"სიჩუმე ღალატია, დაუყოვნებლივ მიზნობრივ სანქციებს მოვითხოვთ" - სტრასბურგში საქართველოზე დებატები გაიმართა
სტრასბურგში საქართველოზე დებატები გაიმართა
ევროპის საბჭოს საპარლამენტო ასამბლეაში (PACE) საქართველოზე დებატები გაიმართა. მომხსენებელმა ქვეყანაში მიმდინარე მოვლენებზე ისაუბრეს და ხაზი გაუსვეს დემოკრატიულ უკუსვლას და ყურადღება გაამახვილეს ოპოზიციონერი ლიდერების, ჟურნალისტებისა და პროევროპული აქციების მონაწილეების დაკავებაზე და ქართულ ოცნებას მათი გათავისუფლებისკენ მოუწოდეს.
დეპუტატებმა ასევე თქვეს, რომ საჭიროა ზომების გაძლიერება, რათა “რეპრესიებზე პასუხისმგებელ პირებს” სანქციები დაუწესდეთ.
რა თქვეს მომხსენებლებმა
ერიკ-ნილს კროსი: [კოლეგებო], მე თქვენ გეკითხებით – სხვა რა უნდა მოხდეს საქართველოში, რომ საბოლოოდ ავდგეთ და რაიმე მოვიმოქმედოთ ამის შესახებ? რა თქმა უნდა, ასევე მინდა გთხოვოთ, მოვლენები სწორი სიტყვებით დაახასიათოთ. ჩვენ ვიყენებთ ტერმინს – “დემოკრატიული უკუსვლა”. ეს არ არის დემოკრატიული უკუსვლა.
ის, რასაც ჩვენ რეალურ დროში ვუყურებთ, არის საქართველოს რუსული სტილის, სავარაუდოდ, რუსეთის მიერ მართული, რუსეთის მიერ ხელშეწყობილი ხელში ჩაგდება. ეს არის სახელმწიფოს დაპყრობა ოლიგარქიული, ავტოკრატიული რეჟიმის მიერ, რომელიც შთაგონებულია და კონტროლდება მოსკოვის მხრიდან და ჩვენ თვალწინ მიმდინარეობს.
ბიძინა ივანიშვილი და მისი ე.წ. მთავრობას საქართველო 180 გრადუსით საპირისპირო მიმართულებით – დემოკრატიიდან დიქტატურისკენ მიჰყავს. ქართული ოცნება ავტორიტარული ძალაუფლების კონსოლიდაციას სწრაფად ახდენს.
ამიტომ მოდით, აბსოლუტურად ნათლად განვაცხადოთ: თუ ახლა არ გავცემთ პასუხს, ჩვენ თანამონაწილეები ვიქნებით. სიჩუმე აღარ არის ნეიტრალიტეტი. სიჩუმე არის ღალატი.
ამიტომ ჩვენ ქართული ოცნების ყველა ოფიციალური პირის, მინისტრის, დეპუტატის, მოსამართლის, პოლიციის, მათი მეზობლებისა და ოჯახების წინააღმდეგ დაუყოვნებლივი მიზნობრივი სანქციების დაწესების მოწოდებით გამოვდივართ.
ჩვენ მოვუწოდებთ ღირსეულ ოფიციალურ პირებს, საჯარო მოხელეებსა და პოლიციელებს საქართველოში – დატოვონ თანამდებობები და შეუერთდნენ ხალხს. მოვითხოვთ საქართველოს წინააღმდეგ სახელმწიფოთაშორისო საქმის აღძვრას, ისევე როგორც ეს ადამიანის უფლებათა სასამართლოში მოხდა, ისევე როგორც ეს საბერძნეთის შავი პოლკოვნიკების წინააღმდეგ გაკეთდა ერთხელ, მძიმე დარღვევების გამო, ვინაიდან საქართველო შემდეგი ტყვე ერად გადაქცევის საფრთხის წინაშე დგას, ისევე როგორც ბელარუსი არის დღეს და ევროპის ნაწილი იყო ადრე.
ეს რუსეთისა და “რუსკი მირის” გამარჯვება, ხოლო ევროპისა და ამ ასამბლეის დამარცხება იქნება”.
