კვლევა: შემცირებულია იმ ადამიანების წილი, ვინც ლგბტ(ქ)ი ადამიანების მიმართ ზიზღს განიცდის
შემცირებულია იმ ადამიანების წილი, ვინც ლგბტ(ქ)ი ადამიანების მიმართ ზიზღს განიცდის
“ქალთა ინიციატივების მხარდამჭერმა ჯგუფმა” ლგბტ(ქ) ი თემის მიმართ საქართველოში საზოგადოებრივი დამოკიდებულების შესახებ ახალი კვლევა გამოაქვეყნა, რომლის მიხედვით 2016 წელთან შედარებით 2021 წელს მნიშვნელოვნადაა შემცირებული იმ რესპონდენტების წილი, ვინც ლგბტ(ქ)ი ადამიანების მიმართ ზიზღს განიცდის, ურთიერთობებს გარყვნილად აღიქვამს ან მორალურად განიკითხავს მათ.
ასევე, მნიშვნელოვნადაა შემცირებული იმ რესპონდენტების წილი, ვინც კონკრეტულად გეი/ლესბოსელი ადამიანების მიმართ ზიზღს განიცდის, ურთიერთობებს კი გარყვნილად ან “არაბუნებრივად” აღიქვამს.
რაც შეეხება დამოკიდებულებების ცვლილების ამგვარ დინამიკას განსაკუთრებით ტრანსი ადამიანების მიმართ, კვლევის ავტორები განმარტავენ, რომ ბოლო ექვსი წლის განმავლობაში სათემო ორგანიზაციების დღის წესრიგის მნიშვნელოვანი ნაწილი სწორედ ტრანს ჯგუფის გაძლიერებასა და ტრანს საკითხების ადვოკატირებაზე იყო ფოკუსირებული.
“ამან ხელი შეუწყო როგორც ჯგუფის წევრების, ისე მათ მიმართ ძალადობისა და დისკრიმინაციის შესახებ საზოგადოების ინფორმირებულობის გაზრდასა და მედიის დაინტერესებას ამ საკითხით. გენდერული ასიმეტრია ტრანს ადამიანების მიმართ დამოკიდებულებების ცვლილებაში (გენდერულად არაკონფორმული კაცების მიმართ მიმღებლობა უფრო გაიზარდა, ვიდრე გენდერულად არაკონფორმული ქალების მიმართ) კიდევ უფრო ამყარებს ამ მოსაზრებას: ბოლო რამდენიმე წელში მკვეთრად გაიზარდა ტრანს ქალებისა და მათი პრობლემების, მათ მიმართ ძალადობის და დისკრიმინაციის შემთხვევების ხილვადობა, მაშინ, როცა ტრანს კაცები დღემდე „უხილავ” ჯგუფად რჩება”, – აცხადებენ კვლევის ავტორები.
კვლევის ძირითადი მიგნებები:
ლგბტ(ქ)ი უფლებრივი თანასწორობის აღქმა პროპაგანდად
„ლგბტ(ქ)ი ადამიანების უფლებები დაცული უნდა იყოს, მაგრამ არაა საჭირო, რომ გეებმა/ლესბოსელებმა თავიანთი ცხოვრების სტილი სხვებს მოახვიონ თავზე” – ამ დებულებას სრულიად ან ნაწილობრივ იზიარებს გამოკითხულთა 55.9%, ნაწილობრივ ან სრულიად არ ეთანხმება რესპონდენტების 18.7%, ხოლო 14.7% ნეიტრალურ პოზიციას აფიქსირებს.
დამოკიდებულება შეკრებისა და გამოხატვის თავისუფლების მიმართ
მიუხედავად იმისა, რომ რესპონდენტთა ნახევარზე მეტი (53%) კვლავ ემხრობა მოსაზრებას, რომ ლგბტ(ქ)ი ადამიანებს შეკრებისა და გამოხატვის უფლება კანონით უნდა აეკრძალოთ, 2016 წელთან შედარებით, ასეთი რესპონდენტების პროცენტული წილი 25%-ითაა შემცირებული.
დამოკიდებულება ერთი სქესის პარტნიორებს შორის ქორწინების უფლების მიმართ
2016 წელთან შედარებით, ქორწინების უფლებას ერთი სქესის ადამიანებს შორის რესპონდენტთა უფრო მცირე წილი მიიჩნევს მიუღებლად. 2016 წელს ასეთი რესპონდენტების წილი 88.8% იყო, ხოლო 2021 წელს – 76.4%.
დამოკიდებულება გეი/ლესბოსელი წყვილებისთვის შვილად აყვანის მიმართ
გეი და ლესბოსელი წყვილებისთვის შვილად აყვანის საკითხთან მიმართებაში განწყობები ბევრად შერბილებულია: „გეი წყვილს ისევე უნდა ჰქონდეს ბავშვის აყვანის უფლება, როგორც ჰეტეროსექსუალების წყვილს” სრულიად ან მეტწილად არ ეთანხმება რესპონდენტთა 67.9%.
