2020 წელს გარდაცვლილი თამარ ბაჩალიაშვილის საქმის ყოფილი გამომძიებელი, სერგო შუბითიძე ამბობს, რომ მას არ სჯერა ბაჩალიაშვილის თვითმკვლელობის ვერსიის. შუბითიძემ “შაბათის ფორმულასთან” აქამდე უცნობ დეტალებზე ისაუბრა და განაცხადა, რომ საქმის გამოძიება გაყალბდა. თამარ ბაჩალიაშვილის დედის, თეონა თამაზაშვილის თქმით, მისი შვილის საქმეზე გამოძიება მკვლელობის მუხლით უნდა დაიწყოს.
23 წლის პროგრამისტი თამარ ბაჩალიაშვილი სამართალდამცველებმა ხუთდღიანი ძებნის შემდეგ, 2020 წლის 22 ივლისს, თეთრიწყაროს ტყეში, საკუთარ მანქანაში გარდაცვლილი იპოვეს. ის 18 ივლისის დილას სახლიდან გავიდა და მას შემდეგ ახლობლებთან კონტაქტი არ ჰქონია. ოჯახის წევრები თვითმკვლელობის ვერსიას თავიდანვე გამორიცხავდნენ.
თამარის გაუჩინარების პირველივე დღიდან მისი ოჯახი ითხოვდა, რომ გამოძიებას კომპიუტერი გაეხსნა. ერთ-ერთმა გამომძიებელმა ოჯახს უთხრა, რომ თამარის პირად კომპიუტერს რთული პაროლი ედო და სპეციალისტები მის “გატეხვას” ვერ ახერხებდნენ.
იმავე წლის 17 დეკემბერს პროკურატურამ საქმე დახურა და განაცხადა, რომ მან სიცოცხლე თვითმკვლელობით დაასრულა.
თამარ ბაჩალიაშვილი თსუ-ს ინფორმატიკის ფრანგულ-ქართული სკოლის სტუდენტი იყო. მან, როგორც ერთ-ერთმა წარჩინებულმა სტუდენტმა, Erasmus+ სტიპენდია მოიპოვა და გაცვლითი პროგრამის ფარგლებში, ორი სემესტრის განმავლობაში ინფორმატიკას სწავლობდა საფრანგეთში.
მუშაობდა შპს ზეგ-ში – ეს პროგრამული უზრუნველყოფის კომპანიაა, 5 წლის ისტორიით, რომელიც ძირითადად სხვა ქვეყნიდან შემოსულ დაკვეთებზე მუშაობდა, თუმცა ბაჩალიაშვილის საქმის შემდეგ, კომპანია დაიხურა და აღარც მისი ვებგვერდი იძებნება.
საქმის პირველი გამომძიებელი რამდენიმე მნიშვნელოვან გარემოებაზე საუბრობს. თამარ ბაჩალიაშვილის საქმის დღემდე უცნობი ეპიზოდი, მის მობილურ ტელეფონს უკავშირდება. სერგო შუბითიძე იყო ის გამომძიებელი, ვინც ბაჩალიაშვილის ტელეფონი ჩაიბარა და შემდეგ მასში შენახული ინფორმაცია გადაამოწმა. გამომძიებელი საქმის გაყალბების ათვლის წერტილად სწორედ იმ მომენტს ასახელებს, როცა მის კაბინეტში დეტექტივის თანაშემწე, ელგუჯა აპუაშვილი მივიდა, გახსნილი ტელეფონი ე.წ. ლუქთან ერთად მიუტანა და უთხრა, რომ თავიდან უნდა დაელუქა:
“ელგუჯას ვკითხე, ეს ტელეფონი რა იყო და გამიკვირდა. აპუაშვილმა მთხოვა, რომ ტელეფონი დამელუქა. ამაზე ვუთხარი, რომ ეს სწორი არ იყო, თუ ტელეფონი იყო ამოღებული შემთხვევის ადგილზე, იქვე უნდა დალუქულიყო. ტელეფონი იყო დაულუქავ მდგომარეობაში. როცა პრეტენზია გამოვთქვი, მითხრა, რომ შემეძლო ხელმძღვანელობისთვის დამერეკა. დავლუქე და გავატანე უკან. ტელეფონს სანამ დავლუქავდი, იმ მომენტისთვის ის გამორთული იყო. სანამ მომიტანდა ამ ტელეფონს, სავარაუდოდ მოხდებოდა ამ ტელეფონის ან გახსნა, ან დათვალიერება.”
გამომძიებლის თქმით, რამდენიმე დღის შემდეგ, როცა გახსნა ტელეფონი და დაათვალიერა Whatsapp-ს და Viber, არც ერთი შეტყობინება არ იყო შესული გარდა ბანკის და აფთიაქის რეკლამებისა.
“ეს ძალიან გამიკვირდა, რადგან ასეთი გაქანების გოგოს, მითუმეტეს ასეთ ადგილას მუშაობდა, წესით უნდა ჰქონოდა რამე ზარები. ელგუჯა აპუაშვილს ეს ტელეფონი არ უნდა ჰქონოდა.” – ამბობს სერგო შუბითიძე.
“ფორმულას” ინფორმაციით, შუბითიძე საქმეს დაახლოებით 2 კვირის განმავლობაში ხელმძღვანელობდა, ვიდრე გამოძიებას თბილისის ბიურო გადაიბარებდა. შუბითიძე ასევე ამბობს, რომ გამოძიების დროს ყველა გამომძიებელს პროკურატურიდან გამოეგზავნა წინასწარ გაწერილი კითხვარი, რომლითაც უნდა ეხელმძღვანელათ და მის ფარგლებს არ გასცდენოდნენ.
ყოფილი გამომძიებელი ასევე საეჭვოდ მიიჩნევს ბაჩალიაშვილის სხეულის მდგომარეობასაც. მისი აზრით, გვამი რამდენიმე დღის მანქანაში გატარებამდე, შესაძლოა, რაღაც დროის განმავლობაში მიწაზე იყო დატოვებული.
“გვამი იყო გასივებული და სხეულის არც ერთი ნაწილი არ იყო ცარიელი. თვალებიდანაც მატლები ამოდიოდნენ. ფაქტობრივად ვერ მოხდა დათვალიერება, როგორიც უნდა მომხდარიყო, რადგან გვამი ლპობაში იყო წასული. იყო ვერსიები თითქოს მანქანაში ბუზი შეფრინდა, მაგრამ მანქანის საქარე მინები აწეული იყო, განა რამდენი ბუზი უნდა შეფრენილიყო. მე უფრო იმ ვერსიას ვუშვებ, რომ მანამდე მიწაზე იყო და მერე… თუ მიწაზე იქნებოდა, უფრო მეტი მატლი გაუჩნდებოდა და შესაძლოა, რომ ასეთი ყოფილიყო, მაგრამ მანქანაში?” – თქვა შუბითიძემ.
ოჯახის პოზიცია
თამარ ბაჩალიაშვილის დედის, თეონა თამაზაშვილის განცხადებით, მისი შვილის ტელეფონში ყველაფერი წაშლილი იყო. მისი თქმით, შვილს არაერთხელ დაურეკა, თუმცა ტელეფონში მისი ზარი და შეტყობინება ასახული არ იყო.
“ყველაფერი ზუსტადაც მიანიშნებს და ამტკიცებს იმას, რომ ყველაფერი წაშლილია ტელეფონში და Whatsapp-ში პირველ რიგში, სადაც დაურეკეს თამარს და გაიტყუეს სახლიდან საქმის გასარჩევად.
შოთაძეს მივმართავ, კეთილი ინებონ და დაიწყონ გამოძიება. მტკიცებულებები საკმარისია და საკმარისზე მეტიც არის, რომ დაიწყონ გამოძიება. თუ არადა, პირდაპირ უკვე მიუთითებს მაგათ მფარველობაზე, რომ მფარველობენ მკვლელებს და აყალბებენ ყველაფერს”, – განაცხადა თამაზაშვილმა.