პერან მუნი: “კონკრეტულად ზურაბ ჯაფარიძისა და ნიკა მელიას პოლიტიკურად მოტივირებულ დაკავებაზე ვაპირებდი საუბარს, მაგრამ სანამ მსოფლიოს ყურადღება ახლო აღმოსავლეთის მოვლენებისკენ იყო მიპყრობილი, საქართველოს დისკრედიტირებულმა მთავრობამ მომენტი ქვეყანაში დემოკრატიის ჩახშობის ესკალაციისთვის გამოიყენა.
ახლა სრულიად ცხადია, რომ ზურაბ ჯაფარიძისა და მელიას მცირე პროცედურული ბრალდებებით დაკავებები რეპრესიის უფრო ფართო კამპანიის ნაწილია. რეალურად, ექვსი ოპოზიციონერი ლიდერი დააპატიმრეს, ბოლო რამდენიმე კვირაში.
როდესაც ზურაბ ჯაფარიძე ხელბორკილებით მიჰყავდათ, მან თქვა: “ბოლოს ჩვენ გავიმარჯვებთ”. ეს იმ კაცის სულისკვეთებაა, რომელსაც თავისუფლების სწამს, მაშინაც კი, როდესაც მას ძალით აჩუმებდნენ. ეს იმ კაცის ხმაა, რომელსაც უნდა მოუსმინონ ამ დარბაზში და მთელს ევროპაში.
და ეს დაპატიმრებები, როგორც “ცალკეულები” ვეღარ აღიწერება. პოლიტპატიმრების სიას უნდა დავუმატოთ ნიკა გვარამია, მესამე დაკავებული ოპოზიციონერი ლიდერი.
გასული კვირის ოთხშაბათს, ლონდონში ბადრი ჯაფარიძეს შევხვდი, ოპოზიციური პარტია “ლელოს” ლიდერს, რომელმაც მიღებული კანონები ამიხსნა, რომელთა მიზანია, მედიის თავისუფლების, სამოქალაქო საზოგადოებისა და მშვიდობიანი შეკრების შეზღუდვა. ჯაფარიძემ მითხრა, რომ ისიც თბილისში ბრუნდებოდა, სადაც მის წინააღმდეგ, მისი აზრით, მცირე ბრალდება იყო უსამართლო სასამართლოსგან, რომლისგანაც ჯარიმას ელოდა. ამის ნაცვლად, მიმდინარე კვირის ორშაბათს, ბადრი ჯაფარიძეს “ლელოს” პარტიის თანალიდერ მამუკა ხაზარაძესთან ერთად 8-თვიანი პატიმრობა მიუსაჯეს და 2 წლით აუკრძალეს საჯარო თანამდებობის დაკავება.
ეს უბრალოდ ოპოზიციონერები არ არიან, ესენი საქართველოს დემოკრატიული მისწრაფებებისა და ორგანიზებული ავტორიტარიზმისთვის წინააღმდეგობის სიმბოლოები არიან.
მეგობრებო, უნდა გითხრათ, რომ დრო სწრაფად იწურება და ახლავე უნდა ვიმოქმედოთ. საქართველოსთვის ბოლო შესაძლო მომენტში ვართ. თუ სერიოზულები ვართ მათი მხარდაჭერის შესახებ, ვინც მამაცად უწევს წინააღმდეგობას საქართველოში პოლიტიკურ დევნას.
მიზანში უნდა ამოვიღოთ ამ რეპრესიებზე პასუხისმგებლები. არა მხოლოდ სიტყვებით, არამედ ქმედებებით. ეს ნიშნავს მათი აქტივების გაყინვას, დასავლური განათლებისა და ინსტიტუტებისადმი წვდომის შეზღუდვას და მათთვის საზღვარგარეთ არდადეგებისა და უსაფრთხო თავშესაფრის ფუფუნების ჩამორთმევას მაშინ, როდესაც ისინი სახლში დემოკრატიას შლიან.”
ოლექსი გონჩარენკო: “გუშინ აქ, ამ დარბაზში, უკრაინის პრეზიდენტი ვოლოდიმირ ზელენსკი მივიღეთ, რომელიც სიტყვით გამოვიდა, მაგრამ მანამდე მან შეთანხმებას მოაწერა ხელი სპეციალური ტრიბუნალის შესახებ. ნამდვილად ისტორიული მომენტი – ტრიბუნალი აგრესიისთვის.
