სლოვენიაში სიტყვით გამოსვლისას ევროპული საბჭოს პრეზიდენტმა, შარლ მიშელმა განაცხადა, რომ ევროკავშირი და მისი წევრობის მსურველი ქვეყნები 2030 წლისთვის გაფართოებისთვის მზად უნდა იყვნენ.
ევროპული საბჭოს პრეზიდენტმა ამ კონტექსტში ახსენა მოლდოვა, უკრაინა და საქართველო და აღნიშნა, რომ გაფართოება ოცნება აღარაა და დროა, ორივე მხარემ წინ წაიწიოს.
“უფრო ძლიერი და უსაფრთხო რომ ვიყოთ, ევროკავშირმა უნდა გააძლიეროს კავშირები და უნდა გახდეს უფრო ძლიერი. ამიტომ, სწორედ ახლაა დრო, რომ მოვაგვაროთ გაფართოების საკითხი ევროკავშირისთვის და მომავალი წევრებისთვის. დიახ, დარწმუნებული ვარ, ასე უნდა ვუწოდოთ ქვეყნებს, რომლებსაც დადასტურებული აქვთ ევროპული პერსპექტივა. დროა, თავიდან ავიცილოთ ორაზროვნება; დროა დავდგეთ გამოწვევების წინაშე მკაფიოდ და გულწრფელად.
კრემლი ახორციელებს თავდასხმას არამხოლოდ თავისუფალ და სუვერენულ მეზობლებზე, არამედ ყველაფერ იმაზე, რისიც გვწამს: თავისუფლებზე, დემოკრატიაზე, პროგრესზე და თანამშრომლობის სულისკვეთებაზე. შარშან ივნისში ჩვენ გადავწყვიტეთ, რომ კანდიდატის სტატუსი მიგვენიჭებინა უკრაინასა და მოლდოვისთვის, ასევე იგივე სტატუსი მიგვეცა საქართველოსთვის, როდესაც ის საჭირო ნაბიჯებს გადადგამს.
ახლა გაფართოება აღარაა ოცნება, დროა წინ წავიწიოთ. ბევრი სამუშაოა, ასევე იქნება რთული, ზოგჯერ მტკივნეული მომავალი წევრებისთვის და ევროკავშირისაც, მაგრამ მოდით ვიყოთ მკაფიო – უნდა ვილაპარაკოთ დროსა და საშინაო დავალებაზე. მაშინ, როდესაც ვემზადებით ევროკავშირის შემდგომ დღის წესრიგზე, უნდა დავუსახოთ საკუთარ თავს მკაფიო მიზანი, ჩვენ ორივე მხარე 2030 წლისთვის მზად უნდა ვიყოთ გაფართოებისთვის.” – აღნიშნა მიშელმა.
მანამდე Financial Times-მა გაავრცელა ინფორმაცია, რომ დღეს, 28 აგვისტოს ევროპული საბჭოს პრეზიდენტი, შარლ მიშელი იტყვის, რომ ევროკავშირი 2030 წლისთვის ახალი წევრების მისაღებად მზად უნდა იყოს.
სლოვენიაში, “ბლედის სტრატეგიულ ფორუმზე”, სადაც მიშელი სიტყვით გამოდის, ევროკავშირის კანდიდატი ქვეყნების – მოლდოვის, ალბანეთის, ჩრდილოეთ მაკედონიის, მონტენეგროს, სერბეთისა და ბოსნია-ჰერცოგოვინას ლიდერები ესწრებიან. შეხვედრაზე არ იმყოფებიან საქართველოსა და თურქეთის დელეგაციები.
ევროკავშირის ლიდერებს ბლოკის გაფართოებასთან დაკავშირებით პირველი დისკუსია ოქტომბრის დასაწყისში, ესპანეთში, გრანადაში ექნებათ.
