ივანიშვილის დაფუძნებული თანაინვესტირების ფონდის ყოფილი უფროსის წინააღმდეგ გამოძიება დაიწყო

თანაინვესტირების ფონდის ყოფილი უფროსი გიორგი ბაჩიაშვილი

საქართველოს გენერალურმა პროკურატურამ დიდი ოდენობით კრიპტოვალუტის მართლსაწინააღმდეგო მითვისებისა და უკანონო შემოსავლის ლეგალიზაციის ფაქტზე, სისხლისსამართლებრივი დევნა დაიწყო ბიძინა ივანიშვილის მიერ დაფუძნებული თანაინვესტირების ფონდის ყოფილი თავმჯდომარის, გიორგი ბაჩიაშვილის წინააღმდეგ.

პროკურატურის განცხადებაში საუბარია მითვისებულ 8 253 ცალ ბიტკოინზე, რომელთა ღირებულებაც “მითვისების” პერიოდში იყო 39 მილიონი დოლარი (დღევანდელი კურსით 258 მილიონი დოლარი).

სასამართლომ გიორგი ბაჩიაშვილს ბიძინა ივანიშვილის ბიტკოინის მითვისების საქმეზე 2 500 000 ლარის გირაო შეუფარდა. გადაწყვეტილება მოსამართლე თამარ მჭედლიშვილმა რამდენიმე წუთის წინ გამოიტანა. 

“მეც გაოგნებული ვარ. ქვეყანაში ჩამოვედი სამი კვირის წინ, დატოვება რომ მდომებოდა, არ ჩამოვიდოდი.” – ამბობს ბაჩიაშვილი.

უწყების ინფორმაციით, ბაჩიაშვილმა 2015 წლის ზაფხულში, მის მიერ პირადად მობილიზებული და ინვესტორის მიერ გადაცემული თანხებით კრიპტოვალუტა – ბიტკოინის გამომუშავება/მაინინგში ინვესტიცია განახორციელა.

“ბიტკოინის მაინინგის მომსახურების უზრუნველყოფას ახდენდა უცხოური კომპანია, ბრალდებულის ფაქტობრივ მფლობელობაში არსებულ საწარმოსთან 2015 წლის ივლისში დადებული 1-წლიანი ხელშეკრულების საფუძველზე. ხელშეკრულების ღირებულებად 6 305 000 აშშ დოლარი განისაზღვრა, საიდანაც ინვესტორის კუთვნილი თანხა შეადგენდა 5 000 000 აშშ დოლარს, ხოლო ბრალდებულის – 1 305 000 აშშ დოლარს.

ბრალდებულმა, რომლის მართლზომიერ მფლობელობასა და გამგებლობაშიც იმყოფებოდა მაინინგის შედეგად გამომუშავებული სრული კრიპტოვალუტა, 2017 წლის ოქტომბერში, ინვესტორს ჩადებული ინვესტიციიდან მიღებული სრული მოგების სანაცვლოდ მხოლოდ 536 900 აშშ დოლარი გადასცა, ხოლო დარჩენილი ინვესტორის კუთვნილი 8 253,13 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 39 215 820 აშშ დოლარს შეადგენდა.” – ვკითხულობთ განცხადებაში.

ბრალდებულის მიმართ სისხლისსამართლებრივი დევნა დიდი ოდენობით კრიპტოვალუტის მართლსაწინააღმდეგო მითვისებისა და უკანონო შემოსავლის ლეგალიზაციის ფაქტებზე დაიწყო, რაც სასჯელის სახედ და ზომად 9-დან 12 წლამდე თავისუფლების აღკვეთას ითვალისწინებს.

თანაინვესტირების ფონდის ვებგვერდის თანახმად, ბაჩიაშვილი ამჟამად ფონდის მრჩეველთა საბჭოს ხელმძღვანელობს, 2022 წლის მაისამდე კი ის საქართველოს საფონდო ბირჟის სამეთვალყურეო საბჭოს შემადგენლობაშიც იყო.

● ივანიშვილის ადვოკატები: ევროპული პრესის მიერ დაწესებული ცენზურა უკვე ტენდენციად იქცა
● ივანიშვილის უფლებადამცველი ფირმა შვეიცარიის პარლამენტს, პოლიტიკოსებს და საფინანსოს მიმართავს
● ივანიშვილის წერილი: კელი დეგნანთან შეხვედრაზე, ომში ჩართვაზე და მმართველ გუნდზე

თანაინვესტირების ფონდი 2013 წელს, მაშინდელი პრემიერმინისტრის, ბიძინა ივანიშვილის ინიციატივით შეიქმნა.

როგორც ორგანიზაციის ვებგვერდზე ვკითხულობთ, საქართველოს თანაინვესტირების ფონდი (GCF) არის კერძო კაპიტალის ფონდი, რომლის მთავარი მიზანია, საქართველოში არსებულ მზარდ ინდუსტრიებში საინვესტიციო პროექტების განხორციელება. 

მათივე ცნობით, საქართველოს თანაინვესტირების ფონდი განიხილავს ისეთ საინვესტიციო მიმართულებებს, რომლებიც “მნიშვნელოვნად შეუწყობს ხელს საქართველოს ეკონომიკის ზრდასა და განვითარებას”. კერძოდ კი ფონდის სტრატეგიული მიმართულებებია: სოფლის მეურნეობა და ლოგისტიკა, ტურიზმი და უძრავი ქონება, ენერგეტიკა და ინფრასტრუქტურა, მრეწველობა. 

ფონდი ორიენტირებულია განახორციელოს 25%-დან 100%-მდე წილობრივი მონაწილეობა ისეთ პროექტებში, რომელთა მინიმალური მომგებიანობა 17%-ს შეადგენს. პროექტის მინიმალური ჯამური საინვესტიციო მოცულობა უნდა შეადგენდეს 5 მლნ აშშ დოლარს.

საქართველოს თანაინვესტირების ფონდი შეინარჩუნებს საკუთრების ინტერესს კომპანიებში 7-დან 9 წლის მანძილზე. ამ პერიოდის განმავლობაში ფონდი გაასხვისებს კომპანიის საინვესტიციო წილს, სხვადასხვა მექანიზმის საშუალებით:

• პროექტის გაყიდვა თანა-პარტნიორებზე;
• გაყიდვა მესამე მხარეზე;
• აქციების განთავსება ადგილობრივ და საერთაშორისო საფონდო ბირჟებზე.