ტატიანა, მისი ალისა და ნიკიტა - ერთი საშინელი ფოტოს ისტორია

უკრაინა: მოკლული დედა და ორი შვილი 

ამერიკულმა კომპანია SE Ranking-მა სილიკონის ველზე მდებარე ქალაქ პალო ალტოდან, თავზარდაცემულმა ამოიცნო თავისი უკრაინელი თანამშრომელი და მისი ორი შვილი ამ ფოტოსურათზე, რომელიც პირველ გვერდზე გამოაქვეყნა New York Times-მა. 

San Francisco Chronicle, Carolyn Said

კომპანიის მთავარი ბუღალტერი, 43 წლის ტატიანა პერებეინოსი უკრაინული ოფისიდან მუშაობდა, კიევიდან ნახევარი საათის სავალზე მდებარე ქალაქ ირპენიდან. 

რუსული არმიის მიერ ალყაშემორტყმულ ირპენში, სარდაფში რამდენიმე დღის დაბომბვის ქვეშ გატარების შემდეგ, საბოლოოდ ტატიანამ გადაწყვიტა გამოეყენებინა „მწვანე დერეფანი“, რომლის გარანტიის პირობაც რუსეთმა დადო მშვიდობიანი მოქალაქეების ევაკუაციისთვის. 

ომი უკრაინაში. განახლებადი ინფორმაცია

ომი უკრაინაში, უახლესი ამბები. რუსეთი ზრდის დარტყმების ძალას საკვანძო ქალაქებზე, მათ შორის კიევზე. მკაცრი საერთაშორისო სანქციები

მან მოამზადა ქალიშვილი, 9 წლის ალისა, ვაჟიშვილი, 18 წლის ნიკიტა და ოჯახის მეგობართან ერთად, მათ თითქმის გადაიარეს მდინარე ირპენზე გადებულ ნახევრად დანგრეული ხიდი კიევის მიმართულებით, როდესაც ცეცხლი გაუხსნეს ნაღმმტყორცნიდან. 

„ამ ფოტოების ნახვა ჩემთვის განსაკუთრებული ტრაგედიაა, – ეუბნება The Chronicle-ს კომპანიის პრესმდივანი, ქსენია ჰირვონინა. – ისინი აჩვენებს, რამდენად რეალურია ეს ყველაფერი. და ეს ისტორია ამტკიცებს, რომ რუსული არმია და თავად პუტინი – მონსტრები არიან, რომლებიც არ იმსახურებენ პატიებას მათ მიერ ჩადენილი ქმედებებისათვის“.

ამის შესახებ უკვე არაერთხელ განაცხადა უკრაინის პრეზიდენტმა ვლადიმირ ზელენსკიმაც: „ჩვენ დავსჯით დამნაშავეებს. თქვენთვის, საფლავის გარდა, დედამიწაზე მშვიდი ადგილი არსად მოიძებნება“. 

• „პუტინმა გვითხრა, რომ უნდა მოგკლათ“. როგორ დევნიან რუსეთში ომის მოწინააღმდეგეებს
• ხანგრძლივი ომი, დიპლომატია, გადატრიალება. ომის ხუთი სცენარი BBC-ის ანალიტიკოსისგან
• ელიან თუ არა საკუთარი ქვეყნიდან გამოქცეულ რუსეთის მოქალაქეებს საქართველოში?

„ტატიანა ძალიან მეგობრული, მამაცი, ყოჩაღი ქალი იყო, იუმორის შესანიშნავი გრძნობით. ის ყოველთვის ახერხებდა, რომ გარშემო ყველა ამაღლებულ განწყობაზე დაეყენებინა. უფროსი დასავით იყო თითოეული ჩვენგანისთვის“, – გვიყვება ჰირვონინა ტელეფონით დუბაიდან, სადაც ირპენიდან 23 თებერვალს, უკრაინაში რუსეთის შეჭრის წინა დღეს მოახერხა გადაბარგება.

დუბაიში SE Ranking-ის კიდევ ერთი ოფისია. ის ამბობს, რომ აქ არის ბაზირებული კომპანიის 110 თანამშრომლის თითქმის ნახევარი. 

„ჩვენ შოკირებულები, დამწუხრებულები, განადგურებულები და გაბრაზებულები ვართ. სიტყვები არ მაქვს, რომ ჩვენი ემოციები გადმოვცე. გული გვწყდება“, – ამბობს ჰირვონინა. 