გამოხმაურება
ნიკა გვარამია, ტელეკომპანია “მთავარის” ყოფილი დირექტორი: “არაა საჭირო ზუზუნი და წუწუნი. ჯერ შოლცმა, დღეს – მიშელმა გასაგებად თქვა: ევროკავშირი არის ლისაბონიდან თბილისამდე და 2030 წლამდე გაფართოების ეს ეტაპი დასრულდება. ასე რომ, სტატუსს თუ წელს ვერ მივიღებთ (და, დარწმუნებული ვარ, ვერ მივიღებთ ქართული ოცნების დიდი მეცადინეობის შედეგად), არავითარი შესაძლებლობის ფანჯარა არ დაიხურება. დაიხურება ქართული ოცნება და მისი ხელისუფლება, ხოლო საქართველოს ევროკავშირში 2024 წელს არჩეული ახალი ხელისუფლება შეიყვანს.
არც ეს “მიუხედავად ყველაფრისა მაინც მოგვეცით” ვაჭრობა მგონია გამართლებული – ეს თან არასერიოზულია, თან კონტრპროდუქტიულია, თან უპასუხისმგებლოა და თან უკიდურესად გამაღიზიანებელი (ხშირად, შეურაცხმყოფელიც) ჩვენი პარტნიორებისთვის. არაა საჭირო ევროკავშირის დანამუსება და ლამის “წველა”, საკუთარ საქმეს მივხედოთ და დასავლეთისკენ მიმავალ გზაზე ყველაზე შემაფერხებელი კედელი გადავდგათ 2024 წელს.
და თუ ჩვენს ვალს ჩვენი სამშობლოს წინაშე პირნათლად ვერ მოვიხდით, რატომ გადავწყვიტეთ, რომ რამეს ვიმსახურებთ? ეგ გულუბრყვილო დასკვნა ჩემთვის გამოცანაა: ხალხი იმსახურებს იმას, რასაც თავისი ბრძოლით და პრინციპულობით აღწევს. როგორც დიდი ხნის წინ არისტოტელემ თქვა, ოლიმპიურ (ძველ ბერძნულ)თამაშებში იმარჯვებს არა ყველაზე ლამაზი და ჭკვიანი, არამედ ის, ვინც ყველზე მეტი იბრძოლა და სხვებზე უკეთ იასპარეზა.
ყველაფერი კარგად იქნება, ეჭვიც არ მეპარება.”
ელენე ხოშტარია, პარტია “დროა: “მიშელის განცხადება- დიახ ხალხი იმსახურებს, ამიტომ შანსი არის, შანსი რომ რეალიზდეს, უნდა შესრულდეს პირობები. პირობებს ოცნება არ ასრულებს. საბოლოოდ ხალხი გადაწყვეტს ისტორიული შანსი გამოვიყენოთ, თუ ოცნებას ჩავაყოლოთ ჩვენი თავი.
ისტორიული პასუხისმგებლობა გვაქვს შანსის რეალიზების!”
შოთა დიღმელაშვილი, სამოქალაქო აქტივისტი: “ამ დღეებში შარლ მიშელი ევროკავშირის გაფართოებაზე და ვადებზე განცხადებას გააკეთებს. ევროკავშირი ფართოვდება რვა ქვეყნით. სიაში მოიაზრებიან ბალკანეთის ქვეყნები, უკრაინა და მოლდოვა. ფორმალური გამცხადებელი 10 ქვეყანაა, შესაბამისად, დიდი ალბათობით, 8ში არ მოიაზრება თურქეთი და საქართველო.
ამ ეჭვს ამყარებს, რომ კონფერენციაზე დაპატიჟებულია ყველა, კოსოვოს ჩათვლით, რომლის დამოუკიდებლობას ევროკავშირი არც კი აღიარებს. არ დაუპატიჟებიათ მხოლოდ თურქეთი და საქართველო, ასე რომ გასაგებია, იმ რვაში ვინაა და ვინ – არა.
ევროკავშირში მოლდოვა რომ შევა და ჩვენ – ვერა, ეს ვერანაირ გლობალ ომის პარტიას ვერ დაბრალდება. მოლდოვაში ომი არაა და მათაც აქვთ რუსეთის მიტაცებული რეგიონი. საქართველოსთვის მიცემული ერთი ისტორიული შანსის გაფუჭებისთვის, მადლობა ბატონ ბიძინას.
თუმცა სხვებმაც უნდა გააცნობიერონ საკუთარი პასუხისმგებლობა.”
