მოსაზრება: სტოლტენბერგის განცხადებაში პირდაპირ იყო ნათქვამი, რომ დემოკრატიაში გვაქვს ჩამორჩენა

სტოლტენბერგის განცხადება

25 აპრილს, NATO-ს გენერალური მდივანი იენს სტოლტენბერგი პრემიერმინისტრ ირაკლი ღარიბაშვილს ბრიუსელში, NATO-ს შტაბბინაში შეხვდა. შეხვედრის შემდეგ გამართულ ბრიფინგზე სტოლტენბერგმა ხაზი გაუსვა, რომ NATO სრულად უცხადებს საქართველოს პოლიტიკურ და პრაქტიკულ მხარდაჭერას და პირველ რიგში, “ვუცხადებთ” მხარდაჭერას საქართველოს შიდა რეფორმებს და “სწორედ ამიტომ მოვუწოდეთ მთავრობას, უკან გაეხმო კანონი უცხოელი აგენტების შესახებ, რომელიც არ შეესაბამებოდა დემოკრატიულ პრინციპებს.”

„რონდელის ფონდის” ევროპული კვლევების ცენტრის დირექტორმა, კახა გოგოლაშვილმა „პალიტრანიუსის“ ეთერში საქართველოს პრემიერ-მინისტრის ბრიუსელში ვიზიტი და მისი ნატოს გენერალურ მდივანთან, იენს სტოლტენბერგთან შეხვედრა შეაფასა.

გოგოლაშვილის თქმით, იენს სტოლტენბერგის მიერ გაკეთებული განცხადებებით შეგვიძლია დავასკვნათ, რომ ამ ეტაპზე NATO-ში ინტეგრაციის მხრივ ინსტიტუციური წინსვლა არ იქნება.

„სტოლტენბერგთან ვიზიტის დროს ძალიან მკაფიოდ გამოჩნდა რაღაცები. სტოლტენბერგს ჰქონდა ორი ძირითადი შენიშვნა, რომელიც ძალიან დიპლომატიური ენით იყო წარმოთქმული. ჩვენთან შეიძლება სხვანაირად გაიგოს ადამიანმა ან შეიძლება მთავრობაში სხვანაირად წარმოაჩინონ, მაგრამ სინამდვილეში პირდაპირ იყო ნათქვამი, რომ დემოკრატიაში გვაქვს ჩამორჩენა და საჭიროა მეტი პედალირება და დემოკრატიული რეფორმების გაგრძელება. მეორე, ეს იყო უკრაინის მხარდაჭერა, რომელსაც მან ხაზი გაუსვა. თქვა, რომ უკრაინის მხარდაჭერა დღეს ძალიან მნიშვნელოვანია.

კიდევ მან აღნიშნა, რომ საქართველოსთან გაგრძელდება ნაყოფიერი სუბსტანციური პაკეტის ფარგლებში. ეს ნიშნავს იმას, რომ საუბარი, რომ რაღაც სტატუსი მოგვანიჭონ ანუ ინსტიტუციური წინსვლა არ იქნება, მაგრამ ალბათ, იქნება ამ პაკეტის გაფართოება, მისი გაძლიერება სამხედრო დახმარების სხვადასხვა ფორმებით, რომელიც მიმართული იქნება იქითკენ, რომ საქართველომ გააძლიეროს თავისი თავდაცვა. ეს არის სტატუს კვო, რომელიც დღესაა ამ საკითხთან მიმართებაში. მე არ მოველი არაფერ ახალს მომავალ ვილნიუსის ნატო-ს სამიტისგან, თუმცა უკრაინას ნამდვილად ექნება რაღაც ინსტიტუციური წინსვლა.“ – განაცხადა კახა გოგოლაშვილმა.

● “დემოკრატიული ლპობის საფუძველი ბიძინა ივანიშვილია” – დებატები ევროპარლამენტში საქართველოზე 
● აშშ-მ ჩინჩალაძე, მურუსიძე და კიდევ ორი მოსამართლე დაასანქცირა
● სენატორი ჯინ შაჰინი: საქართველოში უკუსვლაა – შესაძლოა გადავხედოთ სტრატეგიას დახმარებასთან დაკავშირებით

NATO-ს გენერალურ მდივანთან შეხვედრის შემდეგ საქართველოს პრემიერ-მინისტრმა ირაკლი ღარიბაშვილმა აღნიშნა, რომ ქვეყანა მიზნად ისახავს გააღრმაოს NATO-სთან პრაქტიკული თანამშრომლობა.

მისივე თქმით, საქართველოს აქვს საკმაოდ კარგი გამოცდილება ალიანსის მისიებში წვლილის შეტანის კუთხით. ღარიბაშვილის განმარტებით, საქართველოს წვლილი შეაქვს ევროატლანტიკურ მშვიდობასა და უსაფრთხოებაში, “რაც ყველასთვის” კარგად არის ცნობილი:

“საქართველოს ევროატლანტიკური მისწრაფება კვლავ რჩება ჩვენი საგარეო პოლიტიკის მთავარ პრიორიტეტად. ასევე, მსურს აღვნიშნო, რომ ჩვენ მივაღწიეთ მნიშვნელოვან წინსვლას. ბოლო ათი წლის განმავლობაში, ჩვენ მოვაწერეთ ხელი ევროკავშირთან ასოცირების ხელშეკრულებას, ასევე, თავისუფალი ვაჭრობის ხელშეკრულებას, მოვიპოვეთ ევროკავშირთან უვიზო მიმოსვლა. გასულ წელს უკვე მივიღეთ ევროპული პერსპექტივა, რაც ისტორიული გადაწყვეტილება იყო და ჩვენ აქტიურად განვაგრძობთ მუშაობას ე.წ. 12 პუნქტის განხორციელებაზე, რომელიც ძალიან მალე დასრულდება.”