სოხუმის აეროპორტს რუსი ჩინოვნიკის შვილი აღადგენს
სოხუმის აეროპორტი
რუსი ინვესტორის ვინაობა, რომელიც სოხუმის აეროპორტს აღადგენს დიდი ხნის განმავლობაში გასაიდუმლოებული იყო. თუმცა, ბოლოს და ბოლოს ცნობილი გახდა, რომ ეს არის რუსეთის ფედერაციის უშიშროების საბჭოს მდივნის მოადგილის შვილის, რაშიდ ნურგალიევ უმცროსის კომპანია, რომელსაც ამ სფეროში არანაირი გამოცდილება არ აქვს.
ინფრასტრუქტურის განვითარების კომპანია, რომელსაც ეკუთვნის რაშიდ ნურგალიევ უმცროსს, დარეგისტრირდა მოსკოვში სულ ცოტა ხნის წინ, 2023 წლის ივლისში. მისი ძირითადი საქმიანობაა ფინანსური მომსახურების გაწევა, ბუღალტრული და აუდიტორული მომსახურება, კონსულტაცია ბიზნესისა და მენეჯმენტის საკითხებზე.
აფხაზეთის მთავრობამ ამ კომპანიასთან გააფორმა საჯარო და კერძო თანამშრომლობის ხელშეკრულება, რომლის ფარგლებშიც ინვესტორი, სხვა საკითხებთან ერთად, ასაფრენ ბილიკს რეკონსტრუქციას გაუკეთებს. ასევე აშენდება ახალი სამგზავრო ტერმინალი და გარემონტდება ისტორიული აეროპორტის შენობა, სადაც იგეგმება ოფიციალური პირებისა და დელეგაციების მომსახურება.
- უაზრო რეკონსტრუქცია თუ ტურიზმის სტიმული? მოსაზრება აფხაზეთის აეროპორტის შესახებ
- რუსი ინვესტორი სოხუმის აეროპორტს თავისთვის ყველაზე ხელსაყრელი პირობებით აღადგენს
- რა არის უარესი: უკრაინული რაკეტა თუ პუტინის რისხვა? მოსაზრება აფაზეთიდან
ახალი აეროპორტის კომპლექსის გამტარუნარიანობა იქნება 1300 მგზავრი საათში. აღდგენითი სამუშაოების ღირებულება 8 მილიარდ რუბლს შეადგენს [დაახლოებით 84 მილიონი აშშ დოლარი]. აეროპორტი ექსპლუატაციაში 2024 წლის 31 დეკემბრამდე უნდა შევიდეს.
აფხაზეთის ხელისუფლება სოხუმის აეროპორტის აღდგენას მნიშვნელოვან ინფრასტრუქტურულ პროექტად მიიჩნევს, რომელიც მნიშვნელოვნად გააცოცხლებს სოხუმის ეკონომიკას.
ოპოზიცია ძალიან კრიტიკულია ამ საკითხის მიმართ და საყვედურობს ხელისუფლებას იმის გამო, რომ შეთანხმება გულისხმობს „ექსკლუზიურ სახელმწიფო გარანტიებს, საგადასახადო განაკვეთებისა და შეღავათების უცვლელ პირობებს, ასევე მიწის ნაკვეთების პრიორიტეტულ მიწოდებას“.
ინვესტორებისთვის შეღავათების ჩამონათვალი მართლაც უპრეცედენტოა:
● აეროპორტის აღდგენისა და შემდგომი ფუნქციონირებისთვის საჭირო ყველა სამშენებლო მასალა და აღჭურვილობა, საავიაციო საწვავი და საჰაერო ხომალდის ტექნიკური სპეციალური სითხეც კი გათავისუფლებულია საბაჟო გადასახადისგან.
● ინვესტორი თავისუფლდება ქონებისა და მოგების გადასახადისგან ანაზღაურებადი პერიოდის განმავლობაში – 25 წლამდე.
● ინვესტორი მოხმარებული ელექტროენერგიის საფასურს გადაიხდის ტარიფით, რომელიც განკუთვნილია იურიდიული პირების ყველაზე შეღავათიანი კატეგორიისთვის – სკოლებისთვის და საავადმყოფოებისთვის.
აფხაზი ეკონომისტის, ახრა არისტავას თქმით, რუსმა ინვესტორმა, ფაქტობრივად, დაიქირავა აფხაზეთის მთავრობა საკითხების გადასაჭრელად:
„სამწუხაროდ, აეროპორტის ხელშეკრულებას არანაირი კავშირი არ აქვს საჯარო და კერძო პარტნიორობასთან. ეს უფრო ჰგავს იმას, რომ უცხოელმა ინვესტორმა დაიქირავა მთავრობა, რომ ყველა საკითხი თავის სასარგებლოდ გადაჭრას – წაართვას მიწის ნაკვეთები, უზრუნველყოს შეღავათები 25 წლის განმავლობაში, უზრუნველყოს ყველა ნებართვა სწრაფად და ა.შ.”
სოხუმის აეროპორტი 30 წელია რაც აღარ ფუნქციონირებს. აღდგენის შემდეგ მას საერთაშორისო სტატუსი არ ექნება და აქ ფრენას მხოლოდ რუსული ავიახაზები შეძლებენ.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
