სკანდალი აზერბაიჯანის ოპოზიციაში - პარტია „მუსავათს“ ხელისუფლებისადმი ლოიალურობაში ადანაშაულებენ

პარტია „მუსავათს“ – აზერბაიჯანის ერთ-ერთ უძველეს ოპოზიციურ პარტიას – დანარჩენი ოპოზიციონერები იმის გამო აკრიტიკებენ, რომ მისი ზოგიერთი წევრი ხელისუფლებასთან დიალოგზე წავიდა. 

თავად “მუსავათი” ბრალდებას უარყოფს, და ამბობს, რომ ეს ადამიანები მოქმედებდნენ არა როგორც პარტიის წევრები, არამედ – დამოუკიდებლად. 

სკანდალში ასევე მონაწილეობს ყოფილი პოლიტპატიმარი, ჟურნალისტი აფგან მუხთარლი.

•  „გამოცდა ვირუსით“ – როგორ გადაიტანა ის აზერბაიჯანის ხელისუფლებამ და საზოგადოებამ
• პანდემია – შანსი საქართველოს მმართველი პარტიისთვის?
• ჰომოსექსუალობა თურქეთში: მინისტრი იურისტების წინააღმდეგ

არცთუ გასაგები წინადადება

აზერბაიჯანის ხელისუფლებამ 2020 წლის მარტის დასაწყისში ოპოზიციას დიალოგი ოფიციალურად შესთავაზა. არსებითად, ეს თანამშრომლობისკენ მოწოდებას ნიშნავს, თუმცა ჯერჯერობით გაუგებარია – კერძოდ რა ფორმით.

ოპოზიციონერებს ამ წინადადებაზე განსხვავებული რეაგირება ჰქონდათ.

დაურეგისტრირებელი პარტია „რესპუბლიკური ალტერნატივა“ წინადადებას დათანხმდა, რითაც ბევრის აღშფოთება გამოიწვია. 

პარტიებმა – „მუსვათი“, „სახალხო ფრონტი“, ასევე გაერთიანებამ „აზერბაიჯანის დემოკრატიულ ძალთა ერთობა“ რიგი პირობები წამოაყენეს. მთავრობამ ეს პირობები არ მიიღო, ასე რომ, დიალოგი არ გამოვიდა.  

აზერბაიჯანის ხელისუფლება ასეთი სახის წინადადებით მრავალი წლის განმავლობაში პირველად გამოვიდა. და, უარის მიღებით უკმაყოფილო დარჩა. პრეზიდენტმა ალიევმა თავის გამოსვლებში ხელისუფლებასთან თანამშრომლობაზე უარის მთქმელ ოპოზიციონერებს არაერთხელ უწოდა „მეხუთე კოლონა“, და „ხალხის მტრები“.

ოპოზიცია კი, იმ რეპრესიებისა და დევნის გათვალისწინებით, რასაც ის განიცდის, ხელისუფლებასთან დიალოგისგან კარგს არაფერს მოელის.  ყველაზე ოპტიმისტურად მხოლოდ „რესპუბლიკური ალტერნატივაა“ განწყობილი.

სკანდალური შეხვედრა

და აი, ახლა მედიაში გაჩნდა ინფორმაცია იმის შესახებ, რომ „მუსავათის“ წევრი ნოველა ჯაფაროღლუ, რომელიც ასევე „აზერბაიჯანის ქალთა უფლებების დაცვის საზოგადოებას“ ხელმძღვანელობს, და მისი ორი თანამოაზრე ქალბატონი  პრეზიდენტის ადმინისტრაციის პოლიტიკურ პარტიებთან და საკანონმდებლო ხელისუფლებასთან ურთიერთობის განყოფილების უფროსს – ადალიატ ველიევს შეხვდნენ.