მაგრამ იცით რა? წევრი სახელმწიფოებიდან ექვსი ქვეყანაა, რომლებმაც ხელი არ მოაწერეს ამ შეთანხმებას. და ამ ექვსი ქვეყნიდან ერთ-ერთი საქართველოა. საქართველო თავადაა რუსული აგრესიის მსხვერპლი. საქართველოს ტერიტორიის 20% რუსეთის მიერაა ოკუპირებული – თითქმის იგივე რიცხვი, რაც უკრაინაში.
საქართველო მოსკოვის რეჟიმის მსხვერპლი უფრო ადრეც კი იყო, ვიდრე ჩვენ და ამის შემდეგ საქართველო მხარს არ უჭერს რუსული აგრესიის წინააღმდეგ ტრიბუნალს. შეგიძლია ეს წარმოიდგინოთ?
ასე რომ, კითხვაა – რეალურად ვისზე მუშაობს საქართველოს მთავრობა? ვინ არიან მათი პატრონები? როდესაც ისინი ოპოზიციონერ ლიდერებს აპატიმრებენ, ეს ქართველი ხალხის ხმა არ არის, ეს კრემლის ჩურჩულია.
ქართველი ხალხი ლიდერებს იმსახურებს, რომლებიც მათ დაუდგებიან მხარში და არა პუტინს. და ახლა ზუსტად ეს ხდება.
კი, ბრალის ნაწილი ყველა ჩვენგანზეა. 2008 წელს მომენტი იყო, როდესაც უკრაინა და საქართველო ნატოს კართან იდგნენ და ნატომ თქვა: “კი, შემოგიშვებთ, მაგრამ არ ვიცით, როდის”. ბევრმა, ხალხმა ვერ გაიგო რა ხდებოდა. პუტინმა ცხადად გაიგო. და 2008 წლიდან მან დაიწყო საქართველოს წინააღმდეგ ომი, მერე უკრაინის წინააღმდეგ.
ის ამ ქვეყნებს ანადგურებს, ყველა ჩვენგანის მოკვლას ცდილობს, ამ ქვეყნების ოკუპაციას ცდილობს. და ახლა ის საქართველოს ჰიბრიდული გზით იღებს, ვინაიდან, მისი ტანკები უკრაინაში არიან ზედმეტად დაკავებულები. სწორედ ამიტომ არა ტანკებია, არამედ მარიონეტებია, რუსი აგენტებია, რომლებიც საქართველოზე ამ თავდასხმას ახორციელებენ.
ეს ბიძინა ივანიშვილი არაა, მას “ლუკაშვილი” უნდა დავუძახოთ, ვინაიდან ბელარუსს აკეთებს საქართველოსგან. სწორედ ბელარუსის გზაა, რომელმაც ჯერ დემოკრატია დაკარგა, შემდეგ კი სახელმწიფოებრიობა. და ახლა ეს ოკუპირებული ქვეყანაა. სწორედ ეს ხდება ახლა საქართველოში.
სულ რაღაც რამდენიმე თვის წინ აქ გიორგი ვაშაძეს, სხვა ქართველ ლიდერებს შევხვდით, რომლებიც ახლა ციხეში არიან. უბრალოდ წარმოიდგინეთ – მათ შევხვდით, ხელი ჩამოვართვით მათ, მათ ვუთხარით “საქართველოს გაუმარჯოს” და ახლა ეს ხალხი ციხეშია.”
პეტრა ბაირი: “ეკონომისტის დაზვერვის ერთეულის“ დემოკრატიის ინდექსის 2024 წლის მონაცემებით, საქართველოში დემოკრატიის მხრივ მსოფლიოში მეოთხე ყველაზე დიდი გაუარესებაა და სამხრეთ კავკასიის რეგიონში ყველაზე მკვეთრი ვარდნა დაფიქსირდა. 200 დღეზე მეტია, ახალი არჩევნების მოთხოვნით საპროტესტო აქციები მიმდინარეობს.
„ქართული ოცნების“ მეთაურობით მთავრობამ რეპრესიული ზომების სერია დააწესა, როგორიცაა შემზღუდავი კანონმდებლობის ცვლილებები, სისხლისსამართლებრივი დევნის გაძლიერება და ზოგჯერ მკაცრი სასჯელები დემონსტრანტების, სამოქალაქო საზოგადოებისა და ოპოზიციის ცნობილი ფიგურების მიმართ. მხოლოდ მცირე ნიშნებია იმისა, რომ საპროტესტო აქციები საბოლოოდ, პოლიტიკურ ცვლილებებს გამოიწვევს.
