სომხეთს ღიად ემუქრება უკრაინული სცენარი. მოსაზრება ერევნიდან

რუსეთი სომხეთს ემუქრება

„ჩვენ ვხედავთ, როგორ ცდილობენ სომხეთის გადაქცევას მესამე უკრაინად, თუ მოლდოვას განვიხილავთ მეორე უკრაინად. ნიკოლ ფაშინიანი დიდი ნახტომებით მიიწევს ვოლოდიმირ ზელენსკის გზაზე“, – განუცხადა მაღალი რანგის წყარომ მოსკოვში სამთავრობო-პროპაგანდისტულ TASS-ს. მან ანონიმურა დარჩენა ისურვა.

წყარომ გააკრიტიკა სომხეთის პრემიერმინისტრის გამოსვლა ევროპარლამენტში და მას „აბსოლუტურად უპასუხისმგებლო და პროვოკაციული“ უწოდა, განსაკუთრებით რუსეთთან და სომხეთ-რუსეთის ურთიერთობებთან დაკავშირებით.

პოლიტოლოგმა რობერტ გევონდიანმა JAMnews-ს განუცხადა, რომ ოფიციალური მოსკოვი ასე გამოხატავს უკმაყოფილებას ფაშინიანის გამოსვლით. ექსპერტმა ხაზგასმით აღნიშნა, რომ ეს არ არის პირველი შემთხვევა, როცა რუსეთი სომხეთს უკრაინული სცენარის განმეორებით ემუქრება.

ანალიტიკოსი მიიჩნევს, რომ რუსეთის ფედერაცია ჯერჯერობით მხოლოდ განცხადებებით დაკმაყოფილდება და კონკრეტულ ნაბიჯებს არ გადადგამს, მანამ სანამ სომხეთი არ დაიწყებს რუსეთის სამხედრო ბლოკიდან, ОДКБ-დან გასვლის პროცესს. მისი აზრით, „სომხურ მხარეს, ასეთი განზრახვა ჯერ არ აქვს“.

„იმ დროს, როდესაც 100 ათასი სომეხი მთიანი ყარაბაღიდან სომხეთში გაიქცა, ჩვენი უსაფრთხოების მოკავშირეები არათუ არ დაგვეხმარნენ, არამედ საჯარო მოწოდებები გააკეთეს სომხეთში ხელისუფლების შეცვლის, დემოკრატიული ხელისუფლების დამხობისკენ. მორიგი შეთქმულება სომხური სახელმწიფოს წინააღმდეგ ხალხის ერთიანობის შედეგად ჩაიშალა.“ – განაცხადა პოლიტოლოგმა.

• “ეს მათი არჩევანია” – პუტინმა დსთ-სთან საქართველოს, უკრაინისა და მოლდოვის დამოკიდებულებაზე ისაუბრა
• “სადაც რუსეთია, იქ არის გადაგდება, ღალატი, შეურაცხყოფა”. ქართველი ექსპერტები ყარაბაღის მოვლენებს აფასებენ

კომენტარი

რუსეთი დიდი ხანია ემუქრება სომხეთს უკრაინული სცენარით – „ძირითადად რუსული მედიის წარმომადგენლებისა და ექსპერტების პირით“, ამბობს პოლიტოლოგი რობერტ გევონდიანი. მისი თქმით, ამ შემთხვევაშიც რუსული დიპლომატია ტრადიციული სქემით მუშაობს:

„თავიდან ვიღაც ძალიან მკაცრ შეფასებებს იძლევა ანონიმურობის პრინციპით. გარკვეულ რეაქციას ველოდები რუსეთის საგარეო საქმეთა სამინისტროს ოფიციალური წარმომადგენლისგანაც. შემდეგ გადავლენ საექსპერტო დონეზე, რის შემდეგაც ცოტა რბილად გამოხატავენ უკმაყოფილებას“.

ანალიტიკოსის აზრით, ასე სურს რუსეთს კიდევ ერთხელ შეგვახსენოს, რომ მოსკოვს აქვს ინსტრუმენტები, რომლითაც დასჯის ქვეყანას, თუ სომხეთი გააგრძელებს დამოუკიდებელ სვლას:

„ეს არის ღია საფრთხე სომხეთისთვის. მაგრამ ეს ახალი არ არის, ეს საფრთხე სომხეთის თავზე საკმაოდ დიდი ხანია ტრიალებს. სიტუაცია მკვეთრად დაიძაბა, მაგალითად, რომის სტატუტის რატიფიცირების წინა დღეს“.

მუქარები იწყება მაშინ, როცა ქვეყანა იღებს სუვერენულ გადაწყვეტილებას, აკეთებს განცხადებას ან ახორციელებს ქმედებებს მისი ინტერესებიდან გამომდინარე, აღნიშნავს გევონდიანი. მისი თქმით, სომხეთის ხელისუფლება ამას უნდა მიეჩვიოს და გამოწვევების გასანეიტრალებლად მექანიზმები შეიმუშაოს.

მისი თქმით, სომხეთი მარტო ვერ უმკლავდება ამ გამოწვევებს და დასავლელმა პარტნიორებმა უნდა უზრუნველყონ მხარდაჭერა – ფინანსური თუ სამხედრო კუთხით. სომხეთს უნდა შეეძლოს აწარმოოს დიპლომატია, რომელიც ანეიტრალებს ერთი მხარის გამოწვევებს მეორე მხარის მხარდაჭერით.

პოლიტოლოგი დარწმუნებულია, რომ სანამ ერევანი არ მიიღებს გადამწყვეტ ზომებს, კერძოდ, არ დაიწყებს ОДКБ-ს წევრობის შეჩერების პროცესს, მოსკოვი არ მიმართავს პრაქტიკულ ნაბიჯებს და დაკმაყოფილდება „ექსპერტების და მედიის წარმომადგენლების თავდასხმებით.”

თუმცა, იგი აფრთხილებს ხელისუფლებას:

„საბოლოოდ მოსკოვის მხრიდან ამ ნაბიჯებს დავინახავთ: უპირველეს ყოვლისა, ეს იქნება ზემო ლარსის გამშვებ პუნქტთან დაკავშირებული ეკონომიკური პრობლემები, ევრაზიული ეკონომიკური კავშირის გარკვეული ინსტრუმენტების დახმარებით ზეწოლის გაზრდა, ასევე საზღვარზე აზერბაიჯანის სამხედრო პროვოკაცია. სწორედ ამიტომ, რუსეთს არ სურს ალიევის ევროპაში ინტეგრაცია, სადაც შესაძლებელია ისეთი შეთანხმებების მიღწევა, რომელიც გამორიცხავს მსგავს პროვოკაციებს.“