ნოველა ჯაფაროღლუ არ უარყოფს, რომ საკუთარ პარტიასა და ხელისუფლებას შორის დიალოგის მომხრეა: 

 „რა თქმა უნდა, „მუსავათი“  განზე ვერ გადგება იმ შეხვედრიდან, რომელზეც პოლიტიკური პარტიების შესახებ მსჯელობენ. საუბარი შედგა. ყველაფერი ჩვენს ხელმძღვანელობაზე დამოკიდებული, ჩვენ კი „მუსავათის“ მხოლოდ რიგითი წევრები ვართ. მაგრამ ძალიან გვსურს, რომ დიალოგი იყოს“, – ამბობს ის.  

 „სახალხო ფრონტმა“ და „აზერბაიჯანის დემოკრატიულ ძალთა ერთობამ“ ეს „მუსავათის“ მხრიდან ღალატად აღიქვეს.

თავად „მუსავათი“ ირწმუნება, რომ ჯაფაროღლუს ქმედებებზე არანაირად პასუხს არ აგებს, ამის შესახებ არაფერი იცის, და ხელისუფლებასთან საუბარს არ აპირებს. 

 „ველიევთან ამ შეხვედრის მონაწილეები თავიანთი არასამთავრობო ორგანიზაციის სახელით გამოდიოდნენ, და არა – ჩვენი პარტიის. ჩვენზე თავდასხმები არასამართლიანია. ჩვენ ამ შეხვედრაზე არავინ გაგვიგზავნია, და საერთოდ, მომხდარის საქმის კურსში არ ვიყავით“, – აცხადებს „მუსავათის“ მმართველობის წევრი საჰავათ სოლთანლი. 

დანარჩენ ოპოზიციონერებს „მუსავათის“სჯერათ, მაგრამ მისგან, შექმნილ სიტუაციაში გარკვევას და ამ თვითშემოქმედების გამო ნოველა ჯაფარლისთვის პასუხისმგებლობის დაკისრებას მოითხოვენ

ჟურნალისტი უფლებადამცველის წინააღმდეგ

მომხდარზე ძალიან მწვავე რეაქია ჰქონდა ჟურნალისტ აფგან მუხთარლის, რომელიც ციხიდან ახლახან გათავისუფლდა და ამჟამად გერმანიაში ცხოვრობს.

„ვფიქრობ, თუკი ამის შემდეგ ნოველა „მუსავათში“ დარჩება, ეს პარტიის რეპუტაციისთვის ლაქა იქნება“, – გამოთქვა მან აზრი. 

პასუხად ნოველა ჯაფაროღლუმ მუხთარლის ბრალად ფულის კონტრაბანდა დასდო და დაადანაშაულა, რომ ციხეში ყოფნისას ის ხელისუფლებას გათავისუფლებას ეხვეწებოდა.

კონტრაბანდა – ერთ-ერთი ბრალდებთაგანია, რაც აზერბაიჯანის ხელისუფლებამ მუხთარლის წაუყენა, რათა დაეპატიმრებინათ. წინასწარი მონაცემებით, ჟურნალისტი საქართველოდან გაიტაცეს. საერთაშორისო უფლებადამცავმა ორგანიზაციებმა აფგან მუხთარლი პოლიტპატიმრად აღიარეს და მისი გათავისუფლებისთვის დიდხანს ზრუნავდნენ

ეს ყველაფერი აზერბაიჯანის ოპოზიციის შიგნით მომხდარი კონფლიქტის პირველი შემთხვევა არ არის. ხელისუფლების მიერ შეთავაზებული დიალოგის შემდეგ ეს კონფლიქტები კიდევ უფრო გახშირდა.

ცეცხლზე ნავთს ისიც ასხამს, რომ პარტია „რესპუბლიკური ალერნატივას“ წევრი ერკინ გადირლი მოქმედი ოპოზიციის ერთადერთი წარმომადგენელია, რომელიც 2020 წლის საპარლამენტო არჩევნებით პარლამენტში მოხვდა.