SJC: მოვითხოვთ პოლიციის მიერ ჩადენილ ძალადობებზე გამოძიებას
SJC-ის განცხადება
არასამთავრობო ორგანიზაცია სოციალური სამართლიანობის ცენტრი (SJC) მოუწოდებს საქართველოს გენერალურ პროკურატურას და სპეციალურ საგამოძიებო სამსახურს, დაუყოვნებლივ დაიწყონ გამოძიება პოლიციელების მიერ ჩადენილ ძალადობის ფაქტებზე.
ორგანიზაცია განცხადებით ეხმაურება ორ თებერვალს, პოლიციის მიერ მშვიდობიან დემონსტრანტებზე ძალადობას.
SJC მოუწოდებს საქართველოს შინაგან საქმეთა სამინისტროს, გააკეთოს განცხადება დემონსტრანტების დაკავების საფუძვლების შესახებ და დაუყოვნებლივ გაათავისუფლოს დაკავებულები.
ორგანიზაციის განმარტებით, დაკავების პარალელურად, სოციალურ ქსელებში გავრცელდა პოლიციელების მხრიდან ძალადობის ამსახველი კადრები:
● დაკავებები და დემონსტრანტებზე, მათ შორის ქალებზე ძალადობა, გაგრძელდა მას შემდეგაც, რაც აქციის მონაწილეები რუსთაველის გამზირის მიმართულებით გადაადგილდებოდნენ. პოლიციამ უკანონოდ დააკავა აქციის 5-ზე მეტი მონაწილე სანაპიროზე გადაადგილებისას.
● რამდენიმე შემთხვევაში, მასალებში ჩანს, თუ როგორ უსწორდება აქციის მონაწილეებს ძალოვანთა ჯგუფები. ერთ-ერთ ასეთ ვიდეოში ასახულია როგორ ურტყამს რამდენიმე პოლიციელი წრეში მოქცეულ ადამიანს თავის არეში;
● ერთ-ერთ გავრცელებულ კადრში, სავარაუდოდ, ჩანს როგორ უსწორდებიან პოლიციელები დაკავებულ მოქალაქეებს თეთრ ფურგონში. წამებისა და არაადამიანური მოპყრობის მსგავს პრაქტიკაზე საუბრობდნენ აქტივისტები 2024 წლის დეკემბერში;
● “ტვ პირველის” მიერ გავრცელებულ კადრებში კი ჩანს, როგორ მიჰყავთ დაკავებული დემონსტრანტი გდდ-ის ხელმძღვანელ ზვიად ხარაზიშვილთან, რომელიც მოქალაქეს ფიზიკურად უსწორდება. სხვა კადრებში კი ჩანს, როგორ აგინებს ის აქციის მონაწილეებს მანქანიდან, ხმის გამაძლიერებლის გამოყენებით. გდდ-ის ხელმძღვანელი კიდევ ერთ ეპიზოდში ფიგურირებს, სადაც სპეცრაზმის თანამშრომლებს მოუწოდებს, კამერების თვალწინ არ გაუსწორდნენ ფიზიკურად მოქალაქეს;
● ზოგიერთ შემთხვევაში, პოლიციელები მოქალაქეებს სიტყვიერ შეურაცხყოფას აყენებდნენ და ემუქრებოდნენ ან უსაფუძვლოდ აკავებდნენ მათ;
● აქციის მიმდინარეობისას, ხეივანზე მიმავალი მანქანები სოლიდარობას მანქანის სიგნალით გამოხატავდნენ. ერთ-ერთ ასეთ შემთხვევაში, ჩანს, რომ პოლიციამ მანქანა ალყაში მოაქცია და მის დაზიანებას, ასევე, მძღოლის მანქანიდან გადმოყვანას შეეცადა;
● პოლიციელები თავს ესხმოდნენ ქალ აქტივისტებსა და პოლიტიკოსებს. ისმოდა მათ მიმართ დისკრიმინაციული, დამამცირებელი და შეურაცხმყოფელი ფრაზები;
● დაკავებიდან გათავისუფლების შემდეგ, ნიკა მელიამ აღნიშნა, რომ მასზე პოლიციის ერთ-ერთმა მაღალჩინოსანმა პოლიციის განყოფილებაში იძალადა, კერძოდ, ბორკილდადებულს წიხლი ჩაარტყა.
“კიდევ ერთხელ უნდა გაესვას ხაზი, რომ ნიღბიანი ძალოვნები, რომლებიც იდენტიფიცირებადიც არ არიან, რაც, თავის მხრივ, ადამიანის უფლებების სტანდარტების უხეში დარღვევაა, დაუსჯელობის სრული გარანტიით სარგებლობენ. ამ დრომდე, არავინ დასჯილა 28 ნოემბერს დაწყებულ საპროტესტო აქციებზე სისტემური წამებისა და არაადამიანური მოპყრობის ასობით ფაქტების გამო. უფრო მეტიც, ამ დრომდე არ არის ცნობილი ინფორმაცია რომელიმე მოძალადე სპეცრაზმელის იდენტიფიცირების შესახებ და უფლებამოსილების შეჩერების შესახებ.”- ნათქვამია განცხადებაში.
2 თებერვალს, 16:00 საათზე “თბილისი მოლის” მიმდებარედ საპროტესტო მარშების გაერთიანება და რამდენიმე საათით დიღმის გზის გადაკეტვა იგეგმებოდა. აქციის დაგეგმვის მეორე დღეს, 31 იანვარს, “ქართული ოცნების” პრემიერმინისტრმა სპეციალური განკარგულება მიიღო. ამ დოკუმენტით, სტრატეგიული და განსაკუთრებული ობიექტების სიას საერთაშორისო საავტომობილო გზები დაემატა.
თბილისის გასასვლელში მიმდინარე აქციაზე პოლიციამ ძალის გამოყენებით ათეულობით მოქალაქე დააკავა, მათ შორის პოლიტიკოსებიც. პოლიცია ფიზიკურად უსწორდებოდა აქციის მონაწილეებს. დაკავებულია 31 ადამიანი, აქედან 5 დემონსტრანტი ინგოროყვას კლინიკაშია, მათ ტვინის შერყევა აღენიშნებათ.
საქართველოს ახალგაზრდა იურისტთა ასოციაცია მიმართავს გენერალურ პროკურორს გიორგი გაბიტაშვილს და მოითხოვს, ზვიად ხარაზიშვილის (ხარებას) მიმართ დაიწყოს სისხლის სამართლებრივი დევნა და შეუჩერდეს უფლებამოსილება.
ამასთან, სახალხო დამცველი ლევან იოსელიანი განცხადებას ავრცელებს და პოლიციის მხრიდან მოქალაქეებზე ძალადობის ფაქტებზე შეშფოთებას გამოთქვამს.
განცხადებაში ნათქვამია, რომ ომბუდსმენი გმობს პოლიციელების მხრიდან ყველა სახის კანონსაწინააღმდეგო ქმედებას, განსაკუთრებით კი არასათანადო მოპყრობის ფაქტებს.
ომბუდსმენი მოუწოდებს სპეციალურ საგამოძიებო სამსახურს, დაუყოვნებლივ დაიწყოს ყველა ამ ფაქტზე გამოძიება და მისცეს შესაბამისი პირები სისხლის სამართლის პასუხისგებაში. ასევე, მოვუწოდებთ შინაგან საქმეთა სამინისტროს გენერალურ ინსპექციას – პოლიციელების მხრიდან სიტყვიერი შეურაცხყოფებისა და არაეთიკური მიმართვების ფაქტებზე ჩატარდეს სამსახურებრივი შემოწმება.
