თამარ ჟვანიამ ცენტრალური საარჩევნო კომისიის თავმჯდომარის პოსტი დატოვა
თამარ ჟვანიამ საკუთარ ფეისბუქზე დაწერა, რომ ტოვებს ცენტრალური საარჩევნო კომისიის თავმჯდომარის პოსტს. თუმცა ჟვანია ერთი კვირის წინ, 21 ივნისს ამბობდა, რომ არსად წასვლას არ აპირებს. მაშინ მან განაცხადა, რომ მისი გადადგომისთვის არგუმენტები და მტკიცებულებები არ არსებობს, “პოლიტიკური სურვილების გამო კი ადამიანები თანამდებობას არ შეიძლება, ტოვებდნენ”.
თამარ ჟვანიას გადადგომის მოთხოვნა 2020 წლის 31 ოქტომბრის არჩევნების შემდეგ გაჩნდა, როცა ოპოზიციურმა პარტიებმა არჩევნების შედეგები გაყალბებულად მიიჩნიეს და საპარლამენტო მუშაობას ბოიკოტი გამოუცხადეს.
8 ნოემბერს ცესკოსთან მიტინგი გაიმართა, რომელიც სპეცრაზმმა წყლის ჭავლით დაშალა.
______________________________________________________________
დღეს, თამარ ჟვანია ფეისბუქ პოსტში ამბობს, რომ თანამდებობაზე ყოფნა კიდევ ორ წელზე მეტ ხანს შეეძლო, თუმცა, მიაჩნია, რომ შარლ მიშელის შეთანხმების საფუძველზე მიღებულმა საარჩევნო რეგულაციებმა ახალი რეალობა მოიტანა:
“შესაბამისად, ცენტრალური საარჩევნო კომისიის თავმჯდომარის ახალი წესით არჩევა იქნება დამატებითი, ხელშემწყობი ფაქტორი ფართო პოლიტიკური თანხმობისთვის.”
თამარ ჟვანიამ აღნიშნა, რომ ის დარწმუნებულია, რომ მისი გადაწყვეტილება გაზრდის კონსტრუქციული ურთიერთობების შესაძლებლობას პოლიტიკურ ძალებს შორის, რაც თავის მხრივ წაადგება საარჩევნო ადმინისტრაციას, მომავალ საარჩევნო პროცესს და მთლიანად ქვეყანას. ასევე, მისი თქმით, ის თავის თავს მომავალში საერთაშორისო ორგანიზაციებში ხედავს.
თამარ ჟვანიას “თავდაუზოგავი შრომისთვის, გამძლეობისთვის და თმენისთვის” მადლობა გადაუხადა ცენტრალურმა საარჩევნო კომისიამ.
როგორც ცესკოს პრესსპიკერმა ნათია იოსელიანმა აღნიშნა, საარჩევნო ადმინისტრაცია ელოდება კომისიის ახალ წევრებსა და თავმჯდომარეს და მზადაა გააგრძელოს მუშაობა.
“საარჩევნო ადმინისტრაცია ქალბატონ თამარს უხდის მადლობას იმ თავდაუზოგავი შრომისთვის, რაც მან გასწია ამ 8 წლის განმავლობაში. ამ ხნის განმავლობაში იყო არაერთი სირთულე და გამოწვევა, მაგრამ ჩვენ, ყველამ ერთად შევძელით და გადავლახეთ პრობლემები. დიდი მადლობა მინდა გადავუხადო ქალბატონ თამარს იმ გამძლეობისთვის და თმენისთვის, რაც მან ბოლო თვეების განმავლობაში გამოავლინა”, – თქვა იოსელიანმა
გამოხმაურება
მოძრაობა “დროას” დამფუძნებელმა ელენე ხოშტარიამ განაცხადა, რომ თამარ ჟვანია იტყუება, როცა ამბობს, რომ თავად გადადგა.
“კარგია, რომ მაინც მოუწია ჟვანიას წასვლა, მაგრამ:
1. კიდევ ერთხელ მეტყველებს სისტემის სიმახინჯეზე, როცა უნდათ, რა სოუსითაც უნდათ ისე რომ მიიღება გადაწყვეტილებები
2. იტყუება, რომ თავად გადაწყვიტა
3. ერთი კვირის წინ ზუსტად საპირისპირო თქვა, უპატივცემულობა კიდევ ერთხელ
4. ილუზიები არ უნდა შეგვექმნას, რომ გაყალბების სისტემა მოირღვა
5. გამყალბებელთა კლანი ჯავახიშვილის თაოსნობით კომფორტულად არიან”, – წერს ხოშტარია.
ხოლო გადამდგარი და ოპოზიციაში წასული პრემიერის, გიორგი გახარიას თანაგუნდელმა გიორგი ხოჯევანიშვილმა აღნიშნა, რომ ქართულმა ოცნებამ, სავარაუდოდ, იძულების ფორმით გადააყენა თამარ ჟვანია.
“ქართულმა ოცნებამ ვერ შეძლო არჩევნების შედეგების შენარჩუნება. მიზეზი არის სახელმწიფო ინსტიტუტებისადმი ძალიან დაბალი ნდობის დონე. შესაბამისად, იმის გამო, რომ მომხდარიყო გარკვეულწილად რეაბილიტაცია და იმ საკითხების გადასაფარად, რომელიც დღეს მიმდინარეობს სასამართლო სისტემაში, ქართულმა ოცნებამ იძულების ფორმით, სავარაუდოდ, გადააყენა თამარ ჟვანია და ამით ცდილობენ სახის შენარჩუნებას”, – თქვა ხოჯევანიშვილმა.
როგორ შეარჩევენ ცესკოს ახალ თავმჯდომარეს
ახალი ხელმძღვანელის შერჩევა შეცვლილი საარჩევნო კოდექსით უნდა დაიწყოს. ახალი კანონმდებლობა პარლამენტმა 28 ივნისს დაამტკიცა.
ამ წესით, საქართველოს პრეზიდენტი პარლამენტს წარუდგენს ცესკოს თავმჯდომარეობის 2 კანდიდატს. ამის შემდეგ თანამდებობაზე პირს აირჩევს მხოლოდ პარლამენტი.
ამასთან, კანონში გაიწერა, რომ თუ ახალ თავმჯდომარეს დეპუტატთა მინიმუმ 2/3 (100 ხმა) დაუჭერს მხარს, მას 5 წლით აირჩევენ, ხოლო სხვა შემთხვევაში – 6 თვით. ამჟამად ქართულ ოცნებას 84 მანდატი აქვს, ცესკოს თავმჯდომარის სრული ვადით ასარჩევად კი ოპოზიციის ხმებიც იქნება საჭირო.
ეს იმას ნიშნავს, რომ შესაძლებელია, დეპუტატთა ნაწილისთვის არასასურველი კანდიდატის შემთხვევაში, 2021 წლის თვითმმართველობის არჩევნები 6 თვით არჩეულმა კანდიდატმა ჩაატაროს.
