შსს-ს ადამიანის უფლებათა დეპარტამენტის რეგიონული სამმართველოს უფროსი, გოგა რაზმაძე სპეციალურ საგამოძიებო სამსახურს მიმართავს და შსს-ს გენერალურ ინსპექციაში მასზე განხორციელებულ დამამცირებელ მოპყრობაზე რეაგირებას სთხოვს. რაზმაძის თქმით, ადამიანის უფლებათა დეპარტამენტში არსებულ პრობლემებზე საუბრის გამო ის გენერალურ ინსპექციაში დაიბარეს და “საქმე გაურჩიეს”.
როგორც რაზმაძე აღნიშნავს, დეპარტამენტის კურატორად შს მინისტრის მოადგილის, ალექსანდრე დარახველიძის დანიშვნის შემდეგ, თანამშრომლები ცენზურას დაექვემდებარნენ, დაიწყო მათი საჯარო პოსტების კონტროლი, რის შემდეგაც მან განსხვავებული პოზიცია დააფიქსირა უფროსთან, ასევე მოადგილეებთან, ამის გამო კი, მის მიმართ დისკრიმინაციული მოპყრობა დაიწყო.
შინაგან საქმეთა მინისტრის მოადგილე, ალექსანდრე დარახველიძე ამბობს, რომ დეპარტამენტის თანამშრომლის განცხადებები დისკრიმინაციასთან დაკავშირებით “ტყუილი და აბსურდულია”. მისი მტკიცებით, ადამიანის უფლებათა დეპარტამენტის თანამშრომლის ბრალდებები არანაირ მტკიცებულებას არ ეფუძნება.
სახალხო დამცველის, ლევან იოსელიანის თქმით, ომბუდსმენის აპარატმა, შინაგან საქმეთა სამინისტროს თანამშრომლის, გოგა რაზმაძის განცხადებაზე მოკვლევა დაიწყო.
“მომართა სახალხო დამცველის ოფისს, პირადადაც მომმართა და ჩვენ უკვე კვირაზე მეტია დაწყებული გვაქვს ამ საქმის შესწავლა. შესაბამისი დეპარტამენტი მოიკვლევს ამ საკითხს და საზოგადოებისთვის ცნობილი გახდება ამის შემდეგ სახალხო დამცველს რა პოზიცია ექნება მის განცხადებასთან დაკავშირებით.
ერთ კვირაში ვერაფერი ვერ გამოვლინდება იმიტომ, რომ საქმის შესწავლას აქვს თავისი პროცედურა, ამას დრო დასჭირდება. თვითონ, რამდენადაც ჩემთვის ცნობილია, აპირებს ჩვენთან მოსვლასაც და გასაუბრებასა შესაბამისი დეპარტამენტის ხელმძღვანელთან”. – თქვა იოსელიანმა.
როგორც გოგა რაზმაძე აღნიშნავს, ამ მოვლენების ფონზე დეპარტამენტში აუდიტის შემოწმება დაიწყო, რაც “საერთოდ არ იყო გათვალისწინებული.” ის ამ ფაქტს რეორგანიზაციას უკავშირებს და აცხადებს, რომ მიუხედავად მცდელობისა, მინისტრის მოადგილესთან ესაუბრა, შეხვედრა ვერ შედგა, ამიტომ, რაზმაძე იძულებული გახდა, მეილი გაეგზავნა, სადაც საკუთარი აზრი დააფიქსირა.
16 ივნისს მის მიერ გაგზავნილ მეილთან დაკავშირებით გენერალურ ინსპექციაში დაიბარეს, სადაც გასაუბრების დროს გენერალური ინსპექციის უფროსის მოადგილე დამამცირებლად ეპყრობოდა და შეურაცხყოფდა მის ღირსებას. ამასთან, ფსიქოლოგიური ზეწოლის გზით აიძულებდა, ახსნა-განმარტების დაწერას, წინააღმდეგ შემთხვევაში კი, სამსახურიდან გაგდებით ემუქრებოდა.
გოგა რაზმაძე მიმართავს სპეციალურ საგამოძიებო სამსახურს, დაიწყოს გამოძიება. ამასთან, რაზმაძე მიმართავს საერთაშორისო თუ ადგილობრივ ორგანიზაციებს, უცხო ქვეყნის ელჩებს, მედიას – დაინტერესდნენ აღნიშნული ფაქტით და არ დაუშვან მისი და მისი ოჯახის წევრების უსაფრთხოების ხელყოფა.
“მოულოდნელად ოთახში შემოვიდა შსს-ს გენერალური ინსპექციის უფროსის მოადგილე, დავით მინდიაშვილი. მან გააგრძელა ჩემთან გასაუბრება, რაც 3 საათზე მეტ ხანს გაგრძელდა. მან საქმე გამირჩია იმის გამო, რომ ხელმძღვანელებისთვის მიწერილ წერილში დავაფიქსირე ჩემი მოსაზრებები დეპარტამენტში არსებულ ხარვეზებთან დაკავშირებით. მთელი გასაუბრების განმავლობაში, იგი მეპყრობოდა დამამცირებლად და შეურაცხყოფდა ჩემს ღირსებას. აგდებულად მოიხსენიებდა იმ დეპარტამენტს, სადაც ვმუშაობ. მეძახდა ამბიციურს. მეუბნებოდა, თუ რა მიკეთებია ცხოვრებაში. ფსიქოლოგიური ზეწოლის გზით მაიძულებდა ახსნა-განმარტების დაწერას. რამდენიმე თანამშრომელთან ერთად განიხილავდა ჩემს პირად Facebook პოსტებს და აკრიტიკებდა მათ. მიუხედავად იმისა, რომ ვთხოვე სხვა დროისთვის გადაგვეტანა ახსნა-განმარტების მიცემა (რაც ნებაყოფლობითია), იგი არ მიშვებდა ოთახიდან და მეუბნებოდა, რომ თუ არ დავწერდი განმარტებას, „სამსახურიდან გამაგდებდა.“ ეს პროცესი ჩემთვის ძალიან მძიმე იყო.
ყველაფრის მიუხედავად, ჩემი ნებით არ მივდივარ სამსახურიდან. ალბათ, ისედაც გამიშვებენ. ჩემი მენტალური ჯანმრთელობის ფასად კვლავ ვაგრძელებ ბრძოლას სამართლიანობისა და ჩემი უფლებების დასაცავად.
საჯაროდ მივმართავ სპეციალურ საგამოძიებო სამსახურს ოპერატიული რეაგირებისა და გამოძიების დაწყების მოთხოვნით. მზად ვარ, დეტალური ინფორმაცია მივაწოდო ჩემს მიმართ 11 ივლისს განხორციელებული დამამცირებელი მოპყრობის შესახებ.” – წერს რაზმაძე.
რას წარმოადგენს ადამიანის უფლებათა დაცვის დეპარტამენტი
შინაგან საქმეთა სამინისტროს განმარტებით, ადამიანის უფლებათა დაცვისა და გამოძიების ხარისხის მონიტორინგის დეპარტამენტი, კომპეტენციის ფარგლებში, უზრუნველყოფს დროულ რეაგირებას და მიმდინარე გამოძიების ეფექტიანობას შემდეგ დანაშაულებზე:
დანაშაული ოჯახში;
ქალთა მიმართ ძალადობა;
დისკრიმინაციის ნიშნით და შეუწყნარებლობის მოტივით ჩადენილი დანაშაული;
