მოსამართლე ნინო გალუსტაშვილმა სინდისის თერთმეტ პატიმარს 2-2 წლით პატიმრობა მიუსაჯა
სინდისის პატიმრების საქმე
მოსამართლე ნინო გალუსტაშვილმა სინდისის 11 პატიმარს პატიმრობა მიუსაჯა. მან ბრალი 226-ე მუხლით (ჯგუფური მოქმედების ორგანიზება და მასში აქტიურად მონაწილეობა) გადააკვალიფიცირა და ყველა ბრალდებულს 2-2 წლით პატიმრობა მიუსაჯა.
დღესვე პროევროპული აქციების დროს დაკავებულ საბა სხვიტარიძეს მოსამართლე ჯვებე ნაჭყებიამ 2 წლით პატიმრობა მიუსაჯა. საბა სხვიტარიძეს თბილისის პოლიციის დეპარტამენტის დეტექტივების მთავარი სამმართველოს უფროსის, მირიან ქავთარაძის ჯანმრთელობის განზრახ მსუბუქ დაზიანებას ედავებოდნენ.
თავდაპირველად საქმე პოლიციელზე თავდასხმის მუხლით აღიძრა, თუმცა, 2025 წლის 24 ივლისს ბრალი გადააკვალიფიცირეს და საქმიდან სრულიად ამოვარდა პოლიციელზე თავდასხმის ნაწილი. პროკურატურამ აღიარა, რომ საბა სხვიტარიძემ არ იცოდა, რომ მირიან ქავთარაძე პოლიციელი იყო.
პროკურატურა 11-ვე დაკავებულს საქართველოს სისხლის სამართლის კოდექსის 225-ე მუხლის მეორე ნაწილს ედავებოდა, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებდა.
ბრალდებულებმა დღევანდელ სხდომას სასამართლოს საბოლოო სიტყვით მიმართეს, რის შემდეგაც გალუსტაშვილი სათათბიროდ გავიდა და განაჩენი გამოაცხადა.
ამ საქმეში ბრალდებულები არიან:
● ანდრო ჭიჭინაძე
● ონისე ცხადაძე
● ჯანო არჩაია
● რუსლან სივაკოვი
● ლუკა ჯაბუა
● გურამ მირცხულავა
● ვალერი თეთრაშვილი გიორგი ტერიშვილი
● ირაკლი ქერაშვილი
● რევაზ კიკნაძე
● სერგეი კუხარჩუკი
2 სექტემბერს პროევროპული აქციების დროს დაკავებულ 8 პირს მოსამართლე თამარ მჭედლიშვილმა პატიმრობა მიუსაჯა. სამ ბრალდებულს 2 წლით და 6 თვით პატიმრობა მიესაჯა, ხუთს – 2 წლით.
პროევროპულ აქციებზე დაკავებულ ანტონ ჩეჩინს კი 8 წლითა და 6 თვით პატიმრობა მიესაჯა. აღნიშნული გადაწყვეტილება მოსამართლე ჯვებე ნაჭყებიამ მიიღო.