ტატიანა პერებეინოსი ირპენიდან რუსეთის უკრაინაში შეჭრისთანავე არ წავიდა, იმიტომ რომ, დედამისი იყო ავად. შემდეგ კი მობილიზაცია გამოაცხადეს და ის არ წავიდა, რათა მარტო არ დაეტოვებინა თავისი 18 წლის ვაჟიშვილი. ის იმ ასაკობრივი კატეგორიის მამაკაცებს განეკუთვნებოდა, რომლებსაც ქვეყნის დატოვების უფლება არ ჰქონდათ, ისინი მზად უნდა ყოფილიყვნენ აუცილებლობის შემთხვევაში, სამშობლოს დასაცავად დამდგარიყვნენ. 

„ნიკიტა ახლა მოეწყო უნივერსიტეტში. ტატიანა ყოველთვის საუბრობდა მასზე, თუ როგორი ჭკვიანი ბიჭია“, – ჰყვება ჰირვონინა. 

ერთ-ერთი დაბომბვის დროს, ჭურვი მათ კორპუსს მოხვდა, ერთი სართულით ზემოთ მდებარე ბინას. „მათ მთელი დროის გატარება სარდაფში უწევდათ, სადაც ციოდა, არ ჰქონდათ საჭმელი, სინათლე და სითბო. და ისინი ფიქრობდნენ, რომ ამ ყველაფერს დააღწევდნენ თავს“, – ამბობს ჰირვონინა.  

სერგეი პერებეინოსმა, ტატიანას ქმარმა, რომელიც მათთან ერთად არ იმყოფებოდა, როდესაც ისინი ევაკუაციას ცდილობდნენ, მეუღლისა და შვილების ფოტოსურათები Facebook-ის საკუთარ გვერდზე გააზიარა. „რუსებმა ყველაფერი წამართვეს“, – დაწერა მან. 

ტატიანა პერებეინოსი, თავის ვაჟიშვილთან, 18 წლის ნიკიტასა და ქალიშვილთან, 9 წლის ალისასთან ერთად რუსულმა ჯარებმა მაშინ მოკლეს, როდესაც ისინი ქალაქ ირპენიდან ევაკუაციას ცდილობდნენ. ფოტო სერგეი პერებეინოსის Facebook-დან 

SE Ranking-ი დაეხმარა სერგეი პერებეინოსს ჩასულიყო კიევში, სადაც ორგანიზება გაუწია ცოლისა და შვილების დაკრძალვას.  

ჰირვონინას თქმით, ტატიანა პერებეინოსმა SE Ranking-ის კიევის ოფისში მუშაობა 2016 წელს დაიწყო ბუღალტრად და სწრაფად გაიკეთა წარმატებული კარიერა – ოფისის ფინანსური დირექტორი გახდა. 

ბევრ ამერიკულ ტექნოლოგიურ კომპანიას აქვს ოფისი უკრაინაში, რომელიც ცნობილია თავისი ძლიერი განათლების სისტემით, ტექნოლოგიებზე აქცენტით.  

პერებეინოსი ადრე დონეცკში, უკრაინის აღმოსავლეთში ცხოვრობდა. ამ ტერიტორიამ 2014 წელს საკუთარ თავს დონეცკის სახალხო რესპუბლიკა უწოდა და იქ მაშინ, რუსეთის ჯერ კიდევ ფარული მხარდაჭერით, ომი დაიწყო. მალე ტატიანა ოჯახთან ერთად ირპენში გადავიდა.

„არ არსებობს სიტყვები, რომ აღწეროს ჩვენი მწუხარება ან განკურნოს ჩვენი ტკივილი. მაგრამ ჩვენთვის ძალიან მნიშვნელოვანია, რომ ტატიანა და მისი შვილები, ალისა და ნიკიტა უბრალო სტატისტიკად არ იქცნენ. მისი ოჯახი მშვიდობიანი მოსახლეობის დაბომბვას ემსხვერპლა, რაც ნებისმიერი კანონით კაცობრიობის წინააღმდეგ ჩადენილი დანაშაულია“, – დაწერა კომპანია SE Ranking-მა Facebook-ზე გამოქვეყნებულ პოსტში. 

გარდაცვლი ოჯახის ფოტო სავსე იყო გულის ამაჩუყებელი დეტალებით, მათ შორის, ბორბლებიანი ჩემოდნები, საბავშვო ზურგჩანთები, ძაღლის სატარებელი მწვანე თოკი. „ძაღლის ყეფა ისმის“, – დაწერა New York Times-ის რეპორტიორმა, რომელიც თავდასხმის თვითმხილველი გახდა. 

სერგეი პერებეინოსმა Facebook-ზე დაწერა, რომ ერთ-ერთი ძაღლი, რომელიც ადამიანებთან ერთად მოდიოდა, იორკშირული ტერიერი გადარჩა, მაგრამ მას თათის ამპუტაცია ჩაუტარეს. 

„მადლობა ყველას, ვინც ჩვენზე ზრუნავს“, – დაწერა მან.