საქართველოში სოცმუშაკები გაიფიცნენ. ისინი ხელფასების 100 პროცენტით ზრდას ითხოვენ

სოცმუშაკების პროტესტი

საქართველოში 390-მდე სოცმუშაკი გაიფიცა. ისინი ხელფასების 100%-ით ზრდას, სამგზავრო თანხის გამოყოფასა და სამედიცინო დაზღვევას ითხოვენ. სოციალური აგენტები აცხადებენ, რომ ისინი უყურადღებოდ არიან დარჩენილნი. მათივე თქმით, ჯანდაცვის სამინისტროს შემოთავაზებას არ იზიარებენ და ბრძოლის გაგრძელებას აპირებენ.

“სამინისტროს ახლანდელი შემოთავაზება არის ნოემბერში გაკეთებული შემოთავაზების გაუარესებული ვერსია და ეს ჩვენთვის მიუღებელია. […] ამასთანავე, არაკეთილსინდისიერია სააგენტოს მხრიდან იმის გავრცელება, რომ თითქოს ამ შემოთავაზებას მშრომელები დათანხმდნენ. მოლაპარაკებები არის ორმხრივი და ამას ერთი მხარე მეორის დაუკითხავად ვერ გადაწყვეტს”, – აცხადებენ სოცმუშაკები.

სოციალური მომსახურების სააგენტოს თანამშრომლების გაფიცვამდე ერთი დღით ადრე ჯანდაცვის სამინისტრომ ხელფასების ზრდაზე განცხადება გაავრცელა. უწყებაში ამბობენ, რომ სოციალური აგენტების და სააგენტოს თანამშრომლების შრომის ანაზღაურება თებერვლიდან გაიზრდება.

“ბოლო თვეების განმავლობაში სოციალური მომსახურების სააგენტოში გამართული აქტიური კონსულტაციების შედეგად მიღებულ იქნა გადაწყვეტილება, რომლის მიხედვითაც სოციალური აგენტის ფიქსირებული ანაზღაურება 60 % -მდე იზრდება. კერძოდ, 250 ლარის ნაცვლად 400 ლარი გახდება, უფროსი სოციალური აგენტის კი – 550 ლარის ნაცვლად 700 ლარი. ასევე, ოჯახებში შესრულებული ვიზიტების ფარგლებში, ერთ შევსებულ დეკლარაციაზე სოციალური აგენტები 6 ლარის ნაცვლად 10 ლარს მიიღებენ”, – ნათქვამია სამინისტროს განცხადებაში.

ჯანდაცვის ახალი მინისტრის, ზურაბ აზარაშვილის თქმით, სოციალური აგენტების უკვე გაზრდილი ხელფასი მათი ფუნქციებიდან და დატვირთულობიდან გამომდინარე, ადეკვატურია. 

“სოციალური აგენტების ხელფასის განხილვა მიმდინარეობდა რამდენიმე თვის განმავლობაში. წინა კვირაში მივიღეთ გადაწყვეტილება და ზოგ შემთხვევაში 60%-იანი მატებაც არის. ხელფასის გარდა, მათ შეუძლიათ, გამომუშავებით მიიღონ შემოსავალი და ისიც ყოველ შევსებულ დეკლარაციაზე 6-დან 10 ლარამდე გაიზარდა. ჯამურად, შეუძლიათ ფიქსირებულზე 2-ჯერ მეტი ხელფასი აიღონ. აქედან გამომდინარე, ვფიქრობთ, რომ  მათი ფუნქციებიდან, დატვირთულობიდან და სამუშაო დღიდან გამომდინარე, ხელფასი არის ადეკვატური.” – განაცხადა ზურაბ აზარაშვილმა.

● “მხოლოდ შემთხვევითობაა, უფრო მეტი ბავშვი რომ არ იღუპება”
● როგორ ცხოვრობენ ბავშვები საქართველოში. ბევრი ციფრი და ფაქტი
● “სიმართლე მაინც ვერ დავამტკიცე”. დღიური, რომელსაც ნინი თვითმკვლელობამდე წერდა, ახლა პოლიციაშია

საქართველოში 125 ათასზე მეტი სოციალურად დაუცველი ბავშვია, რომლებიც სოციალური მომსახურების სააგენტოს მეთვალყურეობის ქვეშ არიან.

ბავშვების გარდა სააგენტოს მოვალეობაში ხანდაზმულების, შშმ პირების და სხვა მოწყვლადი ჯგუფების დახმარება-მონიტორინგიც შედის. სისტემა ბენეფიციარებს სოციალური მუშაკების მეშვეობით აკვირდება, სწავლობს მათ პრობლემებს, საჭიროებებს და ამის მიხედვით ეძებს გამოსავალს.

წლებია, ამ სფეროში ჩახედული ადამიანები – ექსპერტები, ფსიქოლოგები და თავად სოციალური მუშაკები არსებულ კრიზისზე საუბრობენ და აცხადებენ, რომ სისტემა არ მუშაობს.