შეუძლია თუ არა აზერბაიჯანს რუსეთის წინააღმდეგ ეკონომიკური სანქციების დაწესება? მოსაზრება ბაქოდან
დაძაბულობა რუსეთსა და აზერბაიჯანს შორის
მიმდინარე პოლიტიკური დაძაბულობა აზერბაიჯანსა და რუსეთს შორის კიდევ უფრო მწვავდება ორმხრივი ეკონომიკური მუქარების ფონზე. ეს ტენდენცია აშკარად გამოიხატება პროსახელისუფლებო მედიის გაშუქებაში ორივე ქვეყანაში.
მიუხედავად იმისა, რომ აზერბაიჯანის პრეზიდენტმა, ილჰამ ალიევმა, 11 თებერვალს დაადასტურა რუსეთთან მიღწეული შეთანხმება “ჩრდილოეთ-სამხრეთის“ სატრანსპორტო დერეფნის შესახებ, აზერბაიჯანის სახელმწიფო ტელეკომპანია AzTV-სა და სხვა პროსახელისუფლებო მედიასაშუალებებში განიხილება ბაქოს მხრიდან მოსკოვის მიმართ ეკონომიკური სანქციების შესაძლო დაწესება.
ამასთან, ოფიციალურ დონეზე ეკონომიკურ სანქციებთან დაკავშირებით არც ერთ მხარეს განცხადება არ გაუკეთებია.
- AZAL-ის ჩამოვარდნილი თვითმფრინავი ტექნიკურად გამართული იყო – გამოძიების ანგარიში
- პაატა ზაქარეიშვილის კომენტარი: სოხუმიდან დაიწყება სანქცირებული ტვირთების გადაზიდვა
რამდენად რეალურია, რომ აზერბაიჯანი რუსეთს ეკონომიკურ სანქციებს დაუწესებს? რა გავლენა შეიძლება ჰქონდეს ამ ნაბიჯს თავად აზერბაიჯანზე?
ეკონომისტი ელჩინ რაშიდი გამოცემა Pressklub.az-თან ინტერვიუში აცხადებს, რომ არ სჯერა სცენარის, რომლის მიხედვითაც აზერბაიჯანი რუსეთს ეკონომიკურ სანქციებს დაუწესებს.
მისი შეფასებით, ასეთი ნაბიჯი თავად აზერბაიჯანს უფრო მეტად დააზიანებს, ვიდრე რუსეთს.
ეკონომისტი თავის პოზიციას ორ ქვეყანას შორის არსებული ეკონომიკური დამოკიდებულების დონით ხსნის.
“აზერბაიჯანული სასოფლო-სამეურნეო პროდუქციის 90 პროცენტამდე რუსეთში ექსპორტირდება. ამასთან, აზერბაიჯანი რუსეთიდან გარკვეულ პროდუქციას, მათ შორის ხორბალს იღებს. რუსეთი აზერბაიჯანის უმსხვილესი პარტნიორია სატრანსპორტო ლოგისტიკის სფეროში. აზერბაიჯანში ჩამოსული ყოველი მესამე ტურისტი რუსეთიდანაა. გარდა ამისა, რუსეთის მოქალაქეები აზერბაიჯანში აქტიურად იძენენ უძრავ ქონებას“, — აცხადებს ეკონომისტი.
სტატისტიკური მონაცემებით, აზერბაიჯანისთვის, რომელიც ნავთობის არამომპოვებელი სექტორის განვითარებითაა დაინტერესებული, ამ მიმართულებით უმსხვილესი საექსპორტო ბაზარი რუსეთია.
ეკონომისტის შეფასებით, თუ აზერბაიჯანი რუსეთს ეკონომიკურ სანქციებს დაუწესებს, ეს ქვეყნის სოფლის მეურნეობას სერიოზული კრიზისის წინაშე დააყენებს.
“ასეთი ნაბიჯი აზერბაიჯანში სოფლის მეურნეობის სექტორს მძიმე დარტყმას მიაყენებს. როგორც ცნობილია, ქვეყნის რეგიონებში აშენდა მსხვილი გამაგრილებელი საწყობები სასოფლო-სამეურნეო პროდუქციის შესანახად. ამ საცავებში ინახება რიგითი გლეხების პროდუქცია, რომელიც შემდგომ სატვირთო ავტომობილებით რუსეთში იგზავნება.“ – ამბობს ელჩინ რაშიდი.
მისი თქმით, რუსეთში ექსპორტირებულ სასოფლო-სამეურნეო პროდუქციაში მხოლოდ მსხვილი სახელმწიფო კომპანიები კი არა, არამედ მცირე ფერმერებიც და უბრალო სოფლის მცხოვრებლებიც არიან ჩართული.
ანალიტიკოსი მიიჩნევს, რომ სანქციების შედეგად ექსპორტი შემცირდება, რაც რიგით გლეხებს მათი პროდუქციის გაყიდვის შესაძლებლობას მოუსპობს.
“ეს იმას ნიშნავს, რომ რუსეთთან ეკონომიკურ სანქციებს აზერბაიჯანისთვის არა მხოლოდ ეკონომიკური, არამედ სოციალური შედეგებიც ექნება,“ — აცხადებს ეკონომისტი ელჩინ რაშიდი.
მისი თქმით, ალტერნატიული საექსპორტო ბაზრების არარსებობა აზერბაიჯანს ამ სექტორში რუსეთზე კიდევ უფრო დამოკიდებულს ხდის.