დღემდე ქვეყანაში დაპატიმრების ყველაზე გახმაურებული შემთხვევა იყო ქალბატონი მზია ამაღლობელის დაკავება, დამოუკიდებელი მედია საშუალებების დამფუძნებლისა და დირექტორის საქმე. იგი დააკავეს ბათუმში საპროტესტო სტიკერის გაკვრისა და სავარაუდოდ, პოლიციელისთვის ხელის დარტყმის გამო.
„ქართულმა ოცნებამ“ მრავალი კანონი მიიღო, რომლებიც მიზნად ისახავს მომიტინგეების მიმართ უფრო შემზღუდავი მიდგომის გამოყენებას. ესენია ჯარიმების და თავისუფლების აღკვეთის სასჯელების გაზრდა და ახალი სისხლის სამართლის დანაშაულების, როგორიცაა ღალატი, შემოღებაც კი. მაგალითად, 2024 წლის დეკემბერში, გზის გადაკეტვისთვის ადმინისტრაციული ჯარიმა 180 ევროს ეკვივალენტიდან 1800 ევრომდე გაიზარდა, რაც უბრალოდ მიზნად ისახავს ადამიანების ყურადღების გადატანას მათი ფუნდამენტური უფლებების დაცვისგან.
ჩვენი პასუხი უნდა იყოს მკაფიო. ჩვენს საერთო ღირებულებებში არსებობს წითელი ხაზი და ადამიანების დაპატიმრება იმის გამო, რომ მათ სურთ ისარგებლონ თავიანთი ფუნდამენტური ადამიანის უფლებებით, როგორიცაა გამოხატვის თავისუფლება და სიტყვის თავისუფლება, ნამდვილად დაუშვებელია.
არ უნდა დავკარგოთ იმედი და ვეცადოთ კიდევ უფრო მეტი ზეწოლა მოვახდინოთ მათზე, რათა ჩაატარონ ახალი არჩევნები აქტივისტებისა და დემონსტრანტების, მშვიდობიანი დემონსტრანტების წინააღმდეგ ძალადობრივი ქმედებების გამოსაძიებლად და, რა თქმა უნდა, ყველა პოლიტიკური პატიმრის გასათავისუფლებლად.“
ალბანა ვოკში: “მხოლოდ გასულ კვირას, ოთხი დემოკრატიული ოპოზიციის ლიდერი დააკავეს. არა დანაშაულის ჩადენისთვის, არამედ ე.წ. საგამოძიებო კომისიის წინაშე წარდგომაზე უარის თქმისთვის, რომელსაც არაფერი აქვს საერთო კანონის უზენაესობასთან და ყველაფერი, რაც პოლიტიკურ დევნასთანაა დაკავშირებული. დღეს საქართველოში ანგარიშვალდებულების ინსტიტუტები რეპრესიის ინსტრუმენტებად იქცა.
არ დაგვავიწყდეს, რომ საქართველოს მესამე პრეზიდენტი, მიხეილ სააკაშვილი, რომელიც ამ ასამბლეის ვიცე-პრეზიდენტის თანამდებობას იკავებდა პოლიტიკურ პატიმრობაში რჩება. მისი შემთხვევა არ არის ერთადერთი. დაკავებულები არიან სხვა ცნობილი ოპოზიციური ფიგურებიც. მთავარი ოპოზიციური პარტიის თავმჯდომარე, ქალბატონი თინა ბოკუჩავა, ერთ-ერთი ყველაზე შესანიშნავი აქტიური ოპოზიციური ლიდერი, ქალი ლიდერი, ტერორის სამიზნე გახდა. მისი ქმარი ძალადობრივად გაიტაცეს. მის შვილებს დაემუქრნენ. ეს პოლიტიკა არ არის. ეს დევნაა. და ჩვენ ამას უნდა ვუწოდოთ ის რაც არის. და თუ თვალს არ გავუსწორებთ რეალობას, მალე საქართველოში ყველა ოპოზიციური ლიდერი ციხეში აღმოჩნდება და პარტიები შემცირდება და არსებობას შეწყვეტს. ოპოზიცია კი აღარ იარსებებს.”
