნილი და რა მუშაობს 11 მაისისთვის

● საქართველოში ამუშავდა აბსოლუტურად ყველა სახის საწარმო. მანამდე, 5 მაისს განაახლეს საქმიანობა მხოლოდ სამშენებლო კომპანიებმა.

● გაიხსნა ყველა სახის საცალო და საბითუმო მაღაზია, რომელსაც შესასვლელი ქუჩიდან აქვს. გამონაკლისია ის მაღაზიები, რომლებიც ტანსაცმლით და ფეხსაცმლით ვაჭრობენ. მაგალითად, უკვე ღიაა წიგნების, სათამაშოების, კოსმეტიკის და სპორტული მაღაზიები. მანამდე, 5 მაისს, უკვე გაიხსნა ღია აგრარული ბაზრები.

● მუშაობა განაახლეს ავტოსახელოსნოებმა, ავტოსამრეცხაოებმა.

● ასევე ამუშავდა სხვა სერვის-ცენტრები – საყოფაცხოვრებო ტექნიკის შესაკეთებელი.

● ასევე, 5 მაისიდან გაიხსნა იუსტიციის სახლები, თუმცა განსხვავებული წესებით – აუცილებელია ონლაინ ჯავშანი გქონდეთ.

რა რჩება შეზღუდული და დაკეტილი

● საქართველოში კვლავ რჩება დაკეტილი სამი ქალაქი – მარნეული, რუსთავი და გარდაბანი. რუსთავს და გარდაბანს 14 მაისს გახსნიან, მარნეულს – 18 მაისს.

● დაკეტილი რჩება სავაჭრო ცენტრები. დიდ სავაჭრო მოლებს გახსნის უფლებას ჯერჯერობით არ აძლევენ.

● დაკეტილია ტანსაცმლის და ფეხსაცმლის მაღაზიები.

● არ გახსნილა არც სილამაზის სალონები და ესთეტიკური ცენტრები (ისინი, სავარაუდოდ, 8 ივნისიდან დაიწყებენ საქმიანობას).

● არ მუშაობს სტომატოლოგიური კლინიკები.

● კვლავ დისტანციურად მუშაობენ სხვადასხვა ოფისების თანამშრომლები.

● დაკეტილია სკოლები, ბაღები და უმაღლესი სასწავლებლები. მათი გახსნა ამ სემესტრში არ იგეგმება.

● არ მუშაობენ გასართობი ცენტრები, კინოთეატრები, კაფეები და რესტორნები. (8 ივნისს ღია კაფეების გახსნაა დაგეგმილი. დახურულ რესტორნებს, სავარაუდოდ, 22 ივნისიდან გახსნიან)

● არ დადის საზოგადოებრივი ტრანსპორტი. არ მუშაობს მეტრო. მოძრაობენ მხოლოდ ტაქსები. არ მოძრაობენ საქალაქთაშორისო მატარებლები.

● გადაადგილება შეიძლება მხოლოდ მსუბუქი მანქანით და თანაც, გარკვეული წესების დაცვით. ძალაში რჩება შეზღუდვა, რომლის თანახმად, მანქანაში მხოლოდ სამი ადამიანი უნდა იჯდეს (ბავშვების ჩათვლით) – მძღოლი და ორი მგზავრი უკანა სავარძელზე. წინა სავარძელზე მგზავრის დაჯდომა აკრძალულია.

● კვლავინდებურად არ შეიძლება არც ფეხით და არც მანქანით ქუჩაში გამოსვლა საღამოს ცხრა საათის შემდეგ, რადგან 21:00-დან 06:00-მდე მთელი ქვეყნის მასშტაბით ისევ კომენდანტის საათი მოქმედებს.

● დაკეტილია სასტუმროები – მათ სტუმრების მიღება არ შეუძლიათ. შიდა ტურიზმის გახსნის თარიღად 15 ივნისია გამოცხადებული. უკვე 15 ივნისიდან, სავარაუდოდ, სასტუმროებს სტუმრების მიღება შეეძლებათ.

● კვლავ დაკეტილია თბილისის ცა. საერთაშორისო ფრენების აღდგენა 1-ლი ივლისისთვის იგეგმება. სწორედ ივლისის დასაწყისიდანაა დაანონსებული უცხოელი ტურისტების მიღება.

________________________

კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა. როგორც ხელისუფლება ამბობს, შეზღუდვები ეტაპობრივად მოიხსნება.

შეზღუდვების შემსუბუქებას საქართველოში ბევრი ადამიანი ელოდება. საზოგადოების ნაწილისთვის და პოლიტიკური ოპოზიციისთვის გაუგებარია, რატომ არ უქმდება კომენდანტის საათი. 

ერთიანი ნაციონალური მოძრაობის ერთ-ერთი ლიდერი, რომან გოცირიძე ამბობს, რომ ეკონომიკის გახსნის შემდეგ კომენდანტის საათის შენარჩუნება არ გამოიყურება დამაჯერებლად და ლოგიკურად. ის ფიქრობს, რომ ვალუტის გადამცვლელი პუნქტებიც უნდა გაიხსნას:

“რა უშლის ხელს, რომ გაიხსნას ქვეყანაში 1000-მდე ვალუტის გადამცველელი პუნქტი. 4000 ადამიანი დღეს ზის სახლში უმუშევარი და ჩვენი მოქალაქეების ძალიან დიდ ნაწილს ბანკის ძალიან ცუდი კურსით უწევს საკუთარი, სიმწრით ნაშოვნი ფულის კონვერტირება.” 

• კორონავირუსი უჰანის ლაბორატორიიდან? რაში ადანაშაულებს დასავლეთი ჩინეთს
• პანდემია – შანსი მმართველი პარტიისთვის? საუბარი თორნიკე შარაშენიძესთან და კორნელი კაკაჩიასთან
• საქართველო: პანდემია, როგორც რუსეთზე ეკონომიკური დამოკიდებულების შემცირების შანსი

თავისუფალი საქართველოს ლიდერი, გიორგი ვაშაძე აცხადებს, რომ დროა, საქართველოში საზოგადოებრივი ტრანსპორტიც ამუშავდეს:

“კომერციული ორგანიზაციების მნიშვნელოვანი ნაწილი იხსნება, ადამიანებს შეეძლებათ სამსახურებში წავიდნენ, მაგრამ დღემდე არ ვიცით, რატომ გვაქვს კომენდანტის საათი. არაფერი ვიცით საზოგადოებრივ ტრანსპორტზე. არადა ევროპაში არსებობს სტანდარტები, რომლის დაცვის შემთხვევაშიც საზოგადოებრივი ტრანსპორტი იწყებს მუშაობას. მაგალითად, თუ დაცულია სავარძლებზე მსხდომ მგზავრებს შორის დისტანცია, საზოგადოებრივი ტრანსპორტი მუშაობს.” 

თუმცა, არიან ისეთებიც, რომლებიც შეზღუდვების შემსუბუქებას სიფრთხილით ეკიდებიან:

“ჩვენ არ გვიყვარს წესების დაცვა. ვშიშობ, გერმანიაზე უარესი არ დაგვემართოს და შეზღუდვების შემსუბუქების შემდეგ ინფიცირებულთა რაოდენობა არ გაიზარდოს,” – წერენ ფეისბუკში. 

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.