სომხეთის პარლამენტის ვიცე-სპიკერი ამომრჩევლებს მოუწოდებს, "ოლიგარქებთან ხიდები დაწვან“
სომხეთის ეროვნული კრების ვიცე-სპიკერი არჩევნებში ოლიგარქების მონაწილეობის შესახებ
სომხეთის პარლამენტის ვიცე-სპიკერის, რუბენ რუბინიანის განცხადებით, 2026 წლის 7 ივნისს დაგეგმილი საპარლამენტო არჩევნები არსებითად არჩევანი იქნება მოქმედ ხელისუფლებასა და ყოფილი პრეზიდენტის, რობერტ ქოჩარიანის და “ორი ოლიგარქის“ ბანაკს შორის. მისი თქმით, ქოჩარიანისა და ბიზნესმენების, გაგიკ ცარუკიანისა და სამველ კარაპეტიანის ხელისუფლებაში დაბრუნება კორუფციის აღდგენასა და აზერბაიჯანთან დამყარებული მშვიდობის საფრთხის ქვეშ დაყენებას ნიშნავს.
- ფაშინიანი: ჩვენ არ ვიმოქმედებთ რუსეთის წინააღმდეგ, მაგრამ ყოველთვის ვიმოქმედებთ სომხეთის ინტერესებით
- “სექსის სამინისტრო“ და პოლიტიკის ენა: როგორ გადაიქცა სარგის კარაპეტიანის პოდკასტი სომხეთში გენდერულ სკანდალად
რუბინიანმა, რომელიც მმართველი პარტიის “სამოქალაქო კონტრაქტის“ ერთ-ერთი ლიდერია, განაცხადა, რომ მისი ძალა კონსტიტუციური უმრავლესობის მოპოვებას ისახავს მიზნად. მისი თქმით, “რობერტ ქოჩარიანი და ორი ოლიგარქი, და ფაქტობრივად ყველა ოლიგარქი, უნდა განდევნონ პოლიტიკური ასპარეზიდან და პარლამენტიდან“.
ვიცე-სპიკერის შეფასებით, პარლამენტი “ნორმალური პოლიტიკური დებატების პლატფორმად“ მხოლოდ იმ შემთხვევაში იქცევა, თუ ამომრჩეველი ქოჩარიანთან და მასთან დაკავშირებულ ბიზნესწრეებთან ყველა ხიდს დაწვავს.
რუბინიანი ამტკიცებს, რომ საზოგადოებრივი აზრის ყველა გამოკითხვა მმართველი პარტიის უპირატესობას აჩვენებს, თუმცა კონკრეტული კვლევები ან მონაცემები არ დაუსახელებია. მისი თქმით, ხელისუფლებას დამარცხების არ ეშინია, თუმცა ამომრჩეველმა უნდა იცოდეს, ‘რა ხდება” პოლიტიკურ ასპარეზზე.
მისი ბრალდებით, ოპოზიცია ცდილობს შექმნას შთაბეჭდილება, თითქოს სხვადასხვა ჯგუფებს შორის განხეთქილებაა, მაშინ როდესაც რეალურად ისინი კოორდინირებულად მოქმედებენ.
მაგალითად, მან ახსენა არამ ვარდევანიანი – ყოფილი დეპუტატი, რომელიც ადრე ქოჩარიანის გუნდში იყო და ახლა, მისი თქმით, კარაპეტიანის ინტერესებს წარმოადგენს – და ანდრანიკ ტევანიანი, რომელიც ქოჩარიანის ბლოკიდან გადავიდა ცარუკიანთან თანამშრომლობაზე.
რუბინიანის განცხადებით, წინასაარჩევნო კამპანიაში გადამწყვეტი უნდა იყოს არა მხოლოდ პერსონალიები, არამედ პოლიტიკური პლატფორმები და მომავლის ხედვა. მისი თქმით, ქოჩარიანისა და მასთან ასოცირებული ძალების გამარჯვება არა მხოლოდ კორუფციის “დაბრუნებას“, არამედ აზერბაიჯანთან მიღწეული მშვიდობის მინიმუმ საფრთხის ქვეშ დაყენებას გამოიწვევს.
ბოლო დღეებში მმართველი პარტიის წარმომადგენლები საუბრობენ “ოპერაცია გიუმრი-2“-ის რისკზეც – მინიშნება 2025 წლის გაზაფხულზე გიუმრიში ჩატარებულ ვადამდელ მუნიციპალურ არჩევნებზე. მაშინ ვერც ერთმა პარტიამ ვერ მოიპოვა 50%+1 ხმა.
მართალია, “სამოქალაქო კონტრაქტმა“ ყველაზე მეტი ხმა მიიღო, თუმცა ოპოზიციურმა ძალებმა კოალიციაზე უარი თქვეს და საბოლოოდ, სამი ოპოზიციური პარტია გაერთიანდა და მხარი დაუჭირა სომხეთის კომუნისტური პარტიის კანდიდატ ვარდან ღუკასიანს, რომელმაც ქვეყნის სიდიდით მეორე ქალაქის მერის პოსტი დაიკავა. მოგვიანებით იგი მოსყიდვის ბრალდებით დააკავეს.
რუბინიანის თქმით, ეს მაგალითი აჩვენებს, თუ როგორ შეიძლება ოპოზიციურმა ალიანსებმა ძალაუფლება მოიპოვონ, მიუხედავად იმისა, რომ მმართველმა პარტიამ ყველაზე მეტი ხმა მიიღო.
მისი შეფასებით, თუ ქოჩარიანი და “პრორუსული ფიგურები“ დაბრუნდებიან ხელისუფლებაში, “მექრთამეები ციხეში აღარ მოხვდებიან“, რადგან სამართალდამცავ ორგანოებს დამოუკიდებლად მუშაობის საშუალებას არ მისცემენ.
ვიცე-სპიკერმა აღნიშნა, რომ საარჩევნო კოდექსი კოალიციების შექმნას და მთავრობის ფორმირებას ითვალისწინებს და ეს “დანაშაული არ არის“. თუმცა დასძინა: ‘ყველაფერი, რაც დანაშაული არ არის, კარგი არ არის“.
მისი თქმით, ამომრჩეველმა უნდა გადაწყვიტოს, სურს თუ არა იმ მმართველობის გამეორება, რომელიც უკვე ნახა.
“ჩვენ ვნახეთ ისინი ხელისუფლებაში. და არ მგონია, რომ ასეთი მმართველობის გამეორება გვსურს.“ – განაცხადა რუბინიანმა.